سؤز قورتاران دئییلدی. تاخچاداکی گوزگونون دوشوب سینماسی دا های- کویو آزالتمادی. گوزگونون خیردالارینی ییغیشدیردیلار. آرواد اولسایدی دئیه‌ردی: «جانین ساغ اولسون، قادا- بالا جانیندان گئتدی». کیشی یومروغو یاستیق کیمی شیشمیش قیچینا تاپدادی. اییلیب، سس‌لره قولاق وئردی. بیر اوشاق آغلاییردی. کیشی سئچه بیلمه‌دی، نوه‌سی افسانه‌دیر، یوخسا پروانه.
«دئییرم احسان پولونو، وئرک بیر موستحقّه».
خلیل چؤرک یئیه- یئیه دانیشیردی.
«خالقا نه دئیه‌ک؟»
بیر نفر توتقون سس ایله اوزاق‌دا قرآن اوخویوردو. یئنه ده سس‌لر بیر- بیرینه قاریشدی. کیشی الین فرشین اوستونه چکدی. هله، شامی قاباغیندا دئییلدی. او، بئله بیلدی کی، آروادین باشی سوفره‌یه قاریشیب‌دیر. آروادی، سوفره‌ده، لیوانین، قاشیق- چنگلین، چؤره‌یین چوخلوغونو سئوردی. سوفره باشیندا هئی اونون- بونون بویونو اوخشاردی. گونده یوز یول چؤرکچی‌یه یول دؤیردی. اوشاق یاخین‌لیقدا ایدی. آرواد اولسایدی، اوشاغی اونون دیزلری‌نین اوستونده اوتورداردی.
او ایسه اوشاغین بارماقلارینی الینه آلیب، باشی‌نین یومشاق توک‌لریندن اؤپردی. کیشی الینی سسه ساری اوزاتدی:
«گل گؤروم… اوخای».
«خلیل، قویما اوشاق آتانی اینجیده‌ر».
خلیل گئج- گئج اونلاری یوخلاردی. آرواد دئییر:
«نانجیبین بیری نانجیب، اوشاغیمی الیمدن آلدی».
– «اونون بوینونا ییخما، آغاجی اؤز ایچیندن قورد یئیه‌ر».
آرواد قبول ائتمیر، هئچ واخت قبول ائتمزدی. دای بو گونلر آروادا دا گوجو چاتمیر؛ ایت- پیشیک کیمی یولا گئدیرلر. کیشی‌نین الی بوش قاییدیر. اوشاق اوزاق‌لاشیب‌دیر. خیردا گلنی‌نین خیمیر- خیمیر گولوش‌لری اوجالیب.
«آتاجان، شامیندان میغایات اول».
کیشی دویو دنه‌لرینی بارماق‌لاری‌نین آراسیندا ازیر. اونون الینه بیر قاشیق وئریرلر. خوره‌یی چؤرک ایله تیکه‌له‌ییب یئمه‌یه اؤیره‌نیب‌دیر.
«بیر تیکه چؤرهک وئرین».
آرواد یاخین‌لیقدا اولسایدی او آغزینی آشمامیشدان بیلردی. الینی اوزاتدی. الی، یومشاق بیر شئیه دیدی، تئز الینی دالی‌یا چکدی. هنده‌وری شولوق ایدی. یانیندان چوخ آدام کئچیردی. بورنونا بیر سرت ایی دولدو. بؤیوک نوه‌سی ایدی.
«آی بالا بیر تیکه منه چؤرهک وئر».
«قاراسینی تاپمادیم بونو گئیدیم، آییب‌دیرمی؟».
کیشی اؤز- اؤزونه فیکیرلشیردی کی، بو گئجه‌نی ده چؤرهکسیز کئچینسین. بوشقابی لپه ایله دولو ایدی.
«خدی… تکی بیر قیله ات».
آرواد یاخین‌لیقدا اولسایدی دئییردی:
«آخیردا سنین بو قارنین باشی‌نین بلاسی اولار».
سونرا دا بیر نئچه قیله یومشاق اتی اونون بوشقابینا قویاردی. کیشی سسله‌دی:
«خدی!»
یوخ ایدی، او، یقین سوفره باشینداکیلارین قئیدیندهدیر کی، آز یئیهن اولماسین، یا دا تورشو جلیلین یاخین‌لیقدا اولسون و…
«نئچه آی‌دی، جلیل آیاغینی بو ائوه باسماییب‌دیر؟».
«نه ائله‌سین باشی قاریشیق‌دیر».
کیشی طعنه‌لی- طعنه‌لی دانیشیر:
«منصوره کفگیرله، مالاغالاری آپاردی؟».
«یقین لازیمی ایمیش».
«هئچ گؤر بیر قورو الین آغریماسین دئدی؟!».
«سنین آجی دیلین هامینی بو ائودن قاچاق سالیب‌دیر».
بیر قوجانین سسی ائشیدیلدی:
«هامی‌میز گئتمه‌لی‌ییک».
بیر گون گئتمیشدی. گوندوزو گئجه‌یه قاتاراق اویاق قالیب کوچه‌ده‌کی سس‌لره قولاق آسمیشدی. یادیندان چیخمیشدی گئجه ایدی یوخسا گوندوز، آیاغی‌نین سسینی ائشیتمیشدی. سونرا دا قایناناسی‌نین سسینی.
«مشدی، آخی اینصاف دئییل».
سفئه قارداشی دئمیشدی:
«یوخ، یوخ اینصاف دئییل».
و او خدیجه‌نین اییینی آلمیشدیر:
«بوتون بدنیم شوشه خیرداسییلا دولودور، دور بو ائوی سوپور».
اوره‌یینده آند ایچمیشدی دای بوندان سونرا نه شوشه سیندیرسین نه ده خدیجه‌نین اوره‌یین. او خدیجه‌نین اوره‌یینی اله آلمالی ایدی. ال‌لرینی فرشین اوستونه چکه- چکه خدیجه‌نین نفس‌لری‌نین سسی گلن یئره ساری ایمک‌له‌ییب ال‌لرینی خدیجه‌نین دیزلری‌نین اوستونه قویدو. خدیجه دیزلرینی قوجاق‌لاییب انگی‌نین آلتینا دیرکلمیشدی. اونون گؤز یاشلاری یاناقلارینی یاشالتمیشدی.
«حیط‌ده‌کی قیزیل گول‌لری سنین اوچون اکمیشم. اونلارین عطیرلرینی ائشیتسن هئچ واخت اوره‌ییندن گلمز گئده‌سن».
الی‌نین ایچین یوخاری قالدیردی. «الیمه تیکان باتیب، کؤینه‌ییمین ده قولو جیریلیب… باخ، اؤزوم تیکمیشم. یاخشی تیکمیشم، هه؟ گؤرورسن کی، سنه ده مؤحتاج دئییلم…»
خدیجه‌نین سسی اونو اورهکدن سئویندیردی:
«هاچان آغ کؤینه‌ییوی آغ ساپی‌نان تیکه بیلسن اوندا ایتیلیب گئده‌رم».
دویو قالدی بوغازیندا. ائو بئله شولوق اولماسایدی خدیجه دئیه‌ردی کی، دویونو گرک ائله یومشاق بیشیره‌سن کی، بوغازدان راحات کئچه. سونرا دا کوسگونجه‌سینه دئییردی ائله بیر تیکه چؤرهک اونون قارنینی دویورار. آغیر بدنینی دبردیب، قاپی‌نین ینوووندان یاپیشیب آیاغا دوردو. وورنوخدو کی، یانا چکیلیب، اونا یول وئرسینلر.
هالدا اوتوران اوشاقلار هیرنا چکیب گولوردولر.
بؤیوک قیزی دئدی:
«هارا گئدیرسن آتاجان!»
دوداق آلتی دئدی:
«مطبخه گئدیرم».
دئمه‌دی خدیجه‌نی آختاریر، اؤز- اؤزونه دئدی:
«یقین کی، بو یاخین‌لیقدادیر».
مطبخ دولو ایدی.
«بیر زاد ایسته‌ییرسن آتاجان؟».
گلنی ایدی.
«هئچ بیر زاد».
گئری قاییتدی. دیواردان یاپیشا- یاپیشا صاندیق‌خانایا ساری گئتدی. خدیجه‌نی آختاراندا آخیردا گئدیب اونو صاندیق‌خانادان تاپاردی.
«خدی! دور گل ائشییه».
قاپی‌نین آستاناسیندا اوتوردو.
«قولاق آس گؤر نه دئییرم. اؤزومو گوزگوده گؤرورم، یامان چیرکینم. مندن قاچماغا حاقلی‌سان. چوخ چیرکینم، دوزدور؟».
صاندیق‌خانادان گلن سس دئییر: «هه، چوخ، چوخ».
«هر نه دئییرسن دی‌ء، قوی اوره‌یین بوشالسین».
«او کوفته‌یه اوخشار بورنووو گوزگوده گؤره بیلدین‌می؟».
قوجا کیشی بارماقلارینی بورنونا سورته- سورته گولدو: «هه، هه».
«داز باشیوی دا گؤردون‌مو؟».
«هه».
قوجا کیشی الینی باشیندا گزدیره‌رک ائهمالجا ائندیریب، یاپیشمیش کیرپیک‌لری‌نین اوستونده ساخلادی.
«او، آجی دیلینی نئجه؟»
کیشی اوجادان شاققا چکیب گولدو:
«هه، گؤردوم. آغزیمی یوموب لال اولارام، سن گل ائشییه من لال اولارام».
جلیل دئدی:
«آتاجان، بیر زاد ایسته‌ییرسن؟».
کیشی‌نین دوداقلاری گولوشه اییلدی. قاپی‌نین توتاجاغین بوردو. قاپی باغلی ایدی. یورولموشدو. اوتاغین آغیر هاواسیندان بوغولوردو. اوشاقلار قاباغیندان قاچدیلار. آیاغی قند قابینا دیدی. دایاندی.
«آتاجان، هله گئت. آی بالا قاچین گئدین گؤروم».
کیشی فیکیرلشدی:
«گؤره‌سن، بو آرواد هاردادیر؟».
پیلله‌کانین سوراهی‌لریندن توتوب آشاغی‌یا ائندی. سویوق بیر گئجه ایدی. ائهمالجا سسله‌دی:
«خدی!».
ائودن، های- کوی سسی گلیردی. کیشی سویوق‌دان اسیردی. پیلله‌کانین اوستونده اوتوردو.
«خدی جان… آی خدیجه هارداسان؟».
بوینونو اییب قولاق وئردی. یارپاقلارین سسی گلیردی. هاوایا بیر یانیق ایی یاییلمیشدی. اوجا سسله چاغیردی:
«خدی جان!»
اومیدسیزلییین سویوق دامجی‌سی اوره‌یینه دامدی. گؤز یاشلاری یاپیشیق کیرپیک‌لری‌نین آراسیندان، سوزوب آخدی. دیزلرینه تاپدالایاراق هؤنکور- هؤنکور آغلادی.
«خدی جان… جانیم خدی».
