ایکی هدیه / فریبا مرتضایی

fariba mortazai
ایکی هدیه
فریبا مرتضایی

۱٫ سن گئده‌لی… (اوغلوما)
سن گئدن آستانانی اؤپورم
سن گزن کوچه‌لری گزیرم-
سنسیز،
سس‌سیز،
سمیرسیز.
هر سسه ساری دؤنورم
اولمایا سن دؤنوبسن!
قیفیللانیب باخیشلاریم،
گؤزلریم ائشیکده.
گولمک ایسته‌ییرم رسیم‌لرده
باخیب سئوینه‌سن.
اوزوم گولور،
دولو اوره‌ییم یاغیر,
ها یاغیر بوشالمیر اوغلوم!
او بوش یئرین دولمور اوغلوم!

۲٫ آغ آندلی شاعریمیز… (اوستاد نادر الهی‌یه)
بیلیردیم سسین گرایلی‌دیر
کؤنلون شیکسته؛
امما نه بیلئیدیم جانین خسته‌دیر خسته!
شعریمین گؤزلرینه
غم دوشور؛
مصراعلاریم اوشویور.
قالخ آیاغا سؤزه گل، سازا گل!
بوش وئر خازانی، یازا گل!
یولدادیر نازلی‌نین گؤز- قولاغی,
نازا گل!
قلمیم دیز چؤکوب اؤنونده،
باش اییب دونه‌نینده، بو گونونده.
قالخ آیاغا سؤزه گل، سازا گل!
آغلاتما آللاهی
آغ آندلی شاعریمیز «الهی»!

Check Also

«هاشیم ترلان»ین ایتگیسینین اوچونجو ایل دؤنومو(اؤزه‌ل سسلی صحیفه- دینله‌یین!)

«هاشیم ترلان»ین ایتگیسینین اوچونجو ایل دؤنومو(اؤزه‌ل سسلی صحیفه) آبان آیی‌نین ۲۵ ادبی جمعیتیمیزده میللی و ...

One comment

  1. قالخ آیاغا سؤزه گل، سازا گل!
    آغلاتما آللاهی
    آغ آندلی شاعریمیز «الهی»!
    چوخ ساغولون خانیم مرتضایی .
    گؤزلریم دولا دولا اوخودوم .
    آللاه تعالی دان استاد الهی یه جان ساغلیقی آرزولاییرام.

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *