نهایت گوجومله، اؤزومو اوزاندیغیم دایاز چوخورون دیبینه سیخیردیم. دیلیمله ـ دوداغیمین آراسیندا «وجعلنا» اوخویوردوم. ایشیقلاندیریجی مرمی‌لر دالبادال گؤده پاتلایاراق، چؤل ـ کؤوشنی ایشیقلاندیریردی. الله الله ائله‌ییردیم، «دوعا ـ ثنام» اووسانایا دوشه کی، کیمسه‌نین گؤزونه گؤرونمه‌ییم. بو، اوچونجو دفعه ایدی کی، بئله ایلیشییه دوشوردوم. هر اوچونون ده باعثی، بو آخماق و سفئه اوغلان اولموشدو. هردفعه کی، اصغرله حربی گزینتی‌یه چیخیردیم، اونون آخماق داورانیشی و سؤزه باخمامازلیغی دوشمانی شهلندیریدی. بو دفعه داها اونو باغیشلایا بیلمزدیم. حربی عملیاتا، اوچ ـ دؤرد گوندن آرتیق قالمامیشدی. اؤزـ اؤزومه دئییردیم: «اگر عملیاتین، گودازا گئتمه‌سینه باعث اولموش اولسا، اونو اؤزوم اؤلدوره‌رم.» بو دوشونجه‌ده ایدیم کی، بیردن اؤزونو سالدی چوخورون دیبینه. تؤوشه‌ییردی. یاخالایاراق مؤحکم اؤزومه ساری چکیب دئدیم: «گئده مه‌یر من سنه دئمه‌میشدیم کی، من گلنه‌جن یئریندن ترپنمه…. مثلا سن منیم دالیمدا دورانیمسان.» الینی بورنونون اوستونه قویاراق منی سوسماغا مجبور ائله‌دی. باشقا بیر ایشیقلاندیریجی مرمی‌ هاوانی ایشیقلاندیردی. آنجاق او، باشقا بیر استقامته گئتدی. آللاها شوکر ائتدیم. ایشیقلاندیریجی مرمی‌لر سؤنن کیمی: «اوزو قویلو اؤز خطیمیزه ساری گئدیریک»- دئیه، یولا دوشدوم. آنجاق اصغر تورپاقلارین ایچیندن نسه آختاریردی. تعجبله اونا باخدیم. نهایت آختاردیغینی تاپدی. دئدیم: «نه آختاریردین؟» دئدی: «پلاک،…عراقلی‌لاریندی، مجبور ایدیم. » و قویدو جیبینه. عملیاتین فاتیحه‌سینی اوخودوم…. اگر قاروولچونون جسدینی تاپسایدی‌لار، بوتون بند ـ بره گودازا گئتمیشینه ایدی. غضبله دئدیم : «آخماغین بیری آخماق، بیر آیلیق ایشیمیزی هئچه وئردین» گولومسه‌یرک دئدی: «جسدین تاپا بیلمزلر، آپاریب آتدیم چایا، اودورکی یوباندیم. آرخایین اولون». ائرته‌سی گون سحر تئزدن، بیرینجی ایشیم اصغری باشیمدان ائله‌دیییم ایدی. او کشفیات «گروهان»‌نی‌نین دردینه ده‌یمزدی. او منیم بو ایشیمدن چوخ اینجیمه‌دی. پیچاغینی بیر داشین قیراغینا سورته- سورته ایتیلده‌رک دئدی: «اگر بوردا قالسایدیم سیزه چوخ فایدام اولاردی جناب سروان». دئدیم : «فرقی یوخدو. چالیش کی، باشقا بیر یئرده فایدالی اولاسان.» آجی – آجی گولومسه‌دی. «دئمه‌لی فایدالی» سؤزو اونو اینجیتمیشدی…..
آلتی آی سونرا «سگگیزینجی والفجر » عملیاتی‌نین حربی گزینتیسینده، اونو دار بیر کئچیدده، قانینا بویانمیش گؤردوم. آیدین ایدی کی، ان آزی ایکی گوندور اوردا دوشوب قالیب، یاراسی ایرینله‌ییب… هله یاری‌جان ایدی. تانیدیم. دوداقلارینا درد ایفاده‌لی بیر تبسم اوتوراراق دئدی: «دونیا کیچیک دونیادی، بیرداها سیزی گؤردوم جناب سروان». دئدیم: «دانیشما، دانیشماق سنین اوچون زیاندیر. سنی بوردان آپارارام» الیمدن توتاراق، دبردمه‌ییمه مانع اولدو. دئدی: «منیم ایشیم بیتیبدی جناب سروان. بیلیرم کی فایداسیزدی. بو اوچومونجوگئجه‌دی کی دوشوب قالمیشام بوردا. اوننان اؤنجه ده، ایکی گئجه زحمت چکیب گلمیشم بورایا… منه ایکی سؤز وئرین کی… » دئدیم: «هر نسه، قبول ائدیرم.» دئدی: «بیرینجی بو کی، گروهانین کاماندارینا دئیین، «لر اصغر» قاشماییبدیر….، ایکینجیسی ایسه، خنده‌یین ایچینده منیم بیر صاندیقچام وار. زحمت اولماسا او صاندیقچانی، «گوطلا» آدلی بیر قادینا چاتدیراسیز. صاندیغی آپاراجاغیز عنوان دا، صاندیغین ایچینده‌دی… » الینی اوزالداراق، کیلیدی ایله «عراقلی‌نین» پلاکینی منه وئریب و پوله‌نیب سؤنن بیر شام تکین، هئچ بیرتکان و یا تاسف ائتمه‌دن، بیر آه چکمه کیمی، چوخ راحاتجاسینا قورتاردی…..
اوره ییم یاندی. «خط» ده قده‌ر چوخ یول ایدی. جسدینی آپارا بیلمزدیم. ائله اورداجا، بیر چوخوردا باسدیردیم. بیرعلامت اولسون دئیه، باش طرفینه قورو بیر آغاج تاختدیم. خنده‌یین ایچینده، صاندیغی آچدیم، ایچینده ۹۳ نومره‌لی «عراقلی‌نین» پلاکیندان و بیرآز دا پولدان سووایی هئچ بیر شئی یوخ ایدی…..
اوچ آیدان سونرا «گوطلا»‌نین امانتینی وئردیم. قادینین چوخ دا یاشی یوخ ایدی. آنجاق یاخشی بللی ایدی کی، اونون ائله ده یاخشی روزگاری اولماییبدیر. اونا دئدیم: «حاییف اولسون، او یاخشی بیر عسگر ایدی. یاخشی موباریز ایدی. شهید اولاندا مندن ایسته‌دی سیزه دئییم کی، وئردییی سؤزه عمل ائلییه بیلمه‌دی». گنج قادین چوخ اپریمیشدی. بتر آغلاییردی «لر»جا بیرزادلار دئییردی کی، من باشا دوشموردوم. دؤزه بیلمیردیم. حیطده ایکی یاشلی بیر اوغلان اوشاغی اویناییردی. باشینی سیغاللادیم. قادین آرخامجا گلدی. دئدیم «اونون اوغلودور؟!»… دئدی: «یوخ…. قویمادی اونو سالام، دئدی گوناهدی. من سنین قیصاصیوی اولاردان آلارام… » اصغرین رام اولمادیغی‌نین ندنلیینی و صاندیقداکی «۹۳ نومره‌لی پلاک»ین سیررینی تزه باشا دوشدوم.