دونیا منیم ایدی
حسین واحدى
یای اولونجا محله اوشاقلاری‌لا یورولماق بیلمه‌دن، یئددی داش، پیلله-دسته، شوبه-شوبه، زو- زو و … اویونلارین اوینایاردیق. او اویونلارین یانیندا اَن چوخ سئودیییمیز اویون «دیغیل دوو» ایدی. آسفالتا حسرت قالان کوچه‌میزده یئددی-سگگیز ائو وار ایدی. اون یولداش ایدیک و اونوموزون دا دیغیل دووو وار ایدی. یولداشلاریمین ایچینده بایرام ایله هامیدان چوخ صمیمی ایدیم. آتا-آنالاریمیز قویسایدیلار گئجه‌نی ده کوچه‌ده دیغیل دوولاریمیزلا اوینایاردیق. دیغیل دوو بیزه تکجه چرخین بیر تکری دئییل‌دی؛ او، بیزیم دونیامیز ایدی.
گون‌لرین بیرینده، یئنه دیغیل دوو یاریشی قویموشدوق. مسابقه گونو، اورک‌لریمیز سینه‌میزدن ائشییه آتیلماق ایسته‌ییردی، ائله دؤیونوردو کی آز قالیردی سینه‌میز پارتلاسین. هامی بیر الی‌له دیغیل دووونو بیر الی‌له ده دیغیل دوو دولاندیران آغاجینی ساخلامیشدی. یوسوفون فیت چالاماسی‌لا هئچ نه‌یی گؤرموردوک. بیز ایدیک و دیغیل دوولاریمیز و قاباغیمیزا قاتدیغیمیز یول. هردن بیریمیز قاباغا کئچیردیک، گاهدان دا ائله بیر-بیریمیزه سورتولوردوک کی، آز قالیردی باشی اوسته یئره گلیب مسابقه‌دن دالی قالاق. آنجاق مسابقه‌دن چیخماغی هئچ بیریمیز تصور بئله ائده بیلمیردیک. بونو مسابقه باشلاناندا گؤزلریمیزدن ده اوخوماق اولاردی. آرتیق سون ۱۰ مئتیره یاخینلاشیردیق. من، بایرام بیر ده قولو بیرینجی اولماغا گئدیردیک. بیر ده گؤزومو اونلارا ساری بورانا اونلار منی کئچدیلر، قاباغیما باخانا بایرام اول اولدو. سونرا دالدا قالانلار یئتیشدی و هامی یئره سره‌لندی.
هوشوموز باشیمیزا گلندن سونرا، مسابقه‌دن قاباق ییغدیغیمیز پول‌لارلا، بایراما کئیک-کانادار (نوشابه) آلدیق. او آستا-آستا کئیکی موشامباسیندان چیخارتدی و کاناداری قورتوم-قورتوم اون‌سککیز گؤزون حسرت‌دولو باخیش‌لاری آلتیندا باشینا چکدی.
اوست-باشیمیز بوتون توز-تورپاق اولوب آلنیمیزدان تر سوزوردو. آنجاق، دیغیل دوو سورمک‌دن دویمایاراق یئنه اویناماقدان ال چکه بیلمه‌ییردیک. یئنه و یئنه و یئنه اوینادیق. گون باتیب، آی گلمیشدی. اوزاقدان بیر کیشی بیزه ساری گلیردی. بیزه یاخینلاشاندا آتام‌دیر گؤردوم. گؤزلری باشینا دیرماشمیشدی. ال-قولون اؤلچه-اؤلچه بیزه یاخینلاشیردی. بیزه یئتیشیب: «ائششه‌یین بالاسی بیلیرسن ساعات نئچه‌دی؟ نه زامان او خارابانا گله‌جک‌سن؟ گل جهنم اول گؤروم!» دئییب، بیردن‌بیره قولاغیمین دیبین قیزارتدی. سونرا دا، قولومدان یاپیشیب سوروتله‌یه-سوروتله‌یه، ائوه سارى آپاردی. بیر الیم ایله دیغیل دووومدان یاپیشیمشدیم. یاری یولدا، آتام دئیینرکن، بیر منه باخدی، بیر ده دیغیل دووا. بو باخماق منه داها چوخ اضطراب وئردی. اولمایا؟! مین بیر فیکیر-خیال بیر آن‌دا ذهنیمدن کئچدی. منیم فیکیرلشمه‌ییمه آمان وئرمه‌ین آتام، دیغیل دووو الیمدن آلدی و گوجو وارکن اوزاقلارا تولازلادی. روحوم بدنیمدن آیریلدی ساندیم. باغیریم قان اولدو. دونیا باشیما فیرلاندی، آما قورخودان هئچ نه دئیه بیلمه‌دیم. ائوه کیمی گؤز یاشلاریم سئله دؤندو.
ائوده، شام یئمه‌میش اوتاق‌دا حبس ائتدیم اؤزومو. مین بیر غم-غصه ایله گئجه‌نی گوندوزه باغلادیم. سحرچاغی آتام ایشه گئدن‌دن سونرا، اوینادیغیمیز یئره گئدیب، هر یئری آختاردیم، آنجاق دیغیل دوومو سو اولوب یئره گیرمیشدی. کور-پئشمان، ائوه سارى قاییتدیم. یولدا، اوشاقلار اویناماق اوچون منی ده چاغیردیلار. جاواب‌لارین وئره بیلمه‌دیم. دیل-دوداغیم قوروموشدو و آرتیق بیر اؤلویه دؤنموشدوم. دیلیم ده باغلانمیشدی. اوره‌ییم ائله دولموشدو کی.
ائوده، آنام نه قدر دیله توتسا دا، بیر کلمه بئله دانیشمادیم. اوتاغا گئدیب، دیزلریمى قوجاقلاییب، سس‌سیزجه آغلامایا باشلادیم. اورییم پارتلاماق ایسته‌ییرى. بیلمیردیم نه ائدم. او گوندن، گئجه- گوندوزوم ال‌دن گئتمیشدی. دونیا‌دا یاشاماق ایسته‌مه‌ییردیم، نه دانیشماق، نه اویناماق، نه یئمک نه ده یاشاماق.
ایکی گون بئله‌جه ساووشوب بیتدی. اوچونجو گون، آنام یئنه ده اوتاغیما گلدی. یان-یانا قوشدوغو محبت‌لی جمله‌لرله منی دیله توتماق، اوووندورماق ایسته‌ییردی یئنه ده. نئچه دقیقه آنامی دینله‌یندن سونرا بیردن-بیره بوغازیم دئشیلدی و سس‌سیزجه باغیردیغیم سؤزلر یاش اولوب گؤزلریمدن آخماغا باشلادی. آنام باغرینا باسدی و هئچ زاد دئمه‌دن خئیلاق آغلاشدیق.
بیر نئچه دقیقه‌دن سونرا، اوره‌ییم بوشالدی و دیله گلدیم: «آنا، دیغیل دوووم! من دیغیل دووومو ایستیرم.» -دئدیم. آنام باشیمی تومارلادی، «اولسون اوغلوم، نییه داریخیسان؟ بیر دنه آیریسینی تاپاریق دا…»-دئیه، اوره‌ییمی یوموشالتمایا چالیشدی.
آرتیق، اون گون ایدی دیغیل دووومو ایتیرمیشدیم. بو اون گونون ایچینده دفعه‌لرله، یولداشلاریم، قاپیمیزا گلسه‌لر بئله، گئدیب اویناماغا کؤنول وئره بیلمیردیم.
او دهشتلی گوندن اون بیرینجی گون کئچمیشدی و اوره‌ییم چوخ داریخیردی. گون اورتا ایدى. حه‌یه‌ط‌ده اوتوروب جوجه‌لریمه دن وئریردیم. بیردن قاپینین ایشگیلی آچیلدی. آتام ایچری‌یه کئچدی. آیاغا قالخیب سالام وئردیم. منه ساری گلیب دئدی:
- یولداشلارین چاغیریر!
قاپی‌یا ساری گئتدیم. قاپینی آچان همن، دوققوز نفر یان-یانا دوزولموش دوستومو گؤردوم. اؤن‌لرینده ده بیر دیغیل دوو وار ایدی. آتام ائشییه چیخدی: گؤتور او دا سنین دیغیل دووون! دئدی و گؤزلرین منه تیکدی. های-کوی و یاشاسین سسی گؤیه قالخدی. مات قالمیشدیم. اینانا بیلمیردیم. بایرام دیغیل دووو گؤتوروب منه ساری اوزاتدی.
آتام: «گون باتمامیش گلین ها!» دئدی و قاپینی اؤرتدو.
هامیمیز بیردن، مسابقه مئیدانینا ساری قاچدیق، مین بیر عشق ایله. آرخامیزجا دومان قالخمیشدی. آرتیق دونیا منیم ایدی. یاشاماغی یئنی‌دن دوشونوردوم. هر کس اؤز دیغیل دووونو دیغیللادیردی. هئچ بیلمه‌دیک نه زامان مئیدانا یئتیشدیک. خط‌لری چکدیک. باشلانیش و سون نقطه‌سینی بللی ائتدیک و مسابقه‌نین باشلاماسینی گؤزله‌دیک.
او گون، اون دفعه دالبادال مسابقه وئردیک. هاوا چوخدان ایدی قارالمیشدی و بیز هله ده اویناییردیق.
