یاددان چیخمیر ائل اوغول‌لاری – دوقتور داوود رضایی‌نین (1385-1351) خاطیره‌سینه
ایلقار تبریزلی
آذربایجان تورپاغی‌نین جنت گوشه‌سی اولان قاراداغ، شرفلی و دویوشکن ائولادلاری‌لا فخر ائتمکله برابر، مینلر صنعتکار بالالاری‌لادا فخر ائدیر. شرف و استعداد قایناغی اولان بو تورپاغا، آذربایجان خالقی‌نین گور یانان اوجاغی دئسک، یانیلمامیشیق. بو اوجاغین ایستی‌سینده مینلر سئوگی دولو اوره‌ک قیزینیب، مینلر آرزو یؤنملی اومید یوغرولوبدور. “نباتی”لرین محبت افسانه‌سی، “ستارخان”لارین موباریزه و آزادلیق هیمن‌لری، “عاشیق حسین جاوان”لارین سئوگی‌دن دوغان حسرت نغمه‌لری، بو ائلین و بو تورپاغین افتخار نیشانه لریدیرلر. قاراداغی صنعت و ادبیاتدان و آذربایجان صنعتی و خصوصیله شیفاهی خالق ادبیاتی آدلانان ادبی ژانرینی، قاراداغ ماحالیندان آییرماق مومکون دئییل. بو ایکی وارلیق سانکی عئینی و پارالل یارانیب، یاشاییرلار.
چوخ گنج‌ایکن آرامیزدان کؤچن رحمتلیک داوود رضایی، بو ماحالین تقدیره لاییق بیلیگه، صنعته مالیک اولان عالیم و صنعتکار ائولادلاریندان ایدی. اونون ایتگیسی بوتون قاراداغ ماحالی‌نین و یاشادیغی تبریز شهری‌نین مدنیت اوجاقلارینی، ادبی جمعیتیمیزی، موسیقی خادیملریمیزی اؤز کدرلی تاثیری آلتینا آلدی. مطبوعاتدا حاقیندا یازیلار یازیلدی، شرفینه مجلیسلر تشکیل اولوندو، شانینه شعرلر دئییلدی، شخصیتینه لاییق تورپاغا تاپشیرما مراسیمی کئچیریلدی.
داوود رضایی 1351-ینجی ایلین یای فصلی‌نین سون گونلرینده قاراداغ ماحالی‌نین گؤزو اولان کلیبر منطقه‌سی‌نین یاشیل طبیعتلی “مولان” کندینده دونیایا گؤز آچدی. داوودون آتاسی “اردشیر” کند معلمی ایدی. داوودون اوشاقلیق ایل‌لری بو محترم عائیله و جنته بنزه‌ر بو دیارین قوینوندا کئچدی. ایلک تحصیلینی اورادا آلدی. بویا- باشا چاتدی؛ اورتا تحصیلینی تبریز شهرینده داوام ائدیب، آتاسی کیمی معلیم‌چیلیک مکتبینه داخیل اولدو. داوود تکجه آتاسی‌نین پئشه‌سینی یوخ، بلکه اونون دریندن سئودیگی آذربایجان موسیقی‌سینه‌ده علاقه بسلدی.
داوود سونرالار تبریز و آبادان اونیورسیته‌لرینده عرب دیلی و ادبیاتی اوزره لیسانس و یوکسک لیسانس آلمیش، تبریز و مرند شهرلرینده “پیام نور” و “دانشگاه آزاد” اونیورسیته‌لرینده بیر ادبیات اوستادی کیمی چالیشمیشدیر. عئینی زاماندا آذربایجان ادبیاتی‌نین فخری اولان “ملا محمد فضولی” اثرلری اوزره تدقیقات آپارمیشدیر. او تدقیقاتی‌نین داوامیندا آذربایجان جمهوری‌سینه گئدیر، فضولی‌شوناسلیق تک درس پروگراملارینی بیتیریر و فخری دوکتورلوق موکافاتینا لاییق گؤرونور.
داوود رضایی تبریزه قاییداندان سونرا، مختلف علمی ییغینجاقلاردا اؤز تدقیقی اثر و مقاله لریله چیخیش ائدیر و بیر نئچه کیتابلار یازیر و یاییر. اونون “صراف تبریزی” حاقیندا یازدیغی مقاله بو شخصیتین شرفینه تبریز شهرینده تشکیل اولونان کونفراسین، بیرینجی رتبه‌سینی قازانیر.
گنج عالیم داوود رضایی علمی- ادبی تدقیقاتلارلا برابر چوخ علاقه بسله‌دیگی موسیقی صنعتیندنده کناردا قالمیر. آذربایجانین تانینمیش موغام اوستالاری “شاطریان” و “حسن دمیرچی” جنابلاری‌نین نزدینده موغامین مختلف گوشه‌لرینی اؤیره‌نیر، و اونلاری اؤز ملاحتلی سسیله ایفا ائدیر. بیر مدت تلویزیون اؤرکستری‌ایله امکداشلیق ائتمیشدیر. داوود تبریزین مقبره‌الشعراسیندا “شهریار” اوچون کئچیریلن کونسئرت مراسیمینده چیخیش ائدیر و بیر نئچه ماهنی اوخویور. موسیقی خادیمی “مجید تیموری‌فرین دئدیگینه گؤره، بو واختادک “سه گاه”، “بایاتی شیراز”، “ماهور” و “شاهناز” موغاملاری داوودون سسی‌ایله یازیلمیشدیر.
گنج داوود خسته‌له‌نیر. او علاجسیز “سرطان” خسته لیگی‌ایله نئچه مدت پنجه‌له‌شیر، آنجاق اونا غالیب گله بیلمیر. او خسته‌لیگینه باخمایاراق، وار قوه‌سیله عؤمرونون سونونا قده‌ر، اوخویوب یازماقدان و عئینی حالدا موسیقی صنعتیندن اوزاقدا قالمیر. داوودون بیر معلم کیمی ادبیاتیمیزا و موسیقیمیزه ائتدیگی خدمتلردن تقدیر ائتمک اوچون، “ساهر ادبی- مدنی درنه‌یی” بیر نئچه آی اؤلوموندن اؤنجه، دونیا معلملری گونو موناسیبتیله تشکیل ائتدیگی مراسیمینده، آذربایجانین 50 نفر معلمی ایله برابر اونداندا تجلیل ائدیر و داوودا قیزیل گوللی تقدیر لؤوحه‌سی وئریر.
گنج عالیم، موسیقیچی و آذربایجان ادبیات خادیمی دوقتور داوود رضایی 1385-ینجی ایلین بایرام گونلرینده 34 یاشینداایکن دونیاسینی دگیشیر. او اؤز قیسا عؤمرونده بیر چوخ علمی- ادبی اثرلرین موللیفی اولور. عؤمرونون سون آیلارینی او کوراوغلو داستانینی عرب قایناقلاری اساسیندا تدقیق ائدیردی. آشاغیدا آذربایجانیمیزین صنعتکار اوغلو دوقتور داوود رضایی‌نین آذربایجان موضوعسونداکی اثرلری‌نین سیاهه‌سینه نظر سالدیقدا، اونون ادبی جمعیتیمیزده لاییقینجه تانینماماغینا تاسف یئییریک:
- دویغو دالغالاری (آذربایجان ادبیاتی خزینه سیندن سئچیلمیش اینجی لر(
- مقاله لر مجموعه‌سی
- کوراوغلو (چین قایناقلاری اساسیندا(
- فضولی (خاریجی قایناقلاردان آلینما(
- ملمعات و ابیات عربی فضولی
- ترکان پارسیگوی آذربایجان بعد از مشروطه
- ویلیام شکسپیرین سونتلری (کؤچورمه(
- دانیش اوره ییم (کؤچورمه(
روحو شاد، خاطیره سی عزیز
6 پاسخ
هله ده انون اوخودوغو، نه اوچون بس نه اوچون بس ماهنیسی قولاعیمدا پیچیلدیر
آخی دوغوردان گؤره سن، نه اوچون بس….
سایین ایلقار تبریزلی بوگون بایرامین ۹نجو گونو (۹۴) گوی مچیت یانیندا کیتاب سرگیمه گلدی چوخ چوخ سئویندیم یاشاسین یاز اورکلی ایلقار تبریزلی. عشق اولسون. دئییرم سنده گؤزللیکلر نه قدر ییغیشیب بیر یئره بیلمه لی سن
کیملر گلدی کیملر گئتدی بو دونیادا بو دونیادان
هنر گؤستر بیر شئی آپار بو دونیادان بو دونیادان……..
از جناب آقای ایلقار تبریزلی تشکر میکنم قلمشان را میبوسم که چنین مطلب خوبی در حق آن بزرگوار تقریر نموده است.
با سلام. مرحوم دکتر داود رضایی استاد من در دانشگاه تبریز بودند . گذشته از علم و سواد ایشان، باید از سجایای انسانی و و طنپرستی و انساندوستی ایشان سخت گفت. آیینه تمام نمای انسان شایسته، لایق باغیرت و باشرفی بودند. زمانیکه که مرگ ایشان از رسانه ها اطلاع رسانی شد به شرفم قسم که فکر کردم دنیا را بر سرم خراب کردند. باید صدها سال زندگی میکردند و به درد این ملت می خوردند. آنقدر فعال و اهل علم بودند که کتابها و تحقیقات ایشان واقعا بدون کم و کاست است. وقتی آثار ایشان را به دست میگیرم دلم آتش میگیرد که ای زندگی نامرد چکار کردی؟!!!!!!!!!!!!! مگر رسم مردانگی چنین است که گلهای زیبا را فورا برچید؟!!! از خداوند متعال برای ایشان عزت ابدی و آرامش ابدی آرزومندم از همین جا بر خاک مزارشان بوسه میزنم. زنده باد ای مرد باشرف و بزرگ. 58 سال دارم اما خودم را همیشه شاگرد ایشان میدانم. ای معلم و استاد بزرگم بوسه ام نثار خاک مزارت باد.
بارماقلاریم توتولدی بیلمیرم نه یازیم آخ. پارام پارچا کؤنلوم سنه قوربان