قیسا شعرلر(۲۳)
فریبا مرتضایی
(۱)
قار یاغیر
آغیر- آغیر،
سئرچه‌لری شاختا چالیر؛
چؤره‌ک دولو اته‌ییم
سیلکه‌لنیر، آغلاییر.
(۲)
بو قیسا دونیادا
نئجه من
اوزون- اوزون اؤلموشم؟!
(۳)
کؤنلوم
آددیم آتماق ایسته‌ییر
کوچه‌نین او تاییندان بو تایینا؛
قورخما
سانا ساری دئییل!
(۴)
آچ قاشلارینین دویونون!
باخیشین توتولور
آییمی ایتیریرم.
(۵)
یول وئر
گؤزل گؤزلریندن کئچیم!
بو یولدا
اؤلسیم وار
(۶)
سن گلسن
اوره‌ییمی آپارارسان؛
سنسیز یئرسیزم
قاداسی!
(۷)
دؤز بیر آز
اؤزومه یئتیشیم،
چاتیب سنه یئتیشیم!
گؤر نئجه
سنه یئتیشیم!
(۸)
اوره‌ییم اؤلوب،
چیرپینیشلار گئدیب،
سن یوخسان
بو آستانه بوش‌دور.
باشماقلاریمی گتیرین
اوره‌ییمین باشیندا جوتله‌یین
دئمه‌سینلر آدامسیزدیر!
(۹)
اوره‌ییم گئدیشینده،
باغریم گلیشینده
اسیر!
(۱۰)
سای منی!
سنسیز گونلرین ساییسی
اؤلدورور منی.
