چئویرن: ائلیار پولاد
ترجمه: ائلیار پولاد
ائلیار پولاد

هفته نین سون گونلری
ائلیار پولاد

۱-     دوردینجی گون – آخشام

هامی سوفره ماساسی نین آرخاسیندا شام یئمه یینده، آتا، آنا، قیز و بیرده اوغول. صحبت فیطیر بایرامیندان گئدیر. بیری دئییر جومه دیر؛ او بیریسی  هفته نین بیرینجی گونو.

آتا فیکیرلری ییغیر بیر یئره: قولاغ آسین، منجه فرقی یوخدور. جومه یا کی هفته نین بیرینجی. بیز صاباح گون اورتادان سونرا گئدیریک. آمما بیر شرطله : اگر فیطیر جومه گونو اولدو، گئری دؤنمه لی‌ییک.

 قرار قبول اولونور . هامی آتانین فیکرینی بیه نیر.

۲-     بئشینجی گون- آخشام اوستو ، هامی حیطده

هره بیر ایش گؤرور . آتا ماشینی یویوب ، شوشه لرین تمیزله ییر. آنا ائوی ساهمانا سالیب لازیم اولان شئیلری ماشینا قویور. قیزلا – اوغلان دا اوز چانتالارینی حاضیرلاییب، آتا- آنالارینا کؤمک اولورلار. نهایت هرنه اوز یئرینده قرار توتور.

ماشین یولا دوشور . هره اوز فیکیر دونیاسیندادیر . ائله تزه جه شهرده ن چیخمیشدیلار کی آتا دئییر:

خانیم بیزیم دورد- ساهات یاریم یولوموز وار. خبر وئر کی بئش ساهاتدان سونرا اورداییق. ائله ده اولور . یولون دؤنگه لرین احتیاتلا دؤنور، خطرلی دؤنگه لر گئریده قالیر. دوزنگاه باشلانیر. سوروجو یولون راحاتلیقین حیس ائده ره ک، سرعتی آرتیریر ، ساهاتدا  یوز – یوز اون سرعتیله یولا داوام ائدیر.

  ائله بو آن چوخ داوام چکمیر ، یول پولیسی قیرمیزی اعلان لا قاباغین کسیر:

 او ماشینی یولدان کنار ساخلاییب ،یول پولیسینین ماشینینا یاخینلاشیب سندلرین وئریر.

یول پولیسی سانکی بیر جانی یاخالاییب ، کوبود وغیر انسانی شکیلده اوتوردوغو یئرده اونا حده – قورخو گله‌ره‌ک بیر اییرمین لیک جریمه ایله سندلرین قایتاریر.

  اونون فیکری خارابلاشیر. عصبی حالدا ماشینا اوتورور. سرنشینلر هامیسی نیاران قالیرلار. بیر آز یولا داوام ائتدیکدن سونرا آنا باشلاییر:

   هئچ ناراحات اولما ایشدی اولدو.

آتا جاواب وئریر: من او جریمه یه ناراحات دئییلم . پولیسین  یئرسیز حرکتی منی یاندیریر.

ائله چوخ سؤزدن صحبتدن سونرا یئنه حال- احوال اولکی یئرینه قاییدیر . هامی مقصده فیکیرله شیر.  سوروجو یولونا داوام ائدیر. یئنه دولایی یولار احتیاتلا آرخادا قالیر. یئنه دوزنگاه باشلانیر. یئنه یول پولیسی، یئنه قیرمیزی اعلان. یئنه اییرمی مین تومن لیک جریمه.

سوروجو یول بویو دانشیر. عصبی و ناراحات یولونا داوام ائدیر.  خوشبختلیکدن هئچ بیر یامان حادثه اوز وئرمیر .

ساغ-سالامات آذربایجانین نهنگ شهری تبریزه چاتیرلار. تبریزین سیماسی و اونون گؤرکمی بوتون یولدا اولانلاری یاددان چیخاریر.

۳-     جومه گونو

تبریز شهرلرین شهری سایلیر. اونا گورا کی اؤزونه مخصوص بیر یئرده قرار توتور. اقلیم شرایطی اونو همشه بیرینجی‌لرده یئر وئریر. اونون تاریخی عابیده لری و دونیادا تانینمیش سیمالاری عوضسیزدیر. شهرین هر دؤنگه و کوچه سی جانلی اولاراق سنله دانشیر. جسارتله دئیه بیله رم بو شهر اؤزو بیر تاریخی عابیده دیر. اونون هر بیر داشی سنه بیر کتابدیر، اگر اوخویا بیله سن. چرنداب- سورخاب- چای قیراغی – قولله قفسی (ایندی اوندان اثر قالماییب) –مارالان – ششگلان – سامان بازاری- ثقه الاسلام ائوی- مشروطیت ائوی- ساهات مئیدانی – بلدیه بیناسی- ستارخان ائوی( ساتیلیب – سوولوب ایندی آرتیق بیر اوچوق خارابا قالیر) گوی مچید- قونقا باشی – شاعیرلر مقبره سی- قاجار موزه سی – آذربایجان موزه سی – گولوستان باغی – عاشیقلار قهوه خاناسی ( ایندی سوز – ساز مجلیسی قورولمور)-ائل گولو- کؤهنه بازاری  و باغلار باغی- وشیرین دیل قوناق پرور اهالیسی.

  شام یئمه یندن سونرا ائوین خانیمی (تبریزین اورتا مکتب معلیمه سی) دئییر :

    –  یئنی یئتمه لر بو آخشام منه قوناقدیلار.

    الینده  ایکی ده نه بیلئت جمعه قوشولور و آرتیریر:

–       تبریز بلدیه سی فیطیر آخشامی یئنی یئتمه لری بو بیلئتلرله پولسوز “باغلار- باغینا” دعوت ائدیب.

هامی اورررا چکه رک تبریز بلدیه سینی آلقیشلاییر .

نهایت سگیز نفر اولوب، یولا دوشوب، باغلار- باغینا  گئدیرلر. هر نفردن دؤرد یوز تومن آلیب، ایچری بوراخدیلار. هر اویونجاغا یاخینلاشدیلار دئدیلر کی  او بیلئت اورایا شامیل اولمور.

نهایت بیلئتین گرکسیز اولدوغونو باشا دوشوب بیر زیبیل قابی‌یا تولادیلار. او بیلئتلر واسیطه سیله او قده ر اینسان گلمیشدی کی او بویدا ییرمی ایکی هکتارلیق اراضی ده ایینه آتسایدین یئره دوشمزدی. یئنی یئتمه لرله ده کی باجارماق اولماز، مومکون قده‌ر جیبلرینی بوشالتدیلار. آرغین – یورغون گئجه نین یارسی ائوه دؤندولر.

۴-     هفته نین بیرینجی گونو (فیطیر بایرامی)

گئجه نین یورغونلوغوندان هامی یوخویا قالمیشدی. سحر یئمه ییندن سونرا قوناقلار حاضیرلاشیب، ائو صاحیبیندن تشککور ائدیب یولا دوشدولر. آمما بو دؤنه سوروجو چوخ احتیاط ائدیردی. آخی او مالی جهتدن  اورتاق بیر یاشام دا ایدی . اونون بو ولخرج لیگی اونا آغیر باشا گلیردی. گزمه یه چیخماق اوسته گل ایکی ده نه ییرمین لیک جریمه.

یاواش – یاواش شهرلر و دولایی یولار آرخادا قالیردی. ائله اؤز شهر لرینه بیر اون- اون بئش کیلومتر قالیردی کی ، یئنه پولیس، یئنه کوبود حرکت، نهایت اوچونجو ییرمی مین‌لیک جریمه .

او عصبی و گرگین وضیتده کوچه قاپیسین آچاراق تبریز بلدیه سی و یول پولیسینین عینی نیت‌لرینی دوشونوردو.

                                ۲۱/۷/۸۶

 

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

هفته‌نین سون گونلری/ ائلیار پولاد

ائلیار پولاد
www.ishiq.net

آذربایجان ادبیات و اینجه‌صنعت سایتی

هفته‌نین سون گونلری/ ائلیار پولاد

ائلیار پولاد
www.ishiq.net

آذربایجان ادبیات و اینجه‌صنعت سایتی

هفته‌نین سون گونلری/ ائلیار پولاد

ائلیار پولاد
www.ishiq.net

آذربایجان ادبیات و اینجه‌صنعت سایتی