اوستاد حبیب فرشباف بیر باخیشدا
رضا همراز
آذربایجانین چاغداش ادبیاتیندا حجب و حیا و متانتی ایله تانینان اوستاد حبیب فرشباف‌دان یازماق بیر او قدر ده راحات نظره گلمه‌سین. نییه کی بو کیمی انساندان یازان منجه اؤزو کیمی متانتلی و بیر کلمه‌ده ادب سیمکه‌سی اولمالی‌دیر. نه ایسه بو دؤنه ایش تام عکسینه اولوب، نئیله‌مک کی بو قانی ایستی انسانلا بیر نئچه دؤنه مصاحب اولدوغوموز سبب اولموشدور کی بیر چوخلاری کیمی بیزده حبیب معلمه وورغون اولوب اوندان یازماق هوسینه دوشدوک. بو سئوگیمیزی بیان ائتمه‌یه منجه بیر نئچه سطیر یازماق بیر او قدر ده یئرسیز اولا بیلمز.
گونش ایلی ۱۳۶۴ ینجی ایللردن ائله ادبیات هوسکارلاری ایله دوشوب – چیخیب اونلارین بیر سیرالاری ایله ده یاخیندان اولموشام. اصلا یادیما گلمیر کی بیر کیمسه بو گونه قدر اوستاد حبیب فرشبافین آدی گلنده اوندان چیرگین بیر سؤز یا خاطیره دیلینه گتیره. هامی‌لار ائله اوستادین آدی گلنده بیر تهر سلام – صلوات‌لا اونو یاد ائتمیشلر. مع‌الاسف من بو اوجسوز – بوجاقسیز وادی‌یه آیاق قویان ایلدن تقریباٌ بیر ایل اول، یعنی ۱۳۶۳ اونجو ایل اوستاد فرشباف تهرانا انتقال تاپمیشدیر.
حبیب آقا فرشباف گونش ایلی ۱۳۲۳ ایلینین گول – گولو دیندیرن یاز فصلی‌نین اردیبهشت آییندا تاریخ له یاشید اولان تبریزین صفالی و باغ – باغاتلی محله‌لرینین بیریسی اولان باغ مئشه ده آنادان اولوب، ائله گنج چاغلاریندان ذکالی بیریسی کیمی تانینیب، او دؤورون مفکوره‌لی انسانلاری ایله اوتوروب دوروماغی سبب اولموشدور کی، حبیب‌آقانین دا گؤزو آچیلیب و ائله چوخ ائرته چاغلاری یاخشینی – پیسدن سئچسین. بو یازیچی و شاعیریمیز اوزو بیر یئرده اوزوندن بئله ذکر ائدیر: «دیپلوما قدر تحصیل آلدیم. سونرا معلم آدی ایله قاراداغا یوللاندیم. اون ایلدن آرتیق قاراداغ کندلرینده قالدیم. اؤیرندیکلریمدن قات – قات آرتیق قاراداغلی‌لاردان اؤیرندیم. دؤنه – دؤنه دونیا گؤرموش آنالارین، آت بئلینده عؤمور سورموش بالالارین مجلسینده اولدوم. اونلارین سؤزلرینی، نیسگیل‌لرینی قلمه آلدیم. بونلار آدیما شاعیر دئدیلر. »
بو آلچاق کؤنول اینسان همه‌شه اوشاق‌لا اوشاق اولوب، بؤیوک‌له ده بؤیوک اولار. بلکه ده ائله بونا گؤره دیر کی اونون سئورلرینین سایینا گونو گوندن آرتار. ۵۰ ایلدن یوخاری اؤیرتمن‌لییه باخان اوستاد حبیب فرشباف بوگون ثمرلی عؤمور – گونونون ۷۰ینجی پیلله‌سینده دایانیب، یئتمیش ایل گئری‌ده قالان آجیلی – شیرینلی سوووشان عؤمرونه شاهید اولاندا گؤره سن بو دؤنه نه آرزیلیر؟ منجه او یئنه دئییر کی، اگر یوز دؤنه ده دوغولوب، اؤلم، یئنه دونیایا گلم، سؤزسوز یئنه معلم‌لیک پئشه‌سین اؤزومه سئچه‌رم. معصوم اوشاقلارلا اولماغین لذتین ائله حبیب فرشباف کیمی آزاده انسانلار منیم کیمی‌لرده تئز باشادوشرلر .
نزاکتلی دوستوموز، شرافتلی بیر انسان اولدوقدان دولایی، گؤزل ناثر و گؤرکملی بیر شاعیر ده اولموشدور. سؤزلریمیزه آیدین آیت آنادیلیمیزده کی دؤورو مطبوعاتیمیزلا اونون بو گونه قدر گون ایشیغینا چیخادیریلمیش ایکی کیتابی‌دیر کی اونلاری دا بورادا تانیتماق داها یئرلی اولار. اوستاد فرشبافین ایلک کیتابی « دان یئری » دیر کی انقلابدان سونرا ائله شاعیرین دوغولدوغو یئرده نشر اولوب، آز بیر زاماندا نسخه‌لری توکنمیشدیر. داها سونرا ایسه «قاراداغ کندلرینده» آدلی کیتابی نشر اولونور .آنجاق بو نشردن سونرا نه سبب‌لره گوره شاعیر داها کیتاب نشر ائتمکدن واز کئچیب، یالنیز اوخوماغا داها آرتیق رغبت گؤسترمیشدیر. اونون چاپ اولان اثرلری آذری درگیسی، آذرتورک، کولتور و… کیمی دیرلی مطبوعاتیمیزدا دؤنه – دؤنه نشر اولا بیلمیشلر. سونرالار شاعیریمیزین ان یاخین امکداشی یاخود آرخاداشی سانیلان دوقتور مرتضی مجدفرین تشویق‌لری نتیجه وئریب، اوستادین اوشاقلاریمیزا عاید بیر شعر دفتری ده چوخ گؤزل کیفیتده نشر اولابیلدی. ماراقلی دیر کی همین اثرین قابیغینین طرحین ائله اوستادین باجاریقلی و هنرمند قیزی وقار خانیم طراحلیق ائتمیشدیر. اوستاد فرشبافین هله اوندان بیر اثرلرینین چاپینا شاهید اولان بیر سیرا باشقا اؤلکه‌لرده یاشاسالاردا، اللرینه دوشمک هامان، باغیرلارینا باسیب حتی اونلارا عاید بیر سیرا یازی‌لاردا یازمیشلار. بو یازی‌لارین بیر سیراسینی گؤره بیلمه‌سک ده، خوشبختلیک‌له بیر قیسمینین اوخوماغینا توفیق تاپا بیلمیشیک.
بو بؤیوک انسانین تواضعکارلیغی سبب اولموشدور کی دؤنه – دؤنه ایسته‌دیگیم خواهیشلر داشا دیسین‌لر! من اوندان تکرار ایسته‌میشدیم کی اؤز خاطیره‌لرین قلمه آلسین. داها دوغروسو دیلیمده توک بیتمیشدیر. آنجاق او همه‌شه بویورموشدو: «من هارا بؤیوک‌لردن یازماق هارا !! » دوغروسو اوستاد اگر همت ائدیب صمد بهرنگی، بهروز دهقانی، مناف فلکی، علیرضا نابدل ایله اولان آنلارین یازسالار، چاغداش تاریخیمیزده کی سیاسی– اجتماعی بوشلوغون بیر قدری آزالاجاقدیر.
۱۳۷۳ اوچونجو ایل اوستادین ۵۰ یاشی و ۳۰ ایل معلم‌لیگی عزیزلنیر. هابئله اون ایل سونراسی دا ائله ۶۰ یاشا دولماسی عزیزلنیر. ۱۳۹۰ ینجی ایل تکرار اونون اوشاقلارا عاید چالیشمالاری ۳۰۰ دن چوخ اوشاقلارین حضورو ایله عزیزلنیر. بیر ایل سونرا بو شاعیریمیزین «اوشاق نغمه‌لری» کیتابی اوشاق باغچالاری، کودکستان و دبستان اوشاقلاری ایچون شعر مجموعه‌سی «پیشگامان پژوهش مدار » نشری سیراسیندا ۳۶ صحیفه ده اعلا کیفیتده، اوستادین قیزی‌نین رساملیق‌لاری و طراحلیق‌لاری اساسدا نشر اولونور. کؤنلوم ایستر بورادا همین دفتردن بیر شعری تقدیم ائدم:
قاییدارکن مدرسه‌دن
سلام وئردیم آتاما من
آتام دئدی: قیزیم گلدین؟
سؤیله گؤروم نه اؤیرندین؟
دئدیم، آتا بیر قولاق آس
فارس‌لار دئییر اوراغا داس
اؤیرنمیشم الیف ب یی
اوخویورام من هر شئیی
بو بابا دیر باخ بو دا آب
بو آت، بو دیش، بو دا جوراب
اؤیرنمیشم بخش ائتمه‌یی
دئییرسنسه دئ هر نه‌یی
اللریم له پارچالارام
سسلرینی من سایارام
سسلر دیجک قولاغیما
گتیره‌رم بارماغیما
آتام دئدی: « بو آلمانی
بیر پارچالا گؤروم هانی ؟»
آلمالاری گؤرن چاغی
گتیردیم من تئز پیچاغی
بونو گؤرجک آتام گولدو
ائله گولدو، ائله گولدو
گؤزلریندن یاش تؤکولدو
دئدی : قیزیم کیلاسدا سن
ائله بئله بخش ائدیرسن؟
اؤز یئریمده دایاندیم من
آتامدان برک اوتاندیم من .
سؤزومون سونوندا حبیب‌آقا فرشبافین، آذربایجاندا اوز وئرن دهشتلی زلزله‌ده کی زحمتلرینی ده اونوتماق ایسته‌میرم. او، آیین یاریدان چوخون زلزله ویرمیش یئرلرده اولوب هنرمندلری و باشقا خیر آداملاری توپلاماق‌لا، زلزله گؤرموش‌لره توختاقلیق وئرمک ده بؤیوک رول اوینامیشدیر. بو کیمی شریف انسانا اوزون عؤمورله توام جان ساغلاملیغی آرزیلیرام.
بو کیچیک یازیمیزدا یارارلاندیغیمیز قایناقلار :
۱- اوشاق نغمه‌لری، حبیب فرشباف آقایی – تهران، پیشگامان پژوهش مدار ۱۳۹۱
۲- یارین اوشاقلار قروپو، بئشینجی سایی، تبریز، ایل بایرامی ۱۳۹۲ –اوستاد حبیب فرشباف کیم دیر ؟ سالار ترابی
۳- A4 بویوندا « اوشاقلار باغچاسی » عنوانلی بیر شعر دفتری گویا چاپ اولانماییب و ماراقلانانلار اوز سلیقه‌لری ایله بو دفتری توپلامیشلار. دوستوم محمد الفت ین کیتابخاناسیندا بو کیتابا راستلاشدیم. دئمک همین کیتابین یوزه دوخسان فایزی ائله بیرینجی قایناقدا آدین چکدییمیز کیتابا داخیل ائدیلمیشلر.
یک پاسخ
من چوخ خوشحالام کی استداد حبیبینن همکلاسیدیم چوخداندی اونی گورممیشدیم بوسعادت منه اوز ویردی بیرمدت قاباخ اولاری زیارت الذیم شاید بیرساعت کی اوننان باهمیدیم تمام عمریمینن برابر ساییلا