خدي
فريبا وفي- چئويرن: ع. آغ‌گونئیلي

سؤز قورتاران دئیيلدي. تاخچاداكي گوزگونون دوشوب سينماسي دا های- كویو آزالتمادي. گوزگونون خيردالاريني یيغيشديرديلار. آرواد اولسایدي دئیه‌ردي: «جانين ساغ اولسون، قادا- بالا جانيندان گئتدي». كيشي یومروغو یاستيق كيمي شيشميش قيچينا تاپدادي. ایيليب، سس‌لره قولاق وئردي. بير اوشاق آغلایيردي. كيشي سئچه بيلمه‌دي، نوه‌سي افسانه‌دير، یوخسا پروانه.

«دئیيرم احسان پولونو، وئرك بير موستحقّه».

خليل چؤرك یئیه- یئیه دانيشيردي.

«خالقا نه دئیه‌ك؟»

بير نفر توتقون سس ايله اوزاق‌دا قرآن اوخویوردو. یئنه ده سس‌لر بير- بيرينه قاريشدي. كيشي الين فرشين اوستونه چكدي. هله، شامي قاباغيندا دئیيلدي. او، بئله بيلدي كي، آروادين باشي سوفره‌یه قاريشيب‌دير. آروادي، سوفره‌ده، ليوانين، قاشيق- چنگلين، چؤره‌یين چوخلوغونو سئوردي. سوفره باشيندا هئی اونون- بونون بویونو اوخشاردي. گونده یوز یول چؤركچي‌یه یول دؤیردي. اوشاق یاخين‌ليقدا ايدي. آرواد اولسایدي، اوشاغي اونون ديزلري‌نين اوستونده اوتورداردي.

او ايسه اوشاغين بارماق‌لاريني الينه آليب، باشي‌نين یومشاق توك‌لريندن اؤپردي. كيشي اليني سسه ساري اوزاتدي:

«گل گؤروم… اوخای».

«خليل، قویما اوشاق آتاني اينجيده‌ر».

خليل گئج- گئج اونلاري یوخلاردي. آرواد دئیير:

«نانجيبين بيري نانجيب، اوشاغيمي اليمدن آلدي».

– «اونون بوینونا یيخما، آغاجي اؤز ايچيندن قورد یئیه‌ر».

آرواد قبول ائتمير، هئچ واخت قبول ائتمزدي. دای بو گونلر آروادا دا گوجو چاتمير؛ ايت- پيشيك كيمي یولا گئديرلر. كيشي‌نين الي بوش قایيدير. اوشاق اوزاق‌لاشيب‌دير. خيردا گلني‌نين خيمير- خيمير گولوش‌لري اوجاليب.

«آتاجان، شاميندان ميغایات اول».

كيشي دویو دنه‌لريني بارماق‌لاري‌نين آراسيندا ازير. اونون الينه بير قاشيق وئريرلر. خوره‌یي چؤرك ايله تيكه‌له‌یيب یئمه‌یه اؤیره‌نيب‌دير.

«بير تيكه چؤره‎ك وئرين».

آرواد یاخين‌ليقدا اولسایدي او آغزيني آشماميشدان بيلردي. اليني اوزاتدي. الي، یومشاق بير شئیه دیدي، تئز اليني دالي‌یا چكدي. هنده‌وري شولوق ايدي. یانيندان چوخ آدام كئچيردي. بورنونا بير سرت ايی دولدو. بؤیوك نوه‌سي ايدي.

«آی بالا بير تيكه منه چؤره‎ك وئر».

«قاراسيني تاپماديم بونو گئیديم، آیيب‌ديرمي؟».

كيشي اؤز- اؤزونه فيکيرلشيردي کي، بو گئجه‌ني ده چؤره‎ك‌سيز كئچينسين. بوشقابي لپه ايله دولو ايدي.

«خدي… تكي بير قیله ات».

آرواد یاخين‌ليقدا اولسایدي دئیيردي:

«آخيردا سنين بو قارنين باشي‌نين بلاسي اولار».

سونرا دا بير نئچه قیله يومشاق اتي اونون بوشقابينا قویاردي. كيشي سسله‌دي:

«خدي!»

یوخ ايدي، او، یقين سوفره باشينداکي‎لارين قئیدينده‎دير کي، آز یئیه‎ن اولماسين، یا دا تورشو جليلين یاخين‌ليقدا اولسون و…

«نئچه آی‌دي، جليل آیاغيني بو ائوه باسمایيب‌دير؟».

«نه ائله‌سين باشي قاريشيق‌دير».

كيشي طعنه‌لي- طعنه‌لي دانيشير:

«منصوره كفگيرله، مالاغالاري آپاردي؟».

«یقين لازيمي ايميش».

«هئچ گؤر بير قورو الين آغريماسين دئدي؟!».

«سنين آجي ديلين هاميني بو ائودن قاچاق ساليب‌دير».

بير قوجانين سسي ائشيديلدي:

«هامي‌ميز گئتمه‌لي‌یيك».

بير گون گئتميشدي. گوندوزو گئجه‌یه قاتاراق اویاق قاليب كوچه‌ده‌كي سس‌لره قولاق آسميشدي. یاديندان چيخميشدي گئجه ايدي یوخسا گوندوز، آیاغي‌نين سسيني ائشيتميشدي. سونرا دا قایناناسي‌نين سسيني.

«مشدي، آخي اينصاف دئیيل».

سفئه قارداشي دئميشدي:

«یوخ، یوخ اينصاف دئیيل».

و او خديجه‌نين ايیيني آلميشدير:

«بوتون بدنيم شوشه خيرداسيیلا دولودور، دور بو ائوي سوپور».

اوره‌یينده آند ايچميشدي دای بوندان سونرا نه شوشه سينديرسين نه ده خديجه‌نين اوره‌یين. او خديجه‌نين اوره‌یيني اله آلمالي ايدي. ال‌لريني فرشين اوستونه چكه- چكه خديجه‌نين نفس‌لري‌نين سسي گلن یئره ساري ايمك‌له‌یيب ال‌لريني خديجه‌نين ديزلري‌نين اوستونه قویدو. خديجه ديزلريني قوجاق‌لایيب انگي‌نين آلتينا ديرک‎لميشدي. اونون گؤز یاشلاري یاناق‎لاريني یاشالتميشدي.

«حیط‌ده‌كي قيزيل گول‌لري سنين اوچون اكميشم. اونلارين عطيرلريني ائشيتسن هئچ واخت اوره‌یيندن گلمز گئده‌سن».

الي‌نين ايچين یوخاري قالديردي. «اليمه تيكان باتيب، كؤینه‌یيمين ده قولو جيريليب… باخ، اؤزوم تيكميشم. یاخشي تيكميشم، هه؟ گؤرورسن كي، سنه ده مؤحتاج دئیيلم…»

خديجه‌نين سسي اونو اوره‎ك‌دن سئوينديردي:

«هاچان آغ كؤینه‌یيوي آغ ساپي‌نان تيكه بيلسن اوندا ايتيليب گئده‌رم».

دویو قالدي بوغازيندا. ائو بئله شولوق اولماسایدي خديجه دئیه‌ردي كي، دویونو گرك ائله یومشاق بيشيره‌سن كي، بوغازدان راحات كئچه. سونرا دا كوسگونجه‌سينه دئیيردي ائله بير تيكه چؤره‎ك اونون قارنيني دویورار. آغير بدنيني دبرديب، قاپي‌نين ینوووندان  یاپيشيب آیاغا دوردو. وورنوخدو کي، یانا چكيليب، اونا یول وئرسينلر.

هالدا اوتوران‌ اوشاقلار هيرنا چكيب گولوردولر.

بؤیوك قيزي دئدي:

«هارا گئديرسن آتاجان!»

دوداق آلتي دئدي:

«مطبخه گئديرم».

دئمه‌دي خديجه‌ني آختارير، اؤز- اؤزونه دئدي:

«یقين كي، بو یاخين‌ليقدادير».

مطبخ دولو ايدي.

«بير زاد ايسته‌یيرسن آتاجان؟».

گلني ايدي.

«هئچ بير زاد».

گئري قایيتدي. ديواردان یاپيشا- یاپيشا صانديق‌خانایا ساري گئتدي. خديجه‌ني آختاراندا آخيردا گئديب اونو صانديق‌خانادان تاپاردي.

«خدي! دور گل ائشيیه».

قاپي‌نين آستاناسيندا اوتوردو.

«قولاق آس گؤر نه دئیيرم. اؤزومو گوزگوده گؤرورم، یامان چيركينم. مندن قاچماغا حاقلي‌سان. چوخ چيركينم، دوزدور؟».

صانديق‌خانادان گلن سس دئیير: «هه، چوخ، چوخ».

«هر نه دئیيرسن دي‌ء، قوی اوره‌یين بوشالسين».

«او كوفته‌یه اوخشار بورنووو گوزگوده گؤره بيلدين‌مي؟».

قوجا كيشي بارماقلاريني بورنونا سورته- سورته گولدو: «هه، هه».

«داز باشيوي دا گؤردون‌مو؟».

«هه».

قوجا كيشي اليني باشيندا گزديره‌رك ائهمالجا ائنديريب، یاپيشميش كيرپيك‌لري‌نين اوستونده ساخلادي.

«او، آجي ديليني نئجه؟»

كيشي اوجادان شاققا چكيب گولدو:

«هه، گؤردوم. آغزيمي یوموب لال اولارام، سن گل ائشيیه من لال اولارام».

جليل دئدي:

«آتاجان، بير زاد ايسته‌یيرسن؟».

كيشي‌نين دوداقلاري گولوشه ایيلدي. قاپي‌نين توتاجاغين بوردو. قاپي باغلي ايدي. یورولموشدو. اوتاغين آغير هاواسيندان بوغولوردو. اوشاقلار قاباغيندان قاچديلار. آیاغي قند قابينا دیدي. دایاندي.

«آتاجان، هله گئت. آی بالا قاچين گئدين گؤروم».

كيشي فيكيرلشدي:

«گؤره‌سن، بو آرواد هاردادير؟».

پيلله‌كانين سوراهي‌لريندن  توتوب آشاغي‌یا ائندي. سویوق بير گئجه ايدي. ائهمالجا سسله‌دي:

«خدي!».

ائودن، های- كوی سسي گليردي. كيشي سویوق‌دان اسيردي. پيلله‌كانين اوستونده اوتوردو.

«خدي جان… آی خديجه هارداسان؟».

بوینونو ایيب قولاق وئردي. یارپاقلارين سسي گليردي. هاوایا بير یانيق ايی یایيلميشدي. اوجا سسله چاغيردي:

«خدي جان!»

اوميدسيزليیين سویوق دامجي‌سي اوره‌یينه دامدي. گؤز یاشلاري یاپيشيق كيرپيك‌لري‌نين آراسيندان، سوزوب آخدي. ديزلرينه تاپدالایاراق هؤنكور- هؤنكور آغلادي.

«خدي جان… جانيم خدي».

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4