ekiz tayi
“اَکیز تایی”نین تورشمزه‌لری –
5
آز تویوق و دقیقه‌لری تره‌زی ایله اؤلچنلر

 منه گؤره زامان اَن اؤنملی مسئله‌لردن بیریسی‌دی. سحر یئریمدن قالخدیغیمدا گونومو نئجه باشلاییم، زامانیمدان نئجه فایدالانیم دئیه، اؤزومه برنامه تؤکرم. حتی آشپازخانام دا بئله برنامه‌سیز ایش گؤرمه‌رم. قاب- قاجاغی اول یومالییام، یوخسا یئمک پیشیرمه‌یی قاباغا سالمالییام، ائوین سیل- سوپورنه نئچه دقیقه واخت آییرمالییام، نئچه دقیقه تردمیل ده یئریییب، تر تؤکمه‌لییم، نئچه ساعات کیتاب اوخومالیام و…

بو گونه قده‌ر دوشونوردوم کی، مندن داها دقیق و زامانا دَیَر وئرن تاپیلماز. اما یانیلدیغیمی‌اعتراف ائتمه‌لییم.  بو گونلر ایللرین سوره‌سینده،  باتمان- باتمان الدن گئدن واختی دقیقه- دقیقه تره‌زی‌ایله اؤلچورلر. تره‌زی دئمک بلکه دوغرو اولمادی. دیجیتال تایمرله اؤلچورلر. دوغروسو بو قحط‌الرجال اؤلکه‌سینده، سکگیز سئچیلمیش رجالین آراسیندا واختی بئله گؤزل- گؤزل اؤلچوب- بیچمک هر آدامین ایشی دئییل. تحسین ائدیرم زامانی بئله عدل- عدالت‌له بؤلنلری.  اونا گؤره‌ دَیَرلی واختیمین بیر بؤلومونو ده 21 اینچ تلویزیونون اؤنونده ایله‌شیرم.  آغزیم آخیر وعده‌لره. آژ تویوق اولورام، یوخودا داری گؤرورم. اؤز- اؤزومه دئییرم اگر آنا دیلیمیز دیریلمه‌سه ده،  انشاالاه تعطیل اولموش آنا صنعتیمیز یئنی‌دن دیریله‌جک، بو گونلر گؤبلک کیمی‌یئردن قالخان پاساژلارین یئرینه کارخانالار تیکیله‌جک. سندیکالار قورولاجاق. هر ایشین اؤز صینفی اولاجاق. معلیم‌لر صینفی، پرستارلار صینفی، باشماقچی‌لار صینفی، فرشچی‌لر صینفی، ایشچی‌لر صینفی….یوووو یاخجیسی بودور کی ایشچی‌لر صینفیندن هئچ سؤز آچماییم. بیر نئچه دقیقه آژ تویوغون کاراکترینه گیرمه‌ییمه گؤره بهتان یاپیشدیرارلار. آللاها شوکور سکگیز رجالیمیز‌هامیسی صنعت سئور، علم سئور، کولتور سئور اینسانلاردیلار. تعطیل اولونموش درگی‌لر، روزنامه‌لر یئنی‌دن یایینلاناجاق. کیتابلاریمیزین تیراژی اون مین‌دن آرتیق اولاجاق. آژ تویوق، مین آرزو- هوس دوغماق‌دی دئمک.‌هامینین الیندن گلمز بئله بیر کاراکترین جیلدینه گیره‌سن. دئمیش‌لر دا “آرزو بر جوانان عیب نیست”.

زیللنمیشم تلویزیونا. دیجیتال تایمر عدل- عدالتین ثانیه- ثانیه اؤلچوب- بیچنده، اؤز- اؤزومه دئییرم کی نه اولاردی بیر تایمرده اؤلکه‌نین قدرت مرکزینده یاراشدیراردیلار. ملک، مال، مقام و… و… و…‌هامیسی عدالت‌له، عدل‌ایله  پایلاشیلاردی. سونرا اؤز- اؤزومه دئییرم کی:« اکیز تایی! آرتیق تاماهلیق ائله مه، بیر پارچا تاپدیغین چؤره‌یه شوکر ائله!  آغزین آخماسین پنیر، گیردکان، یومورتا وعده‌سینه! نفت، طمطراق‌لا گلدی سفره‌وین باشینا، اولان- قالان برکت سفره‌ندن قاچدی. هله قالسین کی  وعده وئردیکلری پنیر، گیردکان بیرده یومورتا اولسون!

91.3.17