دال‌یندان قوپان یارپاق
سولماز جمالی

تیک … تاک … تیک … تاک … تئلئفون زنگ ائدیر … تئلئفونون زنگی ساعاتین دینقیلتی‌لارینا قاریشیر … تیک … تاک …
– سئویل … سؤندور داااا … شمع‌لر ارییه‌جک هااا …
یئنه چؤنوب قاپییا باخدی: بابک … بابک گلمئییب هله …
اعتیراض سسلری یوکسلدی … های-کوی قوپدو …هر کس بیر آتماجا آتدی… بیر ایکی نفر ده آغیز-بورونون اه‌یدی …
– شمع‌لری پیله‌میر ندی ندی بابک گلمئییب … بئبیله آدام دا بوردا چوغوندوردو…
– بابک ده نه باااابک …
– بابا تای اؤزووو ساریما کی …
– هه ده … ائله او قالیب آغا بابک‌ی گؤزلییک …
– پیله پیله … ایندی اؤزو سؤنه‌جک هاا …
گؤزو کئیک‌ین اوستونده یازیلان «دوغوم گونون قوتلو اولسون» سؤزونه زیللندی … ۱۸ شکیلینده اولان شمع‌لری اریمیشدی … گؤیدن آسلانان قارا-قیرمیزی پیله‌مج‌لره باخدی …
تیک … تاک … تئلئفون زنگ ائدیر… سس‌لر قاریشیر … تیک … تاک … تیک … تاک …تئلئفون زنگ ائدیر …
دیک آتیلدی. قورخموش گؤزلرینی اؤنوندهکی زیل قارانلیق دیواردان آلیب تئلئفونا باخدی … گؤزلرینی اونا آغیز ا‌ه‌ین ائوده گزدیردی … ائله بیل نسه آختاریردی … گؤزلرینی کنسولون اوستونده‌کی یئکه شکیل‌دن آلدی … بیر آنلیق قایین‌آتاسی‌نین زئیتونی گؤزلریندن هۆرکدۆ … الی‌نین دالیلا آلنینین ترینی سیلیب تئلئفونو گؤتوردو. تپیمیش دیل دوداغینی زورلا دبرتدی.
– الو؟ …
– الو سئویل … بیلیرم یاتمیشدین … باغیشلا … امما صوبحهجک دؤزه بیلمزدیم …
الینی اورهیینین باشینا قویور؛ الیله اؤوکلهییر کؤکسونو.
– نه اولوب نسرین؟ …
– سئویل … قورخما … من چوخ سئوینیرم … بابک … بابک مریضایمیش …سن دئمه او بیلمه‌دن آتاسی‌نین رولونو اوینئییرمیش … کاش آلاهی ائوه داشیناسیز … او ائودن گئدین …
جانینا اۆشۆتمه دوشدو … سسسیزلیک چؤکور؛ دوغال بیر سسسیزلیک.
نفسینین سسی بئله دویولموردو. ساعاتین دا سسی باتمیشدی. بوش ائوین تاوانی اورهیینین اوستونه چؤکوردو. هؤنکورتو سسی نسرینین سئوینج دولو گولوشلرینی چولغادی.
آیاقلاریمین اوزهرینده دورا بیلمیرم … تیترهییرلر … آددیمیمی آتا بیلمیرم … دیزلریم قاتلانیر … یئرده اوتورورام … منی بو حالدا گؤرونجه اؤزونو ایتیریر … منه ساری قاچیب اییلیر …اللرینی اوزادیر …قولومدان توتماق ایستهییر … الیمی قالدیریب مانع اولورام … الینی باشینا آپاریب ساچینی داغیدیر …
اؤزونو ایتیریرسن؟! منه ساری قاچیسان؟! قورخورسان منه بیر شئی اولا؟! ایسته-ییرسن دئیهسن منی سئویرسن؟!! … یوخسا سادهجه اورهیین یانیر منه؟؟ …
– سن منی ایستهمهدین … منی تک قویدون …
– سن ده جان آتدین …الان تک دؤورسن کی …
اللرینی قالدیریب بیر دوزونه داوام ائدیر … قاشلارینی چاتیر …
– سن ایسته‌دییین ایشی گؤروبسن … الان دئمه‌یین ندی؟! … بورا نمنییه گلیبسن؟! …
– من اونو ایستهمیرم …
گؤزلری حیرصدن قیغیلجیم تؤکور. قانی قارالیر…
– هله ده دبریشییو بیلمیسن، دانیشیغینی بیلمیسن … هر گۆن بی بامبیل چیخاردیسان … دور، همین الان بو ائودن چیخ گئت …
– بابک … من یانیب یاخیلیرام … من دیغلئییرام …
باشینی قالدیریب گؤزلریمه زیللنیر … مات قالیرام … بو باخیش سنین باخیشین دئییل بابک …
دئمیشدیلر «نور» سورهسینی اوخو …
آیاقلاری یئره دؤیولوردو. گؤزلری دولموشدو. آیهلری جوت-جوت گؤروردو. او بونو ایستهمیشدی؟!
زنگ ووردوغوندا نه دئمیشدی؟! منیم جوابیم هه‌دیر … دئ آناما زنگ ائلهییب ایذین آلسینلار.
چاتیق قاشلارینا زیللنمیشدی … زئیتونی گؤزلرینه … آلنینا تؤکولموش قارا ساچلارینا … دریسینین بوغدایی رنگینه … دوداقلاریندان هئچ واخت اسکیلمه‌ین اؤزل گولوشلرینه… چوخ دا یاخین اولمایان او سویوق، کولکلی گونو خاطیرلامیشدی.
– سنه دئمهمیشم گؤزله قوی اؤزوم گلیم؟
– دوستلاریمنان گلدیم … نه فرقی وار آخی ؟!…
– اوچ ساعات بو سویوقدا دورموشام مدرسهنین قاباغیندا … هئچ بیلیرسن نه قدررر نگران اولموشام؟ قورخموشام؟ …
الینی آلنینا قویوب داوام ائتمیشدی: باشیما آغری سیچرئییب با …
یاخینلاشیب همشهکی کیمی بوینوندان ساللانمیشدی: گئدک دوندورما یئیک؟!!
اللرینی قالدیریب بوینونا دولانمیش اللریندن یاپیشمیشدی. آستاجا دئیینمیشدی: مین سئری دئمیشم دای ساللانما مننن… یئکهلیبسن … دئییرسن هله ده بئش یاشی وار … مین‌بیر سئری ده دئمیشم سویوقدا دوندورما اولماز …
نئچه یاشی وارایدی اوندا؟! …
– باااااابک … دوندورمااااا …
– دای نمنه؟! …
قاشلارینی چاتماغینا باخمایاراق دوداغینین قاچماغینی گؤرموشدو … یئنه جسارتلهنیب قوجاغینا گیرمیشدی …
– گئنه اۆز وئردیم بااا … سیرتیق …
قاققیلداییب گۆله-گۆله دیلینی ده چیخارتمیشدی … بابک دوداغینداکی گۆلۆشۆ‌ایله گؤزلرینی آغارتمیشدی: کئچی …
گؤزلریندهکی او کدری نییه هئچ زامان فرق ائتمهمیشدی؟! نه قدر ده اوشاقیانا داورانمیشدی … بابک نییه هئچ واخت اوندان و ایشلریندن یورولمامیشدی؟! نییه اونون حیسسینی، دردینی بیلمه‌میشدی؟! …
آیاقلارینی یئره دؤیوردو … گؤزلرینی قاپیدان آلمیردی … گلهجهیینه امینایدی … گلیب قولوندان یاپیشاجاقدی … ایذین وئرمهیهجکدی … کبین سوفرهسینی بئله داغیداجاقدی … بلکه بهیی ده یاخشیجا دؤیهجکدی …
آشپازخانانین پردهسینی قیراغا چکیب خیابانا باخیردی. مایکروفرین زنگی قولاقلاریندا جینگیلدهییردی. تئلئفون زنگ ائدیردی. یئریندن ترپنمهدی. گؤز یاشلاری آخدی. اوجاغا ساری دؤندو. یئرآلمالاری قاریشدیریب اوتوراجاقدا اوتوردو. آلنیندان تر سوزولوردو … باشینی ماسانین اوزهرینه قویدو. نیفرت دولو باخیشینی خاطیرلادی … اؤز اللریله هر نهیی خاراب ائلهمیشدی. بوتون کؤرپولری بئله …
– او مریضایمیش سئویل … حسن دایی اؤلدویو گوننن بابک دئپرئس اولور… کابوس گؤرور … ایللردی دوکتورا گئدیر …آلاهی قادیننان اولماغی دا اونا گؤرهایمیش کی همیشه‌لیک سنه آتا اولاراق قالسین … دوکتورو ایستئییر سننن دانیشا … دئییر دوزهلهجک … تکجه یاردیم ائلهمهلیسن هم بابکه هم ده اؤزووه …
ایکی ساعاتدی حیطده اوتوروب آغلاییرام. قاپی دؤیولور. شاپشاپیمی تلهسیک گئییب قاچیب قاپینی آچیرام. بابک‌ی گؤرونجه اؤزومو قوجاغینا آتیرام: نییه گئجیکدین بههههه؟ … ساری جوجهمی پیشیک یئییب …
منی قوجاغینا آلیب پیللهده اوتورور. اللریله اوزومو سیلیر: آی الله … آغلاما جیققیلی قیزیم … سؤز وئریرم بیرلیکده گئدک آلاهیسین آلاق …های آتاسی‌نین قیزی … های منیم ساری جوجهممم …
محبتینی حیس ائدینجه آغلاماغیم لاپ اوجالیر … سسینی قولاغیمین دیبینده ائشیدیرم: دووشان شاپشاپووو دا تایدهییشیک گئییبسن هااا …
آغلاماغی اونودورام … گؤزومو آچیب آیاغیما باخیرام … سونرا چؤنوب بابک‌ه زیللنیرم …گؤز وورور: من بو دووشانلاری سئومیرم … گرک بیرین آلاق اوستونده ساری جوجهسی اولا …
گولورم … اورکدن …
من اوشاقلیغیمدان بابک‌ین قوجاغیلا، محبتیله تانیش اولدوم. آتاسی اؤلدوکدن سونرا …
مئبیلین ترپهنیشیندن یانیندا اوتوردوغونو سئزدی. اللرینی چیینینه دولادی. اؤزونه طرف چکیب باشینی کؤکسونون اوستونه قویدو. ساچلارینی سیغاللادی.
– -بیلیرم هر نهیی بیلیبسن … منی باغیشلا … کئشکه سننن اوزاقلاشماق یئرینه، سنی تک قویماق یئرینه هر نهیی دئییردیم … من ایللردی اؤزوم اؤزومنن ساواشیرام … ایللردی عذاب ایچیندییم … اؤزومو تانیدیغیم زاماننان …غروروم ایذین وئرمیردی دردیمی سنه دانیشام …
– گونلریم نه قدر گؤزلایدی او زامان کی منیم “آتام” ایدین.
یانان چؤر-چؤپون چیرتاچیرت سسینی دینله‌ییرم … قیرمیزی اود اودونو یالایا-یالایا گؤیه دارتینیر … قیریق-قیریق آغاج‌لاری، شاخ-بوداغی اوست-اوسته ییغیب تونقال قالاییب‌لار … پارت‌پارت سسی هر یئردن ائشیدیلیر … اود چرشنبه‌سی‌دیر… هاممی اود اوستوندن آتلانماق اوچون حیطه ییغیشیب … بابک الینده‌کی ماشا‌ایله اودو ترپه‌دیر … سونرا آیاق اوسته دوروب زیللنیر اودا … اودون قیرمیزی ایشیغی اۆزۆنو بۆرۆیوب… بیر آندا چؤنوب منه باخیر … گؤزلری ایشیلداییر … دیزلری اوسته اوتوروب قوللارینی آچیر … اوددان قورخورام، امما بابک‌ین قوجاغیندان کئچه بیلمیرم … قاچیب قوجاغینا گیریرم …
– اوول بیز آتداناق … هه؟! …
سگگیز یاشیم وار … هرکسدن چوخ بابک‌ه گۆوه‌نیرم، اینانیرام … یئنه چؤنوب اودا باخیرام … گؤزلریمی اوددان آلیب بابک‌ین گۆلر اۆزۆنه باخیرام … دردیمی بیلیر …
– قورخما … من توللاناجام سن ده منیم قوجاغیمدا اولاجاقسان …
گۆلۆمسه‌ییب باشیمی ترپه‌دیرم …
سونراسیندا تکجه گۆلۆشلریمی بیر ده بابک‌ین هیجانلا دئدییی سؤزلری خاطیرلاییرام …
– آغیرلیغیم اوغورلوغوم بوردا قااالسیییین … سئویییل … آغیرلیغین اوغورلوغون بوردا قاااالسییین …آغیرلیغیمیز اوغورلوغوموز اوتدا یانسیییین …

– -به دئییرسن بیلمیرم منیم هر دانیشیغیمی هر دبریشیییمی باشقاسینان توتوشدوروسان؟ … گؤزونو قشح آچ باخ منه … من او بئینیندهکی آدامنان یئرنن گؤیجک فرق ائلئییرم. منی آز اینجیت … من دینجلیک گزیردیم … آمما …
– اوزاندیغیم حالتده آیاقلاریمی قاتلاییب قارنیما ساری ییغیرام. یئنه نیفرت … یئنه گؤز یاشلاریم … ایستهییر گؤز یاشیمی سیلسین امما ایذین وئرمیرم.
اورهیین یانیر منه؟ هر نهیی بیله-بیله گؤز یاشیمی سیلمک ایستهییرسن؟! یازیق ایلقار … بئناوا ایلقار … من سنینله نه ائلهدیم!!! …بیلیر … هر نهیی بیلیر …
بو قدر صاف، تمیز محبتینی قوروموش بیر بوداغا دا ائلهسهیدین بوتونلوکله تومورجوقلاناردی… منیم اورهییم یانیب … بابک یاندیریب … منی هارا آپارماق ایستهییرسن اورهییمدهکی بو اودنان … قورخمورسان اتهییندن یاپیشام؟ آلوولانماقدان قورخمورسان؟ اورهیینی بوشالت مندن … گئت … منیم مظلوم آداخلیم … من اورهیینی بوشالدارام بوتون من‌لردن … منیم آدیم دا، هاوام دا، خاطیرهم ده یادیندان چیخار …
گؤزلریله قاپینی گؤرسهدیر: گئت … سنین اورهیین بوردا دئییل.
چیغیرتی سسیله یوخودان دیک آتیلیرام. بابک اۆزونو اللریله توتوب. درین-درین نفس آلیر. الیمی قالدیریب بیلهیینی تومارلاییرام …
– پیس یوخو گؤردون؟ …
– آتامین یوخوسون …
– آشپازخانایا گئدیب بیر لیوان سو گتیریرم. ائللییین باشینا چکیب اوزانیر.
– گئنه گؤرورسن؟
گؤزلرینی مؤحکم یومور …
– هه … باغیشلا قورخوزدوم سنی … گل یات …
اییلیب ترلهمیش اوزونو اؤپورم. الینی آلنینا قویوب اؤزونو یاتاغین قیراغینا ساری چکیر. یئنه مندن اوزاقلاشیر …
– سن منی تک قویدون …
– نئجه قارا گونه قالدیق … بند ائلهمه بو جوملییه … چؤروب-چؤروب دئمه … بو سؤزلردن کئچیب دای … خوشبخت اول … ائولی بیر خانیمسان … بو سؤزلر چوخ چیرکین‌دی … قویما اۆزۆم دؤنه … ایسته‌میرم گؤزومدن دوشه‌سن …
– منیم گؤزوم قاپیدا قالمیشدی … دئییردیم گلیب قویمییاجاقسان …
باشینی بوللاییر: اوشاقسان …
– دای قویموردون قوجاغووا گیرم … قویموردون بوینوننان ساللانام …
– اولسون دا … یئریمی دولدوروبسان … گیر قوجاغینا …بوینوننان ساللان …
سانکی جانیمی آلیر … ال آیاغیمدا حیس قالمیر: بااااابک … بسدی دای …
– دای هئچ نه‌ مهم دؤور … او زامان کی سنه دئدیم درسینی اوخو … هئچ نهیه فیکیرلشمه، لج ائلهدین. بیردن دهییشدین.
اۆزبه‌اۆزۆمده مئبیل‌ده اوتورور. دیرسکلرینی دیزلری‌نین اوستونه قویور: اوفففففف سئویل… هله هااا … سن فاجعهنی بیلمیسن …
– منه دئدین باجیم کیمیسن … باشقا قادینی سئودین …دای منی گؤرموردون …مریض ده اولوردوم گلمیردین … آج دا قالیردیم گلمیردین … مدرسهنین قاباغیندا ال-آیاغیم دونوردو دا خبر اولموردو سننن … ناهاریمی شامیمی سنسیز یئییردیم … دای منه دووشانیم، جوجهم، جیققیلی قیزیم دئمیردین … من اوشاقلیغیمنان سنننایدیم … سن بیر لحظه ده منی تک قویموردون … دۆشدۆیومده سن الیمدن یاپیشیردین … آغلادیغیمدا گئنه سن وارایدین … نولدو بابک؟! … نولدو دهییشدین؟! … من نمنهدن خبرسیزم؟! … من نهیی بیلمیرم؟! …
– هئچ نه! سن ساده جه چالیشمادین منیم دردیمی بیلهسن.
الینی مننن چکدییین گۆن تاپبیلتینان ده‌یدیم یئره … –
اؤپور … گؤزلریمدن دوشن هر بیر داملانی اؤپور … گؤزلریمی … اللریمی … اوزومو … اؤپور … آمما من تکجه بیر شئیی دوشونورم: بابکین گؤزلری نییه بو قدر کدرلیدی؟!
موبایلی زنگ وورور. صفحهسینه باخیب آیاغا قالخیر؛ تئزبازار اوزومدن اؤپور. تلم-تلهسیک ساغوللاشیب قاپیدان چیخیر. ائله قاپیدان چیخدیغی آن داریخیرام زئیتونی گؤزلرینه … من قالیرام بیر ده بئینیمده یوز جوره سورغوایله. ان اؤنملیسی ده بودور: زنگ ووران کیشیایدی یوخسا قادین؟!
یئل ساچلاریمیزی هاوادا اوینادیب یونگولجهسینه اوزوموزه چیرپیر. دنیز دالغالانیر، لپهلهنیر، کؤپوکله‌نیر …
کاش بیلیردین منیم سسسیزلیییم سؤزدو …
باخیشلاریم سؤزدو …
گولوشلریم … گولوشلریم ده سؤزدو …
سؤزلریم ده سؤزدو …
بابکین آرخاسی منه ساری‌دیر. بیرآز ایرهلیده خیردا-خیردا دالغالار و آغ کؤپوکجوکلرله دولو دنیزه زیللنیب …
نئجه باشلامالییام …نئجه یاخینلاشمالییام اونا …بو سکوتو نه ته‌هر پوزمالییام … بابک سون گونلرین آجیلیغیندا دونوب قالیب … ائله او قدر سویوق … دونوق … سسسیز… نیفرت دولو …
آمما مندن اوزاق دورماغی سهلدیر بو کیشی او زئیتونی گؤزلریله منی اؤلدورسه ده یئنه سئویرم اونو.
– -منیم سئوینجیم تکجه بوایدی کی مدرسهدن گلم ایشدن گلهسن بوینووا ساریلام … هانسی گونوم سنسیز کئچمیشدی؟! هانسی یئمهییمی سنسیز یئمیشدیم؟! … . هانسی آلیش-وئریشیمه سنسیز گئتمیشدیم؟! … نییه اوزاقلاشدین؟! … نه دهییشدی بیردن؟ سن منیم هرنهییم ایدین …باجیم، قارداشیم، آنام، آتام …هر نهییم. بیر گونون ایچینده بولارین هامیسین مننن آلدین … سئوینجیمی آلدین … سن گئتدین من سینیق سینیق اولدوم … سن منی تک قویدون …من اوشاقایدیم … سنین یئرینی باشقاسینان دولدورماق ایستهدیم …منه حیرصلنمه … من بوغولورام … من اؤلورم … مین جوره سوال بئینیمی د‌لیر… بیلمیرم باشیما نه گلیر … بیلمک منیم حاققیمدی …
– سنین هئچ نهدن خبرین یوخدو. بیلمیسن منی یئییب تؤکن دردی. من بیلمیردیم مننن لج ائلئییب اره گئده‌جکسن …
باشینی بوللاییر: اؤزو ده او یاشدا … هله منیم اؤز بی‌بیم، آتان … گؤرموردولر، بیلمیردیلر نه قدر منه باغلیسان؟!! …
باشیمی قالدیریب سورغوایله دولو باخیشیمی اوزونه زیللهییرم. اونو یئییب تؤکن درد؟؟!! …
اوزومده هیجان دولو گولوشومله دیزلریمین اوستونده بابکه ساری ایمکلهییرم. یاخینلاشماغیمی حیس ائدیر …
چؤنوب گؤزلریمه زیللنیر. حیطده سارالمیش یارپاقلارین اوزرینده اوزانیب. باشیمی کؤکسونون اوستونه قویورام. داغینیق توکلریم کؤکسونه تؤکولور … سیغاللاییر ساچیمی …گؤزومو یوموب درین نفس آلیرام …قوجاغیندان قووولدوغومدان نئچه ایل کئچمیشدی؟ سون دفعه نه زامان ساچلاریمی تومارلامیشدی؟! …
– سنی سئویرم بابک …
اللری دونوب باشیمدا قالیر. اون‌دوققوز یاشیم وار. بیلیر بو سنی سئویرم فرقلیدی … دینمیر … باشیمی قالدیریب چنه‌می کؤکسونون اوستونه قویورام … باخیرام اوزونه …
چؤنوب بؤیرو اوسته اوزانیر …دیرسهیینی اییب باشینی قویور اوستونه… یارپاقلار خیشیلداییر … بارداشیمی قوروب تورونجو یارپاقلارا زیللنیرم. بارماغینی چنهمین آلتینا قویوب باشیمی قالدیریر:
– درسینی اوخو منیم جیققیلی قیزیم …
ائلچیمه هه دئدیم، اؤز-اؤزومه دئدیم ائشیدیب گلیب قویمییاجاق … امما …اوشاق-ایدیم … چوخ چوخ اوشاقایدیم … بابک نییه یورولمادی منیم ایش-لریمدن؟! …
چؤنوب بؤیروم اوسته اوزانیرام … گؤز یاشیم داملا-داملا آخیب بالینجیما هوپور … چیک … چیک …چیک …یاغیشین سسی اورهییمی ساکینلشدیریر … اؤزومو قوجاقلاییرام …صاباح باشقا بیر گوندور … آجی و یانلیش دولو گونلریمدن بیری …کئچمیشده بؤیوک بیر یانلیش سونراکی یانلیشلارا ندن اولدو …بو نئجه یانلیشدیر کی ال چکمیر مندن …دالیمجا گلیر … سورونه سورونه دالیمجا گلیر …
یئنه اللریمدن یاپیشیر … ایذین وئرمیر …
بو ائو ده یاشادیغیم شههر کیمی منی چؤله توپورمک ایستهییر …
– نهییندی؟ نییه منی سئومیسن؟ نییه ایستهمیسن منی؟
اوز-گؤزو قیپ-قیرمیزی اولوب: نییه بئبئله تلهسیسن؟
– سؤز تلهسمک دؤور … سن منیم جیسمیمدن روحومدان اؤزومدن اوزاق دورورسان … نئچه آیدی توی ائله‌میشیک جین دمیردن قاچان کیمی مننن قاچیسان … من اوشاغام؟! …گؤرمورم سنین دبریشییووی؟! … منی سئومیردینسه نییه ائولندین مننن؟! …نئچه ایل بوننان قاباق بیر جور منی گئری چئویریردین ایندی ده بی باشقا جور …
الیله آلنینی اؤوکه‌لهییر. بوغازیم دویونلهنیر؛ ساغ الیمله بوغازیمی تومارلاییرام: اوتانما …دئ … دئ گؤزووه گلمیرم … دئ او قدر رنگ به رنگ خانیملاردان اولموشام سن گؤزومه گلمیسن … دئ …
گؤزلری کللهسینه چیخیر. چیغیریر: بسدی … سئویل … سئویل … اوتااااان … گؤر نه قلط دارتیساااان …
باشیمی آشاغی سالیب بارماقلاریملا اویناییرام …
من قورخورام … هر آنیم اونون بیر گون بو قاپیدان چیخیب بیر داها دؤنمهمه‌یینین قورخوسو ایله کئچیر … گؤرهسن اوشاقلیغیم کیمی یئنه ندن‌سیز سئوهجک منی؟! …یئنه دوداقلاری گولهجک؟! … یئنه اؤز سایاغیلا یانلیشلاریما گؤز یوماجاق؟ … منه دولاشاجاق؟! … کئشکه بؤیوموردوک …من دؤرد یاشیمدا قالیردیم بابک ده اون اوچ یاشیندا.
اللریمدن یاپیشیر: سئویل … باخ منه …
– باخمییام …
– نییه؟ …
– گؤزلریننن قورخییام …
قاققیلداییب گولور …بورنومو توتوب چکیر …
– قییما منه …
گؤزلری دولور …

– ساری جوجهمین نهییدی؟
باشیمی سالمیشام آشاغی … اوزونه باخمیرام … اون ایکی یاشیم وار. یانیمدا اوتوروب منی قوجاغینا آلیر.
– ائشیتدیم توز-تورپاق سالیبسان …
دوداغیمی بوزورم: قویمورلار دوستلاریمنان پارکه گئدم …
اییلیب آلنیمدان اؤپور: اوووی … اوووی … اؤزوم آپارارام … مننن گئدیسن؟! …
قاشلاریمی گؤیه دارتیب گؤزومو قیییرام: سنین واختین وار یانی؟ … بیلدییمه گؤره باشین یامان شولوخدو …
قاققیلداییب گولور … یاناغیمی چیمدیکلهییر : یالانچی‌نین؟!! … اوننان دا سورا هامیسی سنین بیر تئلینه قوربان با …
نئچه یاشیمدان سونرا داها منه جوجهم دئمهدی؟
یولون قیراغیندا اوتوروب جوبا ساری اییلیرم. اورهییم بولانیر، باشیم گیجهلیر. نسرین نه دئمیشدی؟
– -بابک‌ین روحو خسته‌ایمیش … ائله اوناوچ یاشیننان … آتاسی اؤلننن سونرا دئپرئس اولور …هامیمیز بیلیریک نه قدر باغلیدیلار بیربیرینه … بابک سنه گؤره آیاقدا دورور … خاطیرلئییسان سئویل؟! … فقط سننن گولدو … فقط سننن دانیشدی … سنین هر ایشینی او گؤروردو … یادیندا سئویل؟ یئمه‌یینی بئله او یئدیردیردی … او اؤز آتاسی‌نین یوخلوغونو، بوشلوغونو سنه آتالیق ائدرک دولدورورموش … بیلمه‌دن آتاسینین رولونو سنه قارشی اوینئییرمیش … دایی‌نین بابک‌ه ائله‌دییی قایغینی، محبتی سنه ائلئییرمیش… سئویییل … آغلاما … الان آغلاماق واختی دؤور … بابک آرادان گئدیر … آغلاما قولاق آس … بؤیودوکجه سنین ده اؤزونون ده جینسی جاذیبهلریزی تانیییر … او سنی ایستئییرمیش … هم جیسمینی هم روحونو … سنی بوتون اولاراق ایستئییرمیش اما سنه یاخینلاشاندا آتالیق حیسی مانع اولورموش، ویجدان عذابی توتورموش … او سنی سئویر سئویل … امما سنه توخوناندا بیلمه‌دن حیس ائلئییر کی ائله دوزدن ده قیزیسان، ائله بیلیر کی اؤز قیزینا تجاوز ائلئییر … او ایللردی دوکتورا گئدیر …