آناما باخیرام،
کاتاراکت عملیاتی اولونوب؛
او دا بیرگؤزلو منه باخیر،
نه یاخشی بیر گؤزلو باخیر!
شاهمارین حوزون دولوسو شعرینه
قولاق وئریرم،
یاناقلاریمدان آجی بیر چای آخیر!
بیر قند ایله آغزیمین دادین آلدادیرام؛
آنام باخیر، قورخورام
قیرخ سککیز مین دفعه‌دن چوخ،
آیریلیقدان قورخورام
اوزومو آنامین دیزلرینده یاشلاییرام!
آغلاییرام
گؤزلریمدن آخان داملا‌لار
یاناقلاریمدان سوزوب
قولاقلاریمین آستاناسیندا
شور دنیز تک دالغا‌لانیر!
اوشاق اوره‌ییمین الیندن توتوب
شعر دولوسو
اومیدلی سسه قولاق آسیرام!