ماشین‌لار یوللانارکن، کیشی ماشینلارین قاباغیندان چکیلیب گئتدی خییاوانین قیراغیندا دایاندی. ماشین‌لارین ایقزوزوندان چیخان توٍستوٍ اونو اؤسکوٍرتدوٍ. بوش الینی، آغزینین قاباغیندا ترپه‌درک یول گؤستریجی چیراغا باخدی. قیرمیزی چیراق یانان کیمی ماشین‌لار دایاندیلار؛ تئز خییاوانین اورتاسینا گلیب الینده توتدوغو نرگیز گوٍللرینی یوخاری قالدیریب، ماشین‌لارین آراسیندا اویان-بویانا بورولارکن اوجادان سسلندی: «نرگیز، آی نرگیز گوٍلوٍ»
گوٍللری ائله یوخاری‌دا ساخلامیشدیرکی بلکه هر یئردن گوروٍنسوٍن. گوٍللر آغ آپپاغ و ائله‌جه‌ده طراوتلی ایدیلر. بویوٍک، قره بیر ماشینین یانیندا اوجادان سسلندی: «نرگیز گوٍلوٍدوٍر آغا، نرگیز»
رولون آرخاسیندا ایله‌شن کیشی‌یه باخارکن دئدی: «آغا گوٍل ایسته‌ییرسینیز؟»
کیشی ماشینین شوٍشه‌سینی یوخاری قالدیریب، دؤندوٍ یانیندا اوتوران آداملا صؤحبتینه داوام ائتدی. قارا ماشینین قاباغیندان اؤتوٍب، رولونون آرخاسیندا گنج بیر قادین اوتورموش خیردا بیر ماشینین یانینا گئتدی.
«خانیم نرگیز گوٍلوٍ ایسته‌میرسینیز؟»
قادین گوٍللره باخدی.
«گوٍللر تزه‌دیر خانیم»
گوٍللرین ایچیندن خیردا بیر دسته آییریب قادینا وئردی. قادین گوٍللری آلیب اییله‌دی.
«عطیرلی‌دی خانیم»
قادین گوٍله-گوٍله گوٍللری یانینداکی بوش صندلین اوٍستوٍنه قویدو.
«آهای نرگیز نه اوٍچوٍن گوٍلوٍرسن؟»
نرگیز، پیه‌ده یونجالارین اوٍزه‌رینده، دیزلری اوٍسته چؤکوب اینه‌یی ساغیردی.
– «عابباس سن سن؟»
– «هه»
نرگیز سوٍت دولچاسینی گؤتوٍروٍب گلدی قاپینین یانیندا دایاندی.
– «ائله بیل بوغازدیر»
– «دوٍز دئییرسن؟»
– «اهه بلی»
گوٍنش پارلاق شوٍعالاری ایله کندین اورتاسینداکی مئیدانلیغی اوخشاییردی. کیشی‌لر قافخانانین قاباغیندا چومبه‌لن ایله‌شمیشدیلر.
«یاز یارییا چاتیبدیر هله‌ده یاغیشدان خبر- ائتر یوخدور کالبای حئیدر. دئییرم ایر بئله گئتسه بو ایلده دئملریمیز یاناجاقدیر.»
کالبای حئیدر چوبوغونون کوٍلوٍنوٍ بوشالداراق گویه باخیب دئدی: «بلکه یاغدی…»
خیردا بیر قیز اونونلا اوٍز به اوٍز دایانیب گوزلرینی گوٍللره زیلله‌میشدیر. اونون باشینین توٍکلری قاپ-قارا شوه کیمی ایدیر.
«بو گوٍللردن بیرینی منه وئریرسن؟»
اونون قوجاغیندا خیرداجا بیر گلینجک وارایدی. سانکی قیزین قوجاغیندا گلینجک یوخلامیشدیر.
«کئچ گئت اویانا گوروٍم آ…»
قیزجیغاز ائله‌جه دایانیب گوٍللره باخیردی.
«آتا، آی آتا منیم اوٍچوٍن بیر گلینجک آلارسان؟»
روٍبابه دیزلرینی قوجاقلاییب ائیواندا اوتورموشدو.
کیشی گوٍللردن بیر بوتاسینی آییریب دئدی:
«آلا»
قیزجیغاز گوٍلوٍ آلیب گوٍلوٍمسه‌دی. ماشینلار دایاندیلار.
«نرگیز، آی نرگیز گوٍلوٍ»
ماشینلارین آراسیندا فیرلانیب اویان-بویانا گئدیردی.
«نرگیز گوٍلوٍ…»
گؤزلرینه گوٍنش گؤزلوٍیوٍ تاخمیش بیر کیشی ماشینی‌نین ایچیندن اونو چاغیردی:
«آهای گول ساتان»
«هه بلی»
«گوٍللری نئچه دئییرسن؟»
«قابیللی دئییل آغا، هر نئچه سئویرسینیز وئرین آغا»
کیشی جیبیندن پول آختاریردی.
«گوزل عطیری وار آغا»
یاشیل چیراق یاندی. ماشینلار یوللاندی. کیشی تله‌سیک جیبیندن بیر اوووج خیردا پول چیخاردیب، اونون آچیلمیش اووجونا توکدوٍ، گوٍللری آلیب یوللاندی. الینده، عطیری، تزه سنگک چوره‌یی توتموش بیر قادین اونلارین یانیندان اوتوٍب گئتدی. تزه چوره‌یین عطرینی دویان کیمی اوٍره‌یی آخدی. آریق قره بنیز، قوووق ساتان بیر اوغلان اونا ساری گلدی.
کیشی گویه یوٍکسه‌لیب، اویان-بویان یئلله‌نن سالخیما اوخشار آل-الوان قوووق‌لارا باخدی. نازیک بیر ایپین بیر باشی قوووق‌لارا دوٍیوٍنله‌نیب بیر باشی ایسه اوغلانین الینده ایدی. کیشی گوٍلدوٍ. «عمی ایش-گوٍج نئجه‌دیر؟» – دئیه اوغلان سوروشدو.
«آللاه روٍزوٍ وئرندیر»
«گوٍللره بیر آز سو سپ اولوٍشگه‌ییرلر» – اوغلان دئدی.
کیشی گوٍللره باخدی. اونلار گوٍنوٍن آلتیندا قالدیقلاریندان اوولکی طراوتلرینی ایتیرمیشدیلر.
«گرک قویمویاسان سولالار»
گویوٍن اوٍزوٍ دوم-دورو ایدی. لاپ اوزاق‌لاردا بولوت تیکه‌لری داغلارا کؤلگه سالمیشدیلار. اؤز-اؤزوٍنه فیکیرلشدی:
«ایر هاوا بئله گئتسه، بو ایلده دئملریمیز یانار»
اؤز-اؤزوٍنه دئدی:
«کاش یاغا.»
«نرگیز، بورا باخ گور نئجه یاغیر! ائله بیل آللاه بیزه بالام دئییب. گومان ائدیرم بو ایل حاصیلیمیز یاخشی اولار.»
یاغیش بوٍتوٍن اوٍستوٍ-باشینی ایسلاتمیشدیر. آنجاق او ائله‌جه‌ده یاغیشین آلتیندا دایانمیشدی.
«اوردا نییه دایانیبسان کیشی؟ سویوق دیر ها»
یاغیش ناریندان آنجاق چوخ ایتی یاغیردی. الینده‌کی بئلی یئره سانجیب، اللری سیلکه‌رک دئدی:
«ایر بو ایل حاصیلیمیز یاخشی اولسا، دای سیزین یانیزدا قاللام. شه‌هری هئچده سئومیرم شه‌هر آدامی دیغلادیر»
«اؤز-اؤزوٍنه نه دئییرسن؟» – دئیه اوغلان سوروشدو
«دئییرم کی کاش بو ایل دویونجا یاغیش یاغایدی»
«یاغیشی نئینیرسن؟»
«یاغیش آللاهین برکتی‌دیر»
«من ایسته‌میرم یاغیش یاغا»
«سن آللاهین برکتینی سئومیرسن؟»
«هانکی برکت؟ یاغیش یاغاندا بوٍتوٍن وار-یوخوموز سو آلیر»
«دئمه‌لی بس سن ایسته‌میرسن یاغیش یاغا؟»
«قوی جهننم اولسون یاغیشی. دینسیز یاغاندا، هامی گئدیب تپیلیر ائوینه بیزیمده ایش-گوٍجوٍموٍزوٍ کاساتلاییر. آللاه ائله‌سین همیشه گوٍن چیخسین.»
«کوٍفر-ناسازا دانیشما اوغلان! یاغیش یاغماسا اولار به‌یم؟ آللاهین ایشلرینین هئچ بیریسی حئساب-کیتابسیز دئییل. یاغیش یاغماسا هامی آجیندان اؤلر.»
«هئچ بئله یوٍز ایلده یاغماسین.»
کیشی دایاندیغی یئرده دبریلدی.
«ایر جوما گوٍنلری گوٍن چیخسا پارکدا قییامت اولار. اوندا منده قوووقلاریمین هامیسینی ساتارام، آنجاق آللاه گورستمه‌سین کی یاغیش یاغا…»
الینده‌کی ایپی بوشالدیب قوووقلاری هاوادا یئلله‌درکن سسله‌ندی
«قوووقدور…»
خییاوانین او طرفیندن بیر نفر قیزینان بیر گنج اوغلان گلدیلر.
قیز گوٍللری گورن کیمی دئدی:
«منیم اوٍچوٍن گوٍل آلمیرسان؟»
کیشی اونا ساری گئتدی.
«گوٍللریوین تازاسیندان بیر دسته وئر منه»
قیز دایانارکن قارا گوزلرینی گوٍللره زیلله‌میشدی. اونون باشیندا گوٍللوٍ، گوزل بیر یایلیق وارایدی. گوٍللری قیزا وئردی.
«نرگیز نه اولوبدور. نه اوٍچوٍن منه بئله باخیرسان؟»
نرگیز قارا گؤزلرینی اوندان آییریر، اییلیب پامادور سبدینی بوستاندان قالدیریب چیینینه قویدو.
«اوهوی نرگیز سنینله‌یم ها»
نرگیز گؤزوٍنوٍن آلتی ایلا اونا باخیب گوٍلدوٍ.
«منیم اوٍچوٍن قیرمیزی گوٍللوٍ بیر دون آلارسان…؟»
فیکیرلشدی:
«ایر شانسیمیز گتیرسه بو ایل دوٍز-عمللی بیر یاغیش یاغسا، اوندا اونادا گوٍللوٍ چیت بیر دون آلارام»
بیر دانا سیغار آلیشدیریب جوبون قیراغیندا اوتوردو. جوبونان آخان قارا لئهلی سو، پورتاقال و باشقا مئیوه‌لرین ازییی ایله دولو ایدی.
فیکیرلشدی:
«ایر بو سو بیزیم کندین یانیب واغامنامیش زمی‌لری‌نین یانیندان کئچسه‌یدی بوغدالار دیریله‌ردی…»
الینده‌کی گوٍللره باخدی. گوٍنشین آلتیندا یاواش-یاواش گوٍللر اولوٍشگه‌ییردیلر. برک بیر یئل اسه‌رک توز-تورپاغی گویه قالدیردی. داغلارا باخدی.
«ائله بیل یاغیر»
الینده‌کی سیغارا درین بیر قوللاب ووروب کئچدی خییاوانین او تایینا.
«نرگیز، آی نرگیز گوٍلوٍ»