دئیین او بالاجا قیزا:
داریخیر رسیم دفترین.
گل سینه‌سین سن ناخیشلا،
نئجولدو بالاجا الین؟!
گتیر بویا قلم‌لرین
گونش گولسون رسیمینده!
او بالاجا دودکش یئنه
توستو وئرسین ترسیمینده.
چکدیگین خیرداراق ائوین
یانیلی اولسون چیراغی.
آداملاری گول‌لر کیمی
گولوشسونلر سحر چاغی.
او شن ائوین باغچاسیندا
بوللو- سوللو گول چیچک چک!
گول‌لرینین ده اوستونده
رنگلی- رنگلی کپه‌نک چک!
ماوی اولسون ائوین گؤیو،
ایچینده پامبیق بولودلار.
گولوم! گله‌جک صاباحلار
سنی اؤپر، سنی قوتلار.
بو سؤزلری دانیشدیقجا
آلیشیردی، کؤوره‌لیردی.
یازیق دفتر، یالقیز دفتر
خیسین- خیسین یاش الیردی:
اینانمیرام دئدیلر کی،
ائویزی طوفان قوپاردی.
اینانمیرام دئدیلر کی،
الینی کولک آپاردی.
سوتول رؤیانی اینانمام
قارا داشلارا یازیلدی.
اینانمیرام، یوخ نازلیجام
آرزونا قبیر قازیلدی.
لای – لای یارالی بنؤوشه‌م،
لای – لای سوزولن اولدوزوم!
لای – لای آرزولاری ایتَن،
لای – لای شیرین دیللی قیزیم!
