اوخوماق زامانی: 3 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

قولونون قارا یازیسی
حسن ایلدیریم
دوستوم دوقتور غلامرضا بوداغی‌نین فاجعه‌لی اؤلومو موناسیبتی‌ایله
gulamriza budaghi

  دوقتور غلامرضا بوداغی‌ – باکی شهری

یاشاماق عذابیندان جانینی قورتاریب، سسسیز و رنگسیز بیر بوشلوغا بوشالتدین اؤزونو. آرتیق تیکانلی باخیشلار گؤزلرینی دالامایاجاق. قاخینجلی یاخشیلیقلار روحونو قارسمایاجاق. دانلاقلاردان اوزولمویه‌جک،قیناقلاردان بئزمییه‌جکسن. آرزولاردان، رؤیالاردان اوزاق نملی قارانلیق تورپاغا قاریشا- قاریشا   دوغمالارین، دوستلارین، تانیشلارین خاطره‌لریندن باش قالدیریب، دوننلرین، بو گونلرین آغاران، قارالان اوفوقلرینه باخاجاقسان:

تبریزین دوننینده یار-یولداشی‌لا گزن بیر اوغلان گؤره‌جکسن: باشی هاوالی، کؤنلو سئودالی، آرزولاری باهار نیدالی، گؤزلرینده قارنقوش‌لار اوچوشان، گولوشلرینده گؤیرچینلر چیرپینان، قولاقلاریندا دورنالارین سسی، اللرینده اوره‌یینی داشییان بیر اوغلان.

ناظم حکمتین “گونشی ایچنلرین تورکوسونو”:

آخین وار

گونشه آخین

گونشی فتح ائده‌جه‌ییک

گونشین فتحی یاخین

اوخویا-اوخویا، یوللارین  دولایلارینی دولانا-دولانا گئدیر اوزو صاباحا، گئدیر یولو باهارا …

چاتیر آیاقلاری بوز باغلامیش، گؤزلرینی قیروو آلمیش باشیندا قارا یئللر اسن بیر باهارا.

باهاری باغرینا باسیر؛ بوزلار اریمیر؛ چیچکلر آچیلمیر؛ قوشلار اوخومور؛ گون توتولور؛ آی قیزاریر؛ یئللر اسیر؛ قارا یئللر بئیینلری، اوره‌کلری سیلیب کئچیر؛ آرزولاری، اومیدلری پوزوب کئچیر؛ بوغاناغا دوشور گؤزلر؛ قاسیرغادا سوسور سؤزلر…

خیالیندا یاراتدیغی آل گونشلی بیردیارا، آرزولاردا چیچکلنن یاشیل باغا اوز دؤنده‌ریر.چایی کئچیر. چاتیر اومیدینده بسله‌دیگی او دیارا.

یاشیل باغا آخان سولار آخماز اولوب، قوخوموشدو. آغاجلاری دولو وورموش، گونلرینه کول النمیش، ایشیغینی ساری شیطان اودموشدو. اؤز ایچینده چوروموشدو، قوردلامیشدی او بویدا باغ. بولبوللری سوسموش ایدی. چیچکلری کوسموش ایدی.

   اورادا‌ دا، آرزولاری چین اولمادی. ساچلارینا دن الندی، گؤزلرینه دومان چؤکدو، بیر گؤزه‌له کؤنول وئردی، قوشالاشدی، یوخوسونا تبریز دوشدو، دوداغینا تبریز قوندو:  « قارا گیله» ماهنی‌سی ایله”.

قیزیل گول اسدی

صبریمی کسدی

سیل گؤزون یاشین قارا گیله

آغلاما بسدی…

زامان گلدی پارچالاندی یاشیل آدا، تبریز دئیه  قانادلاندی، قوشا دورنا اوچوب،گلدی اویلاغینا:

اوچ تئللی،دؤرد تئللی،بئش تئللی دورنا

سن هارالیسان،هارالی دورنا

اووچو الیندن یارالی،یارالی دورنا…

آنا دیار، باشقالاشمیش، اؤزه‌للشمیش. درد و غمدن اؤز پاپینی آلمیش هامی. آغیرلاشمیش بوتون دردلر. سئوینجلری بؤلوشموشلر. سئوینج – شادلیق یونگولشمیش، جیلیزلاشمیش آزالمیشدی. گؤزلر قیپیق، اوره‌کلرسه بوم- بوش ایدی. آج -یالاواج  اؤز هایینا، اؤز وایینا قالمیش ایدی…

آغالارا قوناق اولدو. ساغا چؤندو، سویولدو. سولا دؤندو،سویولدو. آواند اولدو، اویولدو…او یازیغا اولان اولدو.

سوزلری دوداقلاریندان، اؤزو اؤزوندن قاچدی و بیزلرده کؤلگه‌سیندن اوزاقلاشدیق. آمان«قارا» لکه‌سیندن!

دول-دولاشیق فیکیرلر، تیکانلی دویغولار ساردی جانینی. اوره‌یینی، اوره‌یینه جالایان، بئینینی، بئینینه قوشان اولمادی. قالدی بوش توختاخلیق، ساختا دوستلوق، قورو آشنالیقلار الینده. بئزدی اؤزگه‌سیندن، اؤزوندن. دوغما قاپیلار اوزونه باغلاندی بیر- بیر. سؤزلر قیسالدی، اوره‌کلر دارالدی، گؤروشلر گوده‌لدی، پرنلشدی،کسیلدی. ساچلارینین آغی آرتدی، ساققال بوغا قاریشدی، گؤزلرینه دومان چوکدو، سؤزلرینده تیکان بیتدی.

اوره‌یینه یارا دوشدو، گیزلی- گیزلی هئی دئشیلدی. اؤز ایچینده پارچالاندی. نئچه-نئچه من دوغولدو اؤز ایچینده. من‌لر اونا قنیم اولدو، من‌لر اونو ازیشدیردی، سیخیشدیردی، اوزاقلاشدی اؤز-اؤزوندن، اوچوروملار اویولدولار…

    آخارباخار بوزقیرلادی، بوزقیرلاردا بوغاناقلار اویناشدیلار. فصیل‌لره کول الندی، قارا باسار چولقالادی گونلرینی، اوفوقلری قان قوسدولار. اومید سؤندو. اینام ایتدی، بوشالدی سئوگیدن. قارا سئودا سوردو اونو  بوشلوقلارا.:

ان یاخین لاریم،ان یاخین دوستلاریم

داشلادیلارمنی، داشلادی

و ماوی گؤزلو قادین یولداشلاریمی ساتیب

باشیمی منه باغیشلادی…

ایچیم قارالدی

ایچیم قارالدی

قولاقلاریمدا قازما سسلری

ایچیمده ایسلاق

بیر تورپاق

قازیلما باشلادی

گیردیم قورشاغاجان

دومانلی،ایستی قارانلیق لارا. ٭

قارا سئودالی «قولو» گؤزلری اوزاق-اوزاق اولدوزلارا تیکیلی. آرزولاری یاریمچیق، آغزی سون هارای توتوملو آچیق. اؤلومون سویوق قوجاغیندا دونموش، اویوموش. نه انسان سسی ائشیدیر، نه حیاتین سئوینجینی، کدرینی دویور.

اؤزو، اؤزونه باخیر. یوللارین آیریچیندان. اوره یی، بئینی قابار، ساچلاری بؤز یئللرده آغاران، آرزوسو اوره‌یینده قالان قارایازیلی قولو.

گون گله‌جک، تبریزین کوچه‌لرینده ماهنیلار گؤیره‌جک. حیات، گنجلرین اوزونه گوله‌جک. نغمه‌لر چیچکلنه-چیچکلنه، سنین‌ده یازیلارین بیته‌جک. کتابلارا دوشه‌جک. سن‌ده ماهنیلارا، آرزولارا قوشولاجاقسان. تبریزین کوچه‌لرینده اوزو گولر، گؤزو گولر بیر اوغلان اولاجاقسان. صاباحلارا بویلانا- بویلانا “خومار اولدوم” ماهنیسینی اوخویا جاقسان. و…

مهر آیی 1389

٭ ناظم حکمت:”بنرجی اؤزونو نه اوچون اؤلدوردو”

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *