دیکلمه صنعتی؛ ایکینجی حصه: سسدن محافظه و سس یئتیشدیرمه یوللاری
کبری میرحسینی
دیکلمه صنعتی ایله باغلی بیرینجی یازیمیزدا، سس قابلیتلری و بعضی شخصلرده پوتئنسیال اولاراق، بو قابلیتلرین مؤوجود اولماماسی حاقدا دانیشدیق.
دئمه‌لییک، سسده بعضی چاتیشمازلیقلارین معالجه ایله، بعضی‌لرینین ایسه تمرین و تکرارلا آرادان قالدیریلماسی مومکوندور. میثال اوچون بوروندا یا سس تئللرینده پولیپین اولماسی پروبلئمی، معالجه ایله، سسی گوجلندیرمک و دوزگون نفس چکمک ده تمرین و تکرارلا مومکوندور.
بیز وجودوموزون ساغلاملیغینا و ظاهری گورونوشوموزه دقت یئتیردییمیز قده‌ر، سسیمیزین ده ساغلاملیغی و یئتیشدیریلمه‌سینه دقت یئتیرمه‌لییک. یاخشی سسلی بیریسینی دینله‌دیکده انسان اؤزونو راحات حیس ائدیر و روحونو اوخشاییر. عکسینه، کؤتو بیر سس گاهدان اونسیته مانع اولور و هم دانیشانین اؤزونه هم ده دینله‌ییجی‌یه منفی تاثیرلر بوراخیر. البته کی،بو اکثر حاللاردا انصافدان اوزاق اولور؛ نه ایسه بیز بورادا سسین تاثیری و اهمیتیندن دانیشیریق.
سسیندن بیر مهارت کیمی فایدالانان هر بیر شخصه، بیر سس ایدمانچی‌سی دا دئمک اولار .هر بیر ایدمانچی مشق و یا یاریشا باشلامادان اونجه بدنینی ایستی ساخلامالی و عَضَله‌لرینی حاضیرلیق حالینا گتیردیی کیمی، سسیندن فایدالانان هر بیر شخص ده سس عضله‌لری و سس جیهازلاریندا بو حاضیرلیغی یاراتمالیدیر.
بورادا یازی ایله ایضاح ائتمه‌سی مومکون اولان بعضی نؤقطه‌لره اشاره ائدیریک.
دیکلمه، چیخیش و یا سسله باغلی هر بیر ایشه باشلامازدان اؤنجه، شخص بوینونون هر ایکی طرفیندن، سس عَضَله‌لرینی اللری ایله سیغاللامالی و راحاتلیقلا نفس آلمالیدیر؛ چیینلرینی مختلف سمتلره فیرلاندیریب یاواش- یاواش حرکت وئرمه‌لیدیر.
بیر قده‌ر ایلیق سو ایچیب دیلینی آغزیندا حرکت وئریب ائشیگه چیخارتمالیدیر. نئچه دفعه اسنه‌ییب دوداقلارینی آچمادان، بعضی سسلری یاواش یاواش تلفظ ائتمه‌لی و سس تئللری‌نین تیتره‌ییشینی حس ائتمه‌لیدیر.
تاپشیریقلار:
۱.دوزگون نفس آلماغی اؤیره‌نین:
دیکلمه، چیخیش، آپاریجی‌لیق و یا حیاتی اهمیت کسب ائدن گوروشلر و دانیشیقلاریزدا نئچه دؤنه دریندن نفس آلماق سیزین استرسدن اوزاق دینج و اوره‌یی اوخشایان سسله دانیشماغیزا یاردیم ائده بیلر.
۲.دانیشیغیزدا آغیز بوشلوغو و دوداقلاریزدان نهایت درجه ده و انرژی ایله فایدالانین. بونون تمرینی اوچون بیر جمله سئچین و اونو ایکی فرقلی شیوه ده اوخویوب ساده‌جه جئب تلفونوزدان ضبط ائدین. بیرینجی دفعه اوزونوزه زحمت وئرمه‌دن آغزیزی آزاجیق آچیب دوداقلاریزی بیر بیرینه یاخین ساخلاییب اوخویون. ایکینجی دفعه آغیز بوشلوغوندان نهایت درجه ده فایدالانین و دوداقلاریزی لازیم اولان یئرلرده حرکت وئرین. بو دؤنه ده ضبط ائدیب دینله دیکدن سونرا، بورادا نه دئمک ایسته‌دییمیزی و بیر بیریندن فرقینی باشا دوشرسیز.
ایندی بو مدل دانیشیغی مشق ائتمک اوچون دوادقلاریزی اوچ مختلف حالتلرده آچیب یومماغینیز گره‌کیر و بو تمرین اوچون آشاغیدا یازدیقلاریمیزدان هربیرینی، دال بادال اوچ دؤنه دوزگون تلفظ ائدین:
ma_me_mə_mı_mi_mü_mu_mö_mo
۳.سس تئللرینیزین ساغلاملیغی و یئتیشدیریلمه‌سینه دقت ائدین.
سس تئللری عَضَله اولدوغو اوچون اونلاری باشقا عضله‌لر کیمی یئتیشدیریب، گوجلندیرمک مومکوندور و عکسینه ده بو عضله لره زیان ووران ایشلرین تکراری چوخ تهلکه یارادیجی اولا بیلر. بونون اوچون سس تئللرینه زیان ووران ایشلردن چکینک لازیمدیر.
آردی وار…
