مظفر درفشی اؤلمزدیر…
(آذربایجان ادبی-مدنی درنک‌لری‌نین بیاننامه‌سی)
دونیا سندن کیملر کئچدی!
ازلدن بئله‌دیر چونکی کائنات
جهان دائمی‌دیر عؤمور آمانات
الدن- اله کئچیر وفاسیز حیات
بیز گلدی- گئده‌ریک سن یاشا دونیا!
اؤلکه‌میزین اونودولماز اجتماعی– ادبی سیماسی، ۲۱ آذر نیشانلی آذربایجان اوغلو اوستاد مظفر درفشی (م.بشیر) دونیادان کؤچدو. «شاعرلر مجلیسی»نین یگانه یادگاری جیسمن سیرامیزی ترک ائتسه ده، ادبیات عالمینده، موباریز شعریمیزین اؤن سیرالاریندا اؤز نیشانی اولان اثرلری ایله یاشاماقدادیر.
آذربایجانین، بوتونلوکله ایرانین اؤتن ۷۰ ایل بویونجا، ائله مهم بیر حادیثه‌سی اولماییب کی مظفر درفشی‌نین اورادا ایزی و نیشانی اولماسین. او، عؤمور بویو اؤلکه‌میزین سعادتی، ایران داخیلینده یاشایان خالقلارین خوشبختلیگی، قارداشلیغی و بیرلیگی اوغروندا چالیشمیشدیر. دونیادا صولح و آزادلیق و اجتماعی عدالت اوغروندا گئده‌ن موباریزه‌نی اورکدن آلقیشلامیش و بو یولدا اؤز قلمینی بیر آن دا یئره قویمامیشدیر. اؤلکه‌میزین ادبیاتی و ائولادلاری‌نین تربیه‌لنمه‌سی اوغروندا بیر شاعر، ژورنالیست، معلیم کیمی وار قوه‌سی ایله امک صرف ائتمیشدیر.
او گنجلیگینده، «شاعرلر مجلیسی»نین استعدادلی عضوو، معلیم‌لر دانشسراسی‌نین معاوینی و…س وظیفه‌سینده چالیشمیشدیر.
۳۰- ینجی ایللرده اینگیلیس استعماری علیهینه قورتولوش اوغروندا گئده‌ن موباریزه‌نین سیرالاریندا بیر اجتماعی و ادبی فعال کیمی بؤیوک هوس و ایراده ایله چالیشمیشدیر. تهراندا نشر اولونان نشریه‌لرین یارانماسیندا اوستاد بهزاد بهزادی ایله بیرلیکده «بشیر آینده»، «بشریت» و «آذربایجان» روزنامه‌لری‌نین داخیله مدیری کیمی ایشله‌میش و آذربایجان انجمنی‌نین یارانماسیندا میثیلسیز خدمتلری اولموشدور. بو مبارزه ده، آمریکا – اینگیلیس و دربار طرفیندن ترتیب ائدیلمیش کودتا اثرینده دئوریلن دوکتور مصدق‌ین میللی حکومتیندن سونرا سورگونلره، زندان‌لارا معروض قالان مظفر درفشی (م.دؤنمز) مبارزه عزمینی ایتیرمه‌دن اؤز آرمانی و اینامینا صادق قالمیشدیر .
انقلابدان سونرا دا استاد درفشی فعالیتینی داهادا آرتیرمیش. «آذربایجان انجمنی» یئنی‌دن قورولاندان سونرا اونون مدیره هئیتینده چالیشمیش و «انجمن» آدلی درگی‌نین باش یازاری و مدیری کیمی ادبیاتیمیزین چیچکلنمه‌سی اوغروندا دیرلی آددیملار آتمیشدیر و ائله‌جه‌ده ۷۰ینجی ایللرین اولیندن فعالیته باشلایان «صابر ادبی انجومنی»نین صدری و هابئله باشقا ادبی انجومن‌لرین او جمله‌‌دن «ساهر ادبی- مدنی درنه‌یی»نین و «آذربایجان ادبیاتی اوجاغی»نین آغ ساققاللاری سیراسیندا بؤیوک حؤرمته مالک شخصیتلردن و ایران یازیچی‌لاری اوجاغی‌نین اعتبارلی عضولریندن اولموشدور. اوستاد عینی حالدا مطبوعاتی فعالیتیندن ده ال گؤتور‌مه‌میشدیر. صابر انجومنی‌نین داخیلی درگیسی‌نین مسؤل مدیری و باش یازاری و ائله‌جه ده «آذری مجله‌سی»نین تحریریه هیئتی‌نین عضوو کیمی چالیشمیشدیر.
موباریزه اعتباریله آذربایجانین آدلیم عائله‌لریندن اولان مظفر معلیمین اؤلمز خاطیره‌سی – بیر دیرلی وطنداش، مباریز شاعر، متین اجتماعی شخصیت، آلچاق کؤنوللو بیر انسان، اؤتکم بیر آغ ساققال کیمی- اونون یولونو دوام ائتدیرن شاگیردلری و قلمداشلاری‌نین اوره‌یینده یاشایاجاقدیر.
اوستادین اؤلمز و پارلاق خاطیره‌سینه عشق اولسون!
- صابر ادبی انجومنی
- ساهر ادبی- مدنی درنه‌یی
- آذربایجان ادبیاتی اوجاغی
- «آذری» درگیسی
- «ایشیق»- آذربایجان ادبیات و اینجه‌صنعت سایتی
- خدافرین ادبی انجومنی
- دده قوربانی ادبی انجومنی
- آراز ادبی انجومنی
- قاراداغ ادبی انجومنی
- چیچک‌لر قورولوشو
- ماوی چیچک‌لر درنه‌یی
- آذربایجان مدنی درنک‌لر بیرلیگی
- کرج‌ده یاشایان آذربایجانلی‌لار درنه‌یی
- اندیشه نو (فرزانه) انتشاراتی
۱۸ بهمن ۱۳۹۳
یک پاسخ
آنا وطنیمیزین دیزلی اوغلو رحمت لیق اوستاد مظفر درفشی نین دونیاسین دیشمه سینی بوتون آذربایجان ملتینه اوجمله دن صابر انجمنی، نباتی انجمنی، آراز انجمنی(کرج ده یاشایان تورک دیللیلر) تسلیت دئیب وقالانلارینا باش ساغلیغی دیله ییرم. اوستاد مظفر درفشی آذربایجان ادبیاتینین پارلاق اولدوزو انقلابدان سونرا ۱۳۵۸ اینجی ایل ، تبریز ده قورلان شاعیر ویازیچیلار جمعیتی که رحمت لیق هلال ناصر باشچی لیغی ایله دولانیردی. دانشسرا خیاوانیندا تربیت کتابخاناسیندا تشکیل ولوردو اشتراک ائدردی . او زامانلار من گنج اولدوغوم اوچون وهابئله چاپخانا صاحبی اولدوغوم دان ، شاعیر لر مجلیسینین ارگانی ، “اولکر” مجله سینی نین چاپ اولماسی منیم عهدمه ایدی. او انجمنین اصلی وریشه لی عضولری، فرقه زامانی بناسی قویولان شاعیرلرمجلسی نین عضولری ایدی. اوستاد هلال ناصر، عباس صابری ، یحیی شیدا، استادبارز، آهنی ، دکتر مبین ویئنی یئتمه شاعیرلردن :حسین شهرک ، صدیار وظیفه( ائل اوغلو) دکتر حسین فیض الهی (اولدوز) ، حیدر عباسی، حمید احمدزاده، دکتر باقر صدری نیا، علیرضا ذیحق، وباشقالاری اشتراک ائدردیلر. اوستاد مظفردرفشی او مجلیسده تبریزین “عین آلی” داغینا حصر اتدیگی شعری اوخویوب ، انجمنی بیر آیری حال وهاوایا آپاردی. الله او کیشی نین روحون شاد ایله سین ویولون داوام لی. واکدیگی گوللر ثمر وئرسین.