قیسا شعرلر(۲۶)
فریبا مرتضایی

1
عؤمرومون فصیل‌لری
بیرلشیب خیشیلداییر؛
خزان منی آپاریر،
باهارا دئیین!

2
بیر بولود اولایدیم
داملا-داملا دولایدیم
سسلی-سسلی یاغایدیم
سن گلن یوللارین
توزون- تورپاغین آلایدیم.

3
گؤزلریمدن آخان داملالار
سوزوب یاناغیمی یالار،
دیلیم کوسوب
بوغازیما قاچار،
یوخسان
بو هارای هارایا چاتار
کیم بو دیلی دیله توتار،
کیم باریشدیرار؟!

4
دؤن گل
هاوان اسسین
اوره‌ییمده!

5
دونموش اوره‌یین
اووجلاریمدا،
دؤن گل اریمه‌دن
گؤزلریم یولوندا !