چئویرن: رقیه کبیری
ترجمه: رقیه کبیری
رقیه کبیری

کپنک‌لری قوْرخوتمایین
رقیه کبیری

اؤلوسونو آستاجا یئردن گؤتوروب، چؤرک سبدینه قوْیدوم، ائوه گتیریم. ساغ- سوْلوم، آشاغی- یوخاری ضد- شورش پوْلیسی‌ ایله دوْلو اولسایدی بئله، اؤلوسونو یئرده بوراخاسی دئییلدیم. اؤزوندن علاوه اینجه قانادلارینین رنگلرینه گؤره اونون اؤلوسوندن واز کئچه بیلمزدیم.
هانسی روزگار اونو گتیریب بورا آتمیشدی، بللی دئییلدی. پیادا یولوندا، کوْرلار اوچون دوزولموش ساری موزاییک دؤشه‌مه‌نین اوستونده بؤیرو اوسته دوشموشدو. بونا باخمایاراق کوْرلار رنگین نه اولدوغوندان باش تاپمیرلار. رنگ اؤلونو ده دیری کیمی گؤزه گتیرر. آنجاق رنگلی قانادلارینین آلتیندان کؤلگه‌سی موزاییکین اوستونه سَریلمیشدی. قانادلارینین قرینه قهوه‌یی خاللاری ساری موزاییک اوستونده او قدر گؤزل گؤرونوردو کی، اوّلده اونون اؤلموش اولدوغونا بر‌خود اولمادیم. دئدیم بلکه بو کپنک ده تبریز جماعتی کیمی ضدشورش پوْلیسینی گؤردوکده چاشیب، ساری موزاییکی گونه‌باخانلا ده‌ییشیک توتوب. اؤز فیکریمه گولمه‌ییم توتدو، آمما گولمه‌دیم. اؤز- اؤزومه دئدیم: «بیردن پوْلیس‌لره ائله گلر کی، من ده عصیانچیلارین بیریسی‌یم، اونلارین روبوت کیمی شوشه قالخانلارینین دالیندا قارد توتدوقلارینا باخیب، گولورم». دوزدو کی گولوش عصیان آنلامیندا دئییل، آمما هانسی عاغیللی آدام تپه‌دن دیرناغا سیلاحا بورونموش پوْلیسین اؤنونده گولر کی، من ده گولوم! هله بیلسه‌یدیلر چؤرک آلماق ماهاناسیله زنبیلی قولوما سالیب، ایکی کند مسافه‌سینده یول گلمیشم یاخیندان اونلارا تاماشا ائله‌ییم، …یوخ!… آللاه گؤسترمه‌سین او گونو! من کی بیر کاره دئییلم. ژورنالیستم؟ یوخ! یازیچی‌یام؟ یوخ! ایشچی‌یَم؟ یوخ! دانشجویام؟ یوخ!… بس، دوستاق هارا، من هارا؟… ایللر اؤنجه تقاعد اولموش کارمندین بیریسی‌یم. تاماشادان سونرا ألیمدن نه ایش گلر کی!؟
آیاغیم آلتینا باخماسایدیم قبریستاندا قبیرلری آیاقلاییب کئچن کیمی اونو دا آیاقلاییب کئچمیشدیم‌. فیکریم پوْلیس‌لرده اولسایدی دا، آنجاق گؤزوم یئرده‌یدی. یوخسا اونون اینجه قانادلاری آیاغیم آلتدا اوغولوب، دؤشه‌مه‌نین اوستونه یاییلاجاق ایدی. گؤرمک همن دایاندیم. بیلیرم، بو هنگامه‌ده بیردن- بیره پیادا یولونون اورتاسیندا دایانماق پوْلیس‌لرین دیققتینی چکمه‌میش اولماز. ایسته‌دیم أییلیب اؤلونو یئردن گؤتوروم، سونرا اؤز- اؤزمه دوشوندوم یئره أییلسم، پوْلیس‌لر ظنّ ائدرلر أییلیب یئردن داش گؤتورورم. آمما بورا تبریزدی، فلسطین دئییل کی من ده انتفاضه ساواشی اوچون یئردن داش گؤتوروب پوْلیسه ساری توللاییم. اوسته‌لیک، مَه‌یَر پوْلیس‌ کیمدی کی؟ اونلار دا ائله منیم کیمی آنالارین اوغوللاریدیلار دااا. یقین کی، تقاعد اولموش یاشلی‌لارلا ایشلری اولماز.
ساغ- سوْلوما باخدیم. بیر آن نظریمه گلدی ساغ- سوْلومداکی پوْلیس‌لر قالخانلارین دالیسیندا قورویوب قالمیش قورخو شووالیه‌لریدیلر. آمما بو شووالیه‌لر قورومامیشدیلار، دیب- دیری، جانلی آداملار ایدیلر. دایاندیقلاری یئرلرینده قیمیلداییردیلار، بیر- بیرلریله دانیشیردیلار. حتی بیر- ایکیسی دیققتله منی سوزوردو. اونا گؤره احتیاط ائله‌ییب، قفیلدن یئره أییلمه‌دیم. ساری موزاییک اوسته دیزه چؤکوب، اونلارا باخمادان چؤرک سبدیمی قولومدان یئره بوراخدیم. کپنه‌یین اؤلوسونو آستاجا گؤتوروب، سبدین ایچینده‌کی سنگه‌یین اوستونه قویدوم. کپنک گئنه بؤیرو اوسته دوشوب قالدی. آدام اولسایدی دئیردیم اوخویوب ائشیتدیییم ناغیللارداکی بیر گؤزل کیمی شیرین یوخویا دالیب.
گؤیلوم ایسته‌ییر دئیم بو کپنک لاپ عشق رنگینده‌دیر. عؤمورلرینده عاشیق اولانلار عشق رنگینین نه اولدوغونو یاخچی بیلرلر. عشق رنگی هردن اؤزل بیر رنگه چالار. قالیب هانسی واختدا، هانسی بیر حالدا عشقه یاناشاسان. حتی اؤزونه مخصوص لحنی ده وار بو رنگلرین. بونونلا بئله عشق رنگینده‌دیر دئسم، بیله- بیله اؤزومو سالارام لیریک بیر دویغونون ایچینه. بیلیرم خیابانلارین بو وضعیّتیله لیریک دویغو توتماز. هرچند بیرجه عصیانچی دا خیاباندا گؤزه گؤرونمور. بونونلا بئله پوْلیس‌لرین گئیینیش‌لرینی، أللرینده‌کی باتوملارینی، باشلارینداکی ده‌میر بؤرکلرینی گؤرنده آدامین اوره‌یینه قورخو دامیر. آز قالیر آدامین آدی یادیندان چیخسین، هاندا قالسین کی عشقدن، یا اونون رنگلریندن دانیشاسان. آمما اؤلوم ده عئشقین رنگلریندن بیریسی‌دیر.
اؤلومو چؤرک سبدیمده داشیماغا دئییل، ساعات مئیدانینی قورخو شووالیه‌لرینین محاصیره‌سینده گؤردوکده قوتومدان قوردوم. بیر آن نظریمه گلدی او هوندور بینانین باشینداکی ساعاتین عقربه‌لری ده قورخودان دایانیبلار. اؤز- اؤزومه دئدیم: «قورخونون بالاسی اؤلسون». آمما مه‌یر قورخو دا دوغار کی بالاسی اوْلوب، سونرا دا اؤلسون؟ قورخو دئدییین ویروس کیمدیر. دوغماز، بولاشیب، یاییلار. قورخو آدامی أل‌بَه‌أل اؤلدورمز، آزجا- آزجا، تیکه- تیکه اؤلدورر. دوز دئمیشلر، قورخو اؤلومدن پیسدی.
حیس ائلیرم أن آزی بیر- ایکی پوْلیس منی گؤز آلتینا آلیبلار. یقین یئردن کپنه‌یی گؤتورمه‌ییم دیققت‌لرینی چکیب. گؤره‌سن گؤردولر یئردن گؤتوردویوم شئی آنجاق و آنجاق بیر کپنک اؤلوسویدو؟
چالیشیرام سوْیوق‌قانلی گؤرونوم. اؤز- اؤزومه دئییرم: «فیکر ائله أتدن دووار چکمیش بو پوْلیس‌لر بولوارلارین کنارینا أکیلمیش یام‌یاشیل شومشاد آغاجلاریدیلار. شومشاد آغاجلارینین قورخوسو یوخدی کی!»
سنگه‌یین اوجوندان بیر پارچا قوپاریب آغزیما قویورام. پلیس‌لری گؤرمزدن کیمی پیادا یولوندان کئچیرم. بیر- ایکی آددیم اوزاقلاشمامیش اوشاق‌یانا بیر فیکیر عاغلیما چاتیر. گئری دؤنورم. بوتون شهامتیمی بیر یئره توپلاییرام. فیکریم اوشاق‌یانا اولسا دا، بؤیوک بیر ساواشا گئدن کیمی حیسیم وار. آددیم آتدیقجا دئییرم بس ساواش مئیدانینا یاخینلاشیرام. مئیدانین اورتاسینا توپلانمیش پوْلیس‌لرین قارشیسیندا دایانیرام. پوْلیس‌لرتعجوبله منه باخیرلار. بیری ألینی بئلینه آپاریب، باتومون دسته‌یینی سیخیر. قورخورام. او باتوم منیم آرتروزلو سوموکلریمین حسابینی بیریوللوق چوروده بیلر. اؤزمو سیندیرمیرام. کپنه‌یی آستاجا گؤتوروب اوْوجومدا اونا گؤستریب، یانیندا دوران پوْلیسین چینینه قویوب، گئری دؤنورم. قورخورام بیر ده دؤنوب باخام. قورخورام او قورخو شووالیه‌سی کپنه‌یی چینیندن یئره آتیب، آیاغی ایله اونون ألوان و اینجه قانادلارینی أزه…
۲۳/۱۰/۹۶

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

کپنک‌لری قوْرخوتمایین / رقیه کبیری

رقیه کبیری
www.ishiq.net

آذربایجان ادبیات و اینجه‌صنعت سایتی

کپنک‌لری قوْرخوتمایین / رقیه کبیری

رقیه کبیری
www.ishiq.net

آذربایجان ادبیات و اینجه‌صنعت سایتی

کپنک‌لری قوْرخوتمایین / رقیه کبیری

رقیه کبیری
www.ishiq.net

آذربایجان ادبیات و اینجه‌صنعت سایتی