“سن منیم اؤزومسن”
ائلدار موغانلی
-“اؤزوندن موغایات اول!”- دئدین؛
سوزولدو پنجره‌مدن-
یاغیشلی گونلرین سوسغونلوغو؛
سریلدی سینه‌مه-
فاطما ننه‌نین توخودوغو.
پنجره‌م آیازلیغا قوووشدو؛
کؤورک باختیما بنوؤشه دوشدو؛
“بنؤوشه بنده دوشدو”…
-“اؤزوندن موغایات اول!”- دئدین؛
اوچوش جیزگی‌لرینی اوخشادی دؤیونتولریم،
دان یئری‌نین یاناقلارینی اؤپدو سحریم؛
دورنالارین اوچوشونا سپدیم “قیزیل آلما” توخومو،
عطرینه بویادیم واریمی، یوخومو؛
ایندی
دؤرد اللی قورویورام-
بنده دوشن بنؤوشه‌نی،
و اؤزوم اولان سنی.
آذر ۹۳- موغان
6 پاسخ
سایین ائلدار موعللیم، شئعرینین گؤزللییی منی دؤنه -دؤنه اؤز ایچینه آپاردی. شئعرین ده اؤزون کیمی قوناق سئور ایمیش. شئعرینین ائوینده ائله قوناقلاندیم کی، اؤز ائویم کیمی چیخماغیم گلمیردی. اؤزومده یاشادیردیم، اؤزوم اولان سنلرین آردیجیلیغینی، بنده دوشن بنؤوشه لرین خومار باخیشلاریندا.
حؤرمتلی ائلدار بئی شئعیرینیزی اوخودوغومدا موتلولوق دویدوم. اونا گؤره کی، چوخ اورییمه ایلشدی. چوخ سئودیم. تانری سیزی قوروسون.
منده چوخ سئودیم . اوزون مدت ایدی کی بو تیپ سئوگی شعیری اوخوموردوم. بو بیزیم قاباقچیل شعیریمیزده، میللی نوستالوژیمیزی ده اؤزونده عکس ائتدیرن اوغورلو بیر اؤرنک دیر. ایستردیم گنجلیک ایللریمده یازدیغم بیر شعریمی ائلدار موعللیمه سونماقلا ، دویغو و موناسیبتیمی بیلدیرمیش اولام. (تهران – ائل اوغلو )
سنسیز بیر انسانام اوره‌گی ایتمیش،
گل باری بیر لیکده آختاراق منی.
سنین تئللرینه کونلوم ایلیشمیش،
گل باری زنجیرده قورتاراق منی.
نه سن موغایت اول نه من گوز- قولاق،
هایانا گئدریسه گئدسین اوزوموز.
آخی بیر بیرینی تاپاندان سونرا،
یئنه اؤزوموز ایتریریک بیز.
ایتیب کئده جکدیر خیاللار کیمی،
عؤمور یوللاریندا ناله ده ، سیزدا.
گل ایچک سسینی اؤتن قوشلارین،
باهار چیچکلنسین بوغازیمیزدا …. ( ائل اوغلو )
یاشاسین ائلدار موعللیم عشق اولسون سنه.
دؤرد اللی قورویورام
بنده دوشن بنووشه نی
منیم ده بختیمه بنؤوشه دوشدو
بنؤوشه بنده دوشدو
اوره‌یینیزه ساغلیق
چوخ تشکرلر حؤرمتلی ائلدار بی نه قده ر بو شعر گؤزلدیر چوخ سئودیم اوره یینیزه ساغلیق