“اَکیز تایی”نین تورشمزه‌لری – 10

ekiz tayi
“اَکیز تایی”نین تورشمزه‌لری –
10
فمنیست‌لرین بؤیوک ننه‌سی

-آبا! دئمه‌ها گؤرمورم یاخجی دا گؤرورم، اما اؤزومو گؤرمه‌مزلیییه وورورام. هله اؤز آرامیزدی، دئه گؤروم گونده یئددی، سکگیز ساعات اوتاغیوا گیریب، نه ایش‌لر گؤروسن؟

-نه ایش گؤره‌جَم بالا، رومان یازیرام

– جانا بالا…. آبا سَسیوی قیس، بیردن ائشیدن- بیلَن اولار. قوهوم قونشونون یانیندا آبیریمیز تؤکولر. والاهی بیری ائشیتسه، صاباح من بو محله‌ده باش ساخلایا بیلمیرم.

-ائشیدسینلر دا بالا، حزب قوروروام یوخسا میتینگه چیخیرام؟ رومان یازیرام داااا

-آبا آغزیندان یئکه سؤزلر نه‌دی دئییرسن. آماندی، بیر دئدین بیر ده دئمه‌هااااا

-بالا نه دئییرم کی؟

-بیر یاشیوا، باخ! آخی سنین بیر آیاغین اویاندا، بیر آیاغین بویاندا…

-ائله اونا گؤره دا آدینی یئردن اوجا تورپاق قویموشام.

-ماشاالاه! اعتماد به نفسه باخ! آخی آبا! سن بیر یائسه قادین… سنین یازدیغین تورکجه روماندان نه چیخار؟ یا دوزسوز اولار، یا شور اولار، یا دا تورشامیش!

-بالا چؤرک دئییل کی، رومان‌دی‌ها. قیرتلیق زامانیندا شوروندا اوخویان اولار، دوزسوزوندا، تورشامیشین داااا… بیرده بَه سن تاریخ اوخومامیسان؟  عمی‌اوغلو گلدی خویا… خویلولارا قانون قویا…

-آبا باشیوا دولانیم، تاریخی ده بوش وئر، رومان یازماغی دا. سن ایندی گرک مرثیه‌دن چیخیب، مچیده گیره‌سن. آغزیندان ورد- دعا اسکیلمه‌سین.

-دئییرسن بَه من نئیلیرم؟ بَه بو ایشیمین آدی نه دی؟ بیر باشا  ورد- دعادایام داااا. ائشیتمه‌میسن پیغمبر دئییب «بئشیک‌دن قبیره جان علم اؤیرنین»

-دئییب اؤیرنین دااااا… دئمیه‌ییب کی یازین.

-دوز دئییرلر قونشونون تویوغو قاز اولار‌هااااا

-آبا من دئییرم رومان یازماغی بوراخ. سن منه تویوقدان، قازدان دانیشیسان

-ائله اولار کی بئله اولار دااااا. بالا اوزاغا گئتمیرم باخ ائله بو دوریس لسینگ 40 یاشیندان یازماغا باشلاییب.

-دوریس لسینگ کیم دی؟ دئمه کی قدیم قونشوزون قیزی دی کی، باغریم چاتلار‌هاااا

-گئت تاپ گؤر کیم دی داااا… فمنیست لرین بؤیوک ننه‌سی دی. 2007 ده نوبل قازانیب. اؤزو ده بیر تَهُر هم وطن ساییلیر. کرومانشاه دوغومودی.

-آبا دا سن شورون چیخارتدین‌هاااا. یوخسا سن ده قاریشدین بو فمنیست لره؟‌هانسی دانیشگاهدا بو سؤزلری اؤیرنیبسن؟

-آدام آغزین آچمامیش فمنیستی قاخینج ائله‌ییب، باشا چیرپیرلار. سن ده منیم آغزیما سؤز قویما… آلاها شوکور دانیشگاه گؤرمه‌میشی دئییرم کی! بیر ده دئییرسن بَه ساچیمی‌دیروماندا آغارتمیشام؟ بالا! بو ساچلار کیتاب اوخویا- اوخویا آغاریب.

-آبا! بوشلا بو رومان یازماغی. قوهوم قونشونون شماتتیه قویما منی

-کیمین پیشیینه پیشته دئییرم؟ رومان یازیرام دا.

-آبا سن آلاه اتیم تؤکولور سن رومان سؤزو دئینده،  بویاشدا، ساچیوین آغارمیش واختیندا…

-بالا سن منیم یاشیمین، ساچیمین فیکیرنده قالما، هله قالیر فیکریمین یائسه‌لیینه، بیلدین!

-آبا….!

Check Also

قولام دایی‌نین ماجرالاری (۸): / نریمان ناظیم

قولام دایی‌نین ماجرالاری (۸): قولام دایی‌نین «ساواک»ا چکیلمه‌سی نریمان ناظیم دیلشاد‌خانیم گلین‌‌گلمه ‌گئجه‌سی قولام‌دایی‌نین ادیک ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *