درددن متنه – غربتدن وطنه!
بیر ایلدن سونرا سلام!
اوزون بیر سورهدن سونرا سانالا دؤندوگومده اؤزل مئساژلاما قوطومدا سایسیزجا ماراق، سایسیزجا مئساژ و سایسیزجا خستهلیگیمدن خبر آلانلارین دگرلی یازیلاری ایله قارشیلاشدیم. دورومومدان آسیلی چوخونو یانیتلایا بیلمهدیم و اومود ائدیرم سئودیکلریم بونو مندن سایغیسیزلیق گؤرمهسینلر.
بو کئچن ایل منیم اوچون نئچه یوز ایلین آغیرلیغینی یاشاتدی و مندن «باشقا بیر من» یاراتماغا چالیشدی. یانیمدا اولانلار دا اولدو، کؤکوندن منی اونودوب، قیراغا آتانلار دا. آغریلاریم چوخلو واختلار چکیلمز، دؤزولمز و آغیر بیر سیناغا چئوریلمیشدی. سانکی یئنیدن یاشاماق اوچون بو درد-آغری سیناغینی کئچیرتمم گرهکیردی.
بیلهرکدن یانیمدا اولانلار چوخلو واختلار دردیمی آز دا اولورسا آزالتماغا چالیشدیلار. بیلمهیرکدن اولانلار دا اولدو و اولدوقجا منیم دردیمه درد قاتیب، جانیمی داها آجیتدیلار. بونلارین هامیسی کئچدی و بو دردین یوکونون ان چوخونو، ان آغیرینی تک باشیما داشیدیم. یانی اؤز سئچیمیم ده ائله بو ایدی! (او یانیمدا اولانلارین حاققیندا یازماق اوچون بیر کیتاب گرهکیردی. اونلار آز اولسایدیلار دا، اولدوقجا اؤز ایدیلر. وحید بگ انگوتی، آیدین بگ انگوتی، محمد بگ انگوتی، بئهزاد بگ زالی، دوکتور سیمینفر جنابلاری، ایلقار بگ مؤذنزاده، رستم بگ محمدخانی، حسین بگ گونئیلی، حسن بگ راشدی، ائلدار بگ موغانلی، آیدین بگ متحدپور، مهراد و علی بگ واحدیفر، لاله خانیم اشکیه، بوغدا خانیم پورمحمد، گونش خانیم زامانزاده، نادر بگ بیراک، کریم بگ گولاندام، مسعود بگ هارای، وحید بگ ابهری و… آدلاری هر زامان ذئهنیمده ساخلی قالاجاقلار.)
بو کئچن ایل درین بیر قویونون دیبینده، تام بیر قارانلیغین ایچینده یالنیز اؤزوم آغریلاریمی سیزلاییب، اؤزوم ده اؤزلوگومو باغریما باسیردیم. بو قویونون نهقدر منیم یارالاریمی سیزلاتدیغینی بیر من بیلدیم و یئنه ده من. یارالار باشلایاندان سونرا بارماق ساییسی یولداشلاریمدان باشقا، هامی چکیلیب گئتدیلر، یوخا چیخدیلار. سانکی أزلدن یوخویموشلار… بیر من قالمیشدیم بیر ده بو درین قویونون قارانلیغا بورونموش یارالاری.
بونلاری نئجه آتلاییب، نئجه بو بیر ایل آغریلارا بورونموش ساعاتلاریمی و حتتا ثانیهلریمی کئچیرتدیگیمی هئچ اؤزوم ده باشا دوشمهدیم. ایکی دؤنه کومایا کئچدیم. ایکینجیسی داها آغیر ایدی. ألیم بو دونیادان اوزولموشدو، گئدیردیم، بلکه بیر داها بورالارا دؤنمهگم، آما بیر سس، سسسیزلیگین ایکی اوزوندن منیم ألیمی توتوب منی یئنه بو دونیایا قایتاردی. سانکی یاریم قالمیش ایشلریمی قورتارمالی ایدیم. بئله چیخیب بورالاردان گئتمک بلکه اولمامالی ایدی. نه بیلیم دؤندوم و یئنه قاییتدیم، انجاق یارالی روحوملا، جانسیز بدنیمله.
یاریمچیق یازیلاریمین أل-آیاغینی عزیز علیرضا بیرآرایا توپلاییب، اونلاری کیتابا چئویردی. هامیسی درددن، آغریدان یازیلمیشدی. اوراداکی «سن» هئچ کس دگیلدی و حتتا اورادا اولان «من» ده منیم اؤزوم دگیلدی. اونلارین هامیسی دردین سسسیزجه هایقیریشی ایدی.
سسلرین تراژئدیسی خستهخانا یاتاغیندا یاراندی.
اوندان اؤنجهکی سسسیزلیگین ایکی اوزونده ده همن خستهلیکده تاماملاندی.
اوزون ایللرین گؤندریلمهمیش مکتوبلارینین خستهلیکده یازیلانلاری دا اؤزونه کیتاب پالتاری گئییندیردی. بلکه بو مکتوبلار ییرمی اوچ ایل اؤنجهدن آلمانیایا و یا حتتا اوندان سونرا فرانسانین داخمالارا بورونموش بیر پاییز کوچهسینه گؤندریلهجکمیش، آما پایینا کیتاب اولاراق تبریزین پاییزی دوشدو. اونلار هله ده بینگئن شهرینی و پاریسین یوخسول کوچهلرینه تامارزی قالیبلار. هله قالسین کی ییرمی بیر ایللیک حسرتلی بؤلوملری هله ده گؤندریلمهمیش پوست قوطوسوندا اؤزلرینی سیزلاییرلار.
درمانیمین سون دوراغینا چاتمیش دورومومدا، قالیب-قالماماق دوراغیندا تبریزیمه چاغیریلدیم. بیلمیرم سون وداع اوچون، کیتابلار اوچون و یا یئنیدن باشلاماق اوچون. دوزونو دئسم اورهگیم یارالی ایدی، اولدوقجا ساغالماز یارالی، بونجا گون، بونجا آی یانیمدا اولمایانلارین آیاغینا گئدیردیممی؟؟؟؟ گئدیردیم دئیم گلین منی گؤرون! گلین آیاقدان دوشموش آیهانی گؤرون! گلین منه بیرآز یازیغینیز گلسین!!! کئچن ایلده اولمایانلاریم گلین آیهان اؤلور، اونونلا سون شکلینیزی اؤلوم گونو پایلاشیملارینیزا چکین…
بونونلا باریشماق اوچون گؤز یاشلاریمی گونلرجه الهدیم. سونوندا تبریزیمه گئتمک قرارینا گلدیم. بلکه ائله دوغرودان بو منیم سون دوراغیمداکی سون گؤروشوم اولاجاق ایدی، حسرتینی چکدیگیم تبریزله. بلکه تبریزین هاواسینی آغ جیگرلریمه دولدوراراق دونیامی دگیشهجکدیم…
بلکهلره باخمایاراق علی بگ موسیزاده قارداشیمین چالیشمالاری اوزره بو تبریزلی سفریم باش توتدو. اورادا رسول بگ اسمعیلیان و حؤرمتلی اوستادیم میر حسین دلداربناب منیم حاقدا دانیشاجاقدیلار، جلال بگ شمعسوزان جنابلارینین یاراتدیغینی دگرلی ادبی سارایدا.
تبریزی اؤزلهمیشدیم، سئودیکلریمی ده، حتتا منی اونودانلاری دا. گؤروش گونوموز گلیب چاتدی. ایللر بویو سئوگیلری ایله ادبیاتی منه سئودیرن بؤیوکلریمین بیر چوخو و جاندان عزیز سئودیکلریمین بیر قیسمی ده گلمیشدی. نیگار آنام، رقیه آنام، فرانک آنام، زکیه آنام، رعنا باجیم، آیدین قارداشیم، سؤنمز قارداشیم، محمد قارداشیم و او حالدا بیر چوخ عزیزیمین آدینی اونوتدوقلاریم…
حسن بگ ثمودی قارداشیم باشلادی بو گؤروشون ایلک سؤزلرینی و اوستادیم دلدار جنابلاری و حؤرمتلی ادبیاتچی رسول بگ ایسه سؤزلره داوام ائدیب، آیدین بگ متحدپور قارداشیمدا سون اولاراق بیر کیتابیمین حاققیندا دانیشدیلار.
بو تؤرهنه قاتیلمازدان اؤنجه سوموکلریمین سانجیسیندان دولایی آغیر ایگنهلر ووروب، اینجارسیز و دردلی بیر دورومدا اورا گئتمیشدیم، او اوزدن نه اولوب، نهلر یاشایانلاری سونرالار شکیللر و فیلملر اوزره باشا دوشدوم. گؤیلوم ایستهییردی سئودیکلریمه دانیشام، اونلارلا دردلهشم، آجیلاریمدان، کئچن ایل یاشادیقلاریمدان دانیشام اونلارا، آما اولمادی. دیلیم بئله بونلار اوچون منه یاردیم ائده بیلمهدی.
ایندی بونلاری یازارکن درمانیمین ان آغیر بؤلومونه حاضرلانیرام. دوکتور دئییب قاراجیگر چاتیشمامازلیغیندان دولایی پرتوتراپیده اولا بیلر اورهگین دایانیب، بیر داها دؤگونمهیه. ساغ گؤزوم، ساغ قولاغیم، ساغ قولوم، ساغ قیچیم…. داها ساغ دگیللر و اولا بیلر بیر داها ساغالمایالار.
بونلاری بورادا یازدیم مندن قالان یا سون سؤز اولاجاق، یا دا یئنیدن باشلاماق اوچون دردلریمین خاطیرهسی.
منی سئونلری سئودیم، سئومهینلری ده. منی اونوتمایانلاری سئودیم، اونوتانلاری دا. بیریسینی اینجیتمیشمسه، منی باغیشلاییب حاققینی حلال ائتسین، منی اینجیدن وارسا دا، اونو باغیشلاییب باغریما باسیرام.
یئنه بیر داها گؤروشوموز اولورسا، سیزلری داها آرتیق سئوهجهگم، اولمازسا دا، گؤروشوموز قالسین باشقا دونیایا. اورادا سیزلری سئوه-سئوه گؤزلهیهجهگم.
سیزی باغریما باسیب، گؤزلریمین یاشی ایله یاناقلاریمی یویاراق سیزه دؤنونجه -«هلهلیک» دئییرم.
سیزلرله انلام تاپان:
آیهان میانالی – تئهران – ۱۴۰۴.۰۹.۱۵
