دوشونجه کاسیبلیغی شعرلریمیزده
سحرخیاوی

بو گونلر، گونئی آذربایجاندا ادبی توپلوم نثر قونوسوندا کاسیب اولسادا، شوکورلر بوللو-سوللو شعری، شاعری وار. بو شعرلر اولسون کی چئشیدلی کاناللاردان، قوروپلاردان یا خود شاعرلرین اؤزل کاناللاریندان یاییلیر. من بو شعرلری اوخودوقجا، بو شعرلرین چوخوندا «دوشونجه کاسیبلیغینی»دویموشام. یانی بو شعر آدلانان یازیلارین چوخو مفکوره‌سیز‌دیر. بو محدود وطن و چوخلوق سئوگی قونودا یازیلان شعرلر، تیکرار سؤزلر، بعضن شعریتی اولمایان صیرف نظم‌لر نه دئمک ایسته‌ییرلر مخاطبه؟! فیکره سالا بیلیرمی مخاطبی؟! اونو آیدین بیر گله‌جه‌یه حاضیرلاییرمی؟! مگر ادبیات هئچ اولماسا یاخشیلیقلاری اینسان اوغلونا خاطیرلاتماق و اونو یاخشی بیر یاشام یئر اوزونده یاراتماغا فیکرینه سالان دئییلمی؟!
سیزجه واختی اولماییب حتا وطن و سئوگی یا خود آنا قونولارینادا باشقا بیر آچیدان باخاق؟ باشقا و یئنی سوزلریله اونلاری توصیف ائده‌ک؟
سیزجه گونئی آذربایجاندا بو قدر شاعردن نئچه شاعرین اؤزونه مخصوص امضاسی و شعر دیلی وار؟! نئچه شاعرین آدینی شعرینین آلتیندا گؤرمه‌میش دئیه بیلریک بو شعر فلان شاعردن‌دیر؟! هامیسی بیربیرینه اوخشار، چئینه‌نیب چوروموش سؤزلر نه آنلاتیر بیزه؟!
گلین اؤزوموزو آلداتمایاق. زامان-زامان یاشایان و پارلاقلیغلارینی زامان توزو بورومه‌ین شاعرلر و یازارلار اونلار اولوبلار کی اؤزلرینه مخصوص دیل‌لری، سبک‌لری و یارادیجیقلاری اولوب. اؤزگه‌لری ناشی-ناشی یامسیلایان یا خود اؤزونه سبکی امضاسی اولمایان شاعر-یازار اؤزوده یازیسی یا شعریله‌ بیرگه یا خود اؤلوموندن قاباق اؤلمه‌لیدیر.
یازار-شاعر بوتون دورانلاردا یاشاماق و قالارقی اولماق اوچون گرکدیر:
۱- یازیلاری دونیا باخیشلی اولسون. یانی رنگ، نژاد، دیل و….دن فارغ بوتون اینسانلار اوچون یازیلسین و بوتون اینسانلارین دغدغه‌لری اونلاردا دئییلسین.
۲- یازی-شعرلر درین دوشونجه اساسدا یازیلسین. یانی درین بیر فیکیره آرخالانسین و اینسانلاری یاخشی دونیا یاراتماغا فیکره سالسین.
۳- اسکی قونولارادا یئنی آچیدان باخیلسین.
۴- بو قدر آغزیمیزی هاوایا آچیب یازماق یئرینه و تیکرار-تیکرار سؤزلری پایلاشماق یئرینه بیرآز دیل قفسه قویوب، آرتیق آذربایجان، ایران و دونیا ادبیاتینی مطالعه ائله‌ییب سوکوتو تمرین ائدک. باشقا عبارتله اون اوخویوب، بیر یازاق.
۵- شعریله بیرگه نثره ده چالیشاق. نثریمیز گونئی آذربایجاندا چوخ جانسیزدیر.
بو توصیه‌لری اؤنجه اؤزوم اوچون، سونرا باشقا قلمداشلارا اونری وئریرم. حؤرمتله