آچیرام قاپینی خیالین گلسین،
ال- اله دولانیب،گولک بیر داها.
ساچلاریم اویناسین بارماقلاریندا،
اوینایاق، دانس ائده‌ک، اؤلک بیرداها.

تای اولاق سحره، بولوتسوز هاوا
نه‌ یاغینتی اولسون، نه ده کی دومان.
سیلک دوداقلاردان آیریلیق سؤزون،
دیرناغین اوجوجا قالماسین گومان.

اولسادا، دووارا دایاناق گولوم،
اولسادا، دایان سن کلمه‌لریمده!
داریخار سطیریم، داها دؤزمه‌رم
اؤلومو اؤلدور سن نغمه‌لریمده!

یوخون دا، یوخوم دا یوخوسوزدو ها!
یوخوندا بیر ایاق دولانیر، منم.
دوشسم ده یاناقدان دوداقدان یئره
گلیرم،گوزلرین سولانیر، منم.

آچیرام قاپینی، یاناغین یولوم،
گلیرم دایانام دوداقلاریندا.
سن دانیش، سن دانیش، باغیشلا منی
سؤزلریم قالیپدیر یاناقلاریندا!

قاپینی – باجانی باغلا من قالیم
بو یاتاق منیمدی، بو اوتاق منیم.
چیخاردیم بیر سنی یازیلاریمدان
او یاناق منیمدی، او دوداق منیم.