میللته خبر وئرین هامی گلسین کؤمه‌یه!
تئز سوفره‌نی دؤشه‌یین بیز گلیریک یئمه‌یه!
اللی ایله یاخیندیر آمریکا وطنیمدیر
آتا م، آنام قاچیردان پول‌لار، مال‌لار منیمدیر
من ایرانین شاهی‌یام ایران دا مسکنیمدیر
هئچ کیمین حقی یوخدور منه بیر سؤز دئمه‌یه!
تئز سوفره‌نی دؤشه‌یین بیز گلیریک یئمه‌یه!
نئچه یئرده کازینو، قومارخانا، باریم وار
آمریکا، اسرائیلدن چوخلو قوناقلاریم وار
اینگیلیس مجلیسینده بوللو طرفداریم وار
بیرساعت گئتمه‌میشم هئچ یئرده ایشله‌مه‌یه!
تئز سوفره‌نی دؤشه‌یین بیز گلیریک یئمه‌یه!
بیرموشتولوق وئریرم هرکیم منه کؤمکدیر
من شاه اولاندان سونرا او دا وزیر دئمکدیر
هرکیم کئفه باخاجاق، ایشی، گوجو یئمکدیر
هرکیمین دیشی وارسا دوشه‌جک دیشله‌مه‌یه!
تئز سوفره‌نی دؤشه‌یین بیز گلیریک یئمه‌یه!
«ترامپ» دئییر شاهزاده سنین ده تویون اولار
هر هاوا چالینارسا هامیسی اویون اولار
میللت دئمه، یوزوندن دوخسانی قویون اولار
شاهچی‌لار چالیشمالی یئرلری کؤشله‌مه‌یه!
تئز سوفره‌نی دؤشه‌یین بیز گلیریک یئمه‌یه!
اورمو- تیر آیی ۱۴۰۴-نجو ایل
