دئپرم
سحر خیاوی

فای آچیب اوره‌ییم الینسیز یئنه
دئپرمه دوشه‌جک اوچاجاق تاوان.
داریخیب اوره‌ییم «ورنکش» کیمی
هاواخت گله‌جکسن سئوگیلیم‌هاچان؟

سویوقدور تیتره‌ییر دامیم، دوواریم
پنجره‌م آغریییر، شوشه‌م جاغ با جاغ.
بولاغیم قورویوب،گوللریم سولوب
گؤزل گولشنیمه چکیلیب اوراغ.

غملی‌یم «رئیحانه» گولوشو کیمی
تؤرندی یئنی دن باشقا بیر ژکوند.
هایاندا داوینچی یئنی دن چکسین
او پارلاق‌ گؤزلرین،ساچلارین بلوند.

دیریلدی سارایین غصه‌سی یئنه
الیمدن «زهرا»نی دئپرم آپاردی.
اون یئددی آبان دا پاییز کؤنلومه
سنسیزلیک بیر داها طوفان قوپاردی.

خریطه‌ن یئربه یئر آغریییر وطن
هاراسین باغلیرام سوزولور قانی.
قیزمالی، ساییقلیر نه ائتملی‌یم؟
سینیق اوره‌یینین قیزین قوربانی.
فای:گسل