ای سئوگیلی یوردوم یاشاییر سنده مین آمال
سنسیز آچا بیلمز بو خیالیم قوشو هئچ بال
ای شانلی وطن، شاعری بو گنج چاغیندا
سن ساخلامیسان ایستی محبت قوجاغیندا
من فخر ائدیرم سنله کی دوغما وطنیمسن
باغیم، چیچه‌ییم، لاله‌لی گولگون چمنیمسن
ذکرین بو دیلیمدن دوشه بیلمز سن آنامسان
سنسن منه جاندان دا عزیز دوغما آتامسان
سنسیز یاشاماق خیلی مصیبت‌دی جهاندا
سن ساخلامیسان جانیمی عشقینله آماندا
عشقین منه عالمده بؤیوک شان و جلال‌دیر
سنسیز ایشیم هر یاندا بوتون آه و ملال‌دیر
«شیدا» سنین عشقینله بئله تازه جوان‌دیر
فخر ایله دئییر: تورپاغیم آذربایجان‌دیر.
منبع: «آذربایجان» آیلیق اجتماعی، سیاسی و ادبی مصور مجموعه (نومره ۱)
آوغوست ۱۹۴۵ – (مرداد ۱۳۲۴)
