آذرین ییرمی بیری
ح. هریزلی

سئوینیم،دویونوم‌مو؟
گولوم مو،آغلاییم‌می؟
یاس گونوم،توی گونوم‌مو؟
آذرین ییرمی بیری.
میللتلشمه گونومدور،
دؤلتلشمه گونومدور.
آزادلیغی تامسینان
عدالتی تامسینان،
اومود،گومان گونومدور،
آذربایجان گونومدور،
اؤز دیلیمده اوخویوب،یازدیغیم گوندور بوگون؛
آذرین ییرمی بیری.
بوگون سوی قیریم گونو،
بیر میللت باسیلان گون؛
جومردلر، ار ایگیدلر-
گولله‌یه باغلانان گون،
مینلر آنا- باجی‌نین،
نه قده‌ر قیز گلینین،
سینه‌سی داغلانان گون.
اون مینللرجه گوناهسیز، ناحاقدان آسیلان گون،
قاچقینلارین گونودور،
سورگونلرین گونودور،
آذرین ییرمی بیری.
بیرمیللتین یاخاسی،
جللاد الینده قالان،
فاجعه، باسقین، تالان،
فاشیست‌لرین قان تؤکوب،
قان ایچیب نشعه اولان؛
یاندیریلان کیتابلار دیلیمین یانان گونو،
آذرین ییرمی بیری.
یولدان یئتیشدین یئنه،
بیلمیرم بایرامیم‌سان،
یوخسا یاسیم‌می‌دیرسان؟
گولوم‌مو، آغلاییم‌می؟!
نه آد وئریم من سنه؟
آذرین ییرمی بیری.

۱۳۹۸/۹/۲۰ هریس

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4