دانیشیز!
مسعود اسلامی
دانیشیز سؤزسؤزو گتیرسین
سیز، بیزی!
دیلینیز آچیلسین بولبول بوغازیندان
دردلرینیز چیچک‌لنسین قلمینیزده
دانیشا بیلسز آغزینیز آجیلاشماز بیرداها
شیپ- شیرین نار کیمی‌دیر
قیپ- قیرمیزی یئتیشمیش
آغزینیزین سویو آخینجا
آخار سویو بو نارین؛
یئره دوشرسه ده ازیلمز سئوگی
گیزله‌درسه ده قارا بولودلار،
سؤندوره بیلمزلر آلاوینی، گونشین
آمما؛
آدی گلرسه قان قوسار قانوولار!؟
دونیا بویو یاشایار فیکیرسل سئوگی
یازیلمامیش کتاب‌لارین صحیفه‌لرینده
سیزده سئویندییینیزه قورخارسیز گاهدان
فیکیرین اینجه‌لییینی یاشاتسین دئیه
یاشادار تبریز گونجل یارالارینی
یاشادار تانیمادیغیمیز دره‌لر
کامیون- کامیون آرزیلاریمیزی
شاعیرده قورخمازدان یاشادار آدینی
دوشونجه‌سینین ایچ قاتلاریندا
یاشادار شکیلینی
خیالینین گؤرونمز بور- بوجاق‌لاریندا
من ایسه
آدینی بورا گتیریم دئیه، هاردا اولدوغونو تاپا بیلمه‌دیم
آدین دیلیمدن زویروشوب یئره دوشموشدور
یئر دئدییین توپراق‌دیر
توپراق، اسیر گئتمیش وطن …
وطن؛ آدینا یازیلمیش قان بویالی سئوگی‌‌دیر
یولونو یوخونلات یورولموشام آدسیزلیقدان…
آدین اورییمدن قان آخیر
خییاوانلار قان قوخویور
و آدین، دان سؤکولمه‌دن
بئینیمی سؤکور
آدین
آد
آ
…!؟
