“مدرنیته و مدرنلیک” کیتابی یاییملاندی
همت شهبازی طرفیندن اویغونلاشدیریلان و پردیس یاییم ائوی طرفیندن 174 صحیفه‌ده نشر ائدیلن “مدرنیته و مدرنلیک” مقاله‌لر توپلوسو کیتابی یاییملاندی. کیتابا دونیانین تانینمیش یازیچیلاریندان مقاله‌لر داخیلدیر. کیتابین گرافیستی رضا غفاری(آتیلا دورباشلی)، نشره حاضیرلایانی‌ایسه شاعر سعید موغانلی‌دیر.
کیتابی حاضیرلایان جناب همت شهبازی اونو بئله تانیتدیریر:
“کیتاب، مدرنیزم قونوسونو چئوره‌ین توپلو مقاله‌لردیر. کیتابا دونیانین آدلیم یازارلاری‌نین یازیلاری داخیل ائدیلیبدیر. کیتابدا یئرلشن مقاله‌لر، اساسن مدرنیزمین توپلومسال و یازینسال بویوتلارینی (ابعاد) آچیقلاییر. بو باخیمدان “مدرنلیک” بیر آخیم (مکتب) اولاراق “مدرنیزم” قارشیلیغیندا، “مدرنیته” ایسه، بعضی اؤزللیک‌لرینه گؤره رونئسانس و رومانتیزم آخیمیندان فرقله‌نن بیر سورج کیمی کیتابدا نظرده توتولوبدور. یعنی مدرنیته عمومیتله بیر دورومدورٰ بیر چاغدیر. بو دوروم و چاغدا انسان اؤزونو و توپلومسال گلیشیمینی ایره‌لی سورور. مدرنیزم ایسه، بو چاغی و دورومو یارادان آخیم و چئشیدلی حرکت‌لرین سیمگه‌سی‌دیر. بئله‌لیکله کیتابدا اوچ سؤز بیر کؤکدن اولماسینا باخمایاراق هر بیریسی اؤزونون اؤزللیک‌لری ایله سئچیلیرلر. بونا گؤره “مدرن”، “مدرنلیک= مدرنیزم” و “مدرنیته” بیر بیریندن فرقلی قاوراملار کیمی کیتابدا چئشیدلی سورجده آچیقلانیرلار. کیتابین چئوره‌دییی قونولارین آغیرلیغینی نظره آلاراق حتتا پروفسیونال اوخوجلار اوچون چتین‌لیک تؤره‌دن بیر سیرا اصطلاحلارین ایشلنمه‌سینه شاهید اولاجاقسینیز. بونو نظره آلاراق هر بیر تئرمینین ایلکین قوللانماسی‌نین قارشیسیندا او تئرمینین آنلامی [ ] آراسیندا وئریلیبدیر. بو آنلاملار بعضن تورکجه، بعضن فارسجا وئریلیبدیر. بوندان مقصد یالنیز تئرمینین هر نئجه اولورسا اولسون آنلاشیلاسی اولماسی نظرده توتولوبدور.”
“مدرنیته و مدرنلیک” کیتابیندا گلن مقاله‌لرین عنوان و یازیچیلاری بونلاردیر:
• گله‌نک و مدرنلیک : حیلمی یاووز
• مدرنلیین باشلانغیجی : علی آکای
• مدرنیزم : گوردون مارشال
• “آيدينلانما نه‌دير؟” سورغوسونا جواب : ايمانوئل کانت
• مدرنلشمه سورَجي‌نين ائورنسل اؤزلليكلري: دوكتور جميل اوکتاي
• مدرنليين اؤزلليكلري و گليشمه‌سي : ايلهان تکلي
• مئتروپول آلغيلاري و مدرنيزمين دوغوشو : رايموند ويليامز
• اؤزگه‌لشمه، صنعت و فلسفه: نيلسون اوراللي
• مدرنيته‌ني يئنيدن آلغيلاماق: ايدئولوژي‌سيزلشمه : علي آکاي
• مدرنليك: دونن، بوگون و صاباح : مارشال بئرمان
• مدرن يانيلسامالار و اؤزگورلوک پارادوکسو: رمضان قايا
• ايره‌ليلَمه و ايکينجي مدرنليک : احمد اينسل
• مدرنيته: سونا وارماميش بير سورَج : يورگئن هابئرماس
کیتابی آذربایجانین اعتبارلی کیتاب ماغازالاریندان ائله‌جه‌ده آشاغیداکی عنوانلاردا الده ائتمک مومکوندور.
پارس‌آباد (موغان) شهری:
1- تراختور (پپاشاپور) کیتاب ساتیش ائوی 7232320- 0452
2- دانشجو کیتاب ساتیش ائوی
خییوو (مشکین شهر):
1- دنیز کیتاب ساتیش ائوی
اورمو شهری:
1- بوتا یاییم ائوی ۰۴۴۱ -۲۲۲۱۷۷۶
تهران:
1- اندیشه نو (فرزانه) کیتاب ماغازاسی