آ بنؤوشه‌لر…
□ رامیز قوسارچایلی
نه چیچک گونودور، نه آری فصلی،
نه یازا گئدیرم، آ بنؤوشه‌لر…
بوکوب اوره‌ییمه بیر ساری فصلی
پاییزا گئدیرم، آ بنؤوشه‌لر…
بیر یاندا داغ‌لارین بیاض یوخوسو،
بیر یاندا قوش‌لارین ویداع اوخوسو،
اوشویور گوزومده خزل قوخوسو
آیازا گئدیرم، آ بنؤوشه‌لر…
حئیرتیم اووونمور گوللو اویوندان،
ایسلانیر تنه‌یین یاشیل سویوندان،
آسیلیب بیر گولون اسمر بویوندان
گودازا گئدیرم، آ بنؤوشه‌لر…
اسدیریر صبریمی او سیر سئودالار،
سرسری سئودالار، سفیل سئودالار،
قانیما سوسویوب قفیل سئودالار
او قیزا گئدیرم، آ بنؤوشه‌لر…
عؤمور آغ یول اوسته بیاض یازییمیش،
چوخو چوخدان گئدیب، قالان آزییمیش،
دونیانین سون نازی اؤلوم نازییمیش
او نازا گئدیرم آ بنؤوشه‌لر..
