شانس‌سیز اوغرو

گئجه‌نین لاپ او شیرین یوخو گلن زامانی، دووارین یاپیشیغینداکی آغاجدان دیرماشیب ائوین حیطینه آتیلدی. سینه-سینه ائوه ساری گئدیب، الین یاپیشاجاغا آتیب قاپینین آچیق اولدوغونو گؤروب، سئویندی!

ایچه‌ری گیرنده، بیر کیشی‌نین اوتاقدا یوخودا اولدوغونو گؤردو. آی‌ین ایچه‌ری‌یه دوشن ایشیغیندا ائوی آلت-اوست ائتدی، آما آپارماق اوچون درده ده‌ین بیر زاد تاپا بیلمه‌دی. اومودو پوزولوب قاچماق ایسته‌دیگی آن، ائو ییه‌سی یوخولو-یوخولو، “آی باشی داشلی اوغرو گون ایشیغیندا من بو ائوده بیرزاد تاپا بیلمیرم، سن، آی ایشیغیندا تاپماق ایسته‌ییرسن؟” دئییب، یورقانی تپه‌سینه چکدی!

گونش ایله گونه‌باخان

ساری ساچلی گونش، گؤیه دیرماشمیش داغلارین آرخاسیندا، خوروزون بانلاماسینی گؤزله‌ییردی. آخشامدان، بوغدا تارلاسیندا اولان یالنیز گونه‌باخان ایسه قارا دنه‌لرینی گونشین باتان یئرینه توتوب، گونشی گؤرمک اومیدی ایله یوخلامیشدی.

بیر آزدان، خوروز، سسی‌نی باشینا آتدی. کند ائولرینین چیراق‌لاری بیر-بیر ایشیقلاندی. گونش گؤزله‌دییی آنی گؤرونجه دوغماغا باشلادی. گونه‌باخان، سئوینجک اولوب، اویاندی. سئودییی گونشی بیرداها گؤره بیله‌جه‌یینه چیچه‌یی چارتلادی…

آرتیق، گونش گؤی اوزونده، هر یانی باخیشی آلتینا آلمیشدی. گونه‌باخان، گونش بونون اوچون گلیب‌دیر دئیه، اوزون اوندان چئویرمیردی. او، اوچوب گونشین یانینا گئتمک آرزوسوندایدی.

یاواش-یاواش آخشام گلیب چاتیردی. گونش یئره سردییی ساچلارینی داراییب، هؤرمه‌یه باشلامیشدی. گونه‌باخان ایسه گونشین گئتمه‌سیندن اوزولوردو. او، بیلیردی بیر آزدان گونش باتی‌داکی اوجا داغین آرخاسینا گئدیب یوخ اولاجاق‌دیر…

گونش، گئتدی! آنجاق هئچ بیلمه‌دی گونه‌باخان‌نین آدی‌دا اونون آدیندان آلینیب‌دیر. او هئچ بیلمه‌دی، گونه‌باخان بوتون یاشاییشیندا اونون سئوگی‌سی ایله یاشادی!

قورخولوق

آخشام اوستو کئچن گونلره تای، قارغالار، اوزوم باغینا هجوم چکدیلر. کئفلری چکینجه اوزوم یئییب باغی کورلادیلار.

قورخولوق آنلاملی سس‌سیزلیک له، باغین اورتاسیندا اونلارا باخیردی. الیندن بیر ایش گلمیردی، او ساده‌جه اؤز گله‌جه‌یینی دوشونوردو! دونن آخشام، باغ ییه‌سی، باغدان آیریلاندا، «صاباح‌دا گلیب گؤرسم قارغالار، باغی کورلاییب، قورخولوغو یئریندن چیخاردیب، یاندیرجایام» دئمیشدی!

بونلاری دوشونه‌رک، قورخولوغون اوره‌یی دولوب، خیمیر-خیمیر آغلاماغا باشلادی!