“مدرنیته و مدرنلیک” کیتابی یاییملاندی
همت شهبازی طرفیندن اویغونلاشدیریلان و پردیس یاییم ائوی طرفیندن ۱۷۴ صحیفه‌ده نشر ائدیلن “مدرنیته و مدرنلیک” مقاله‌لر توپلوسو کیتابی یاییملاندی. کیتابا دونیانین تانینمیش یازیچیلاریندان مقاله‌لر داخیلدیر. کیتابین گرافیستی رضا غفاری(آتیلا دورباشلی)، نشره حاضیرلایانی‌ایسه شاعر سعید موغانلی‌دیر.
کیتابی حاضیرلایان جناب همت شهبازی اونو بئله تانیتدیریر:
“کیتاب، مدرنیزم قونوسونو چئوره‌ین توپلو مقاله‌لردیر. کیتابا دونیانین آدلیم یازارلاری‌نین یازیلاری داخیل ائدیلیبدیر. کیتابدا یئرلشن مقاله‌لر، اساسن مدرنیزمین توپلومسال و یازینسال بویوتلارینی (ابعاد) آچیقلاییر. بو باخیمدان “مدرنلیک” بیر آخیم (مکتب) اولاراق “مدرنیزم” قارشیلیغیندا، “مدرنیته” ایسه، بعضی اؤزللیک‌لرینه گؤره رونئسانس و رومانتیزم آخیمیندان فرقله‌نن بیر سورج کیمی کیتابدا نظرده توتولوبدور. یعنی مدرنیته عمومیتله بیر دورومدورٰ بیر چاغدیر. بو دوروم و چاغدا انسان اؤزونو و توپلومسال گلیشیمینی ایره‌لی سورور. مدرنیزم ایسه، بو چاغی و دورومو یارادان آخیم و چئشیدلی حرکت‌لرین سیمگه‌سی‌دیر. بئله‌لیکله کیتابدا اوچ سؤز بیر کؤکدن اولماسینا باخمایاراق هر بیریسی اؤزونون اؤزللیکلری ایله سئچیلیرلر. بونا گؤره “مدرن”، “مدرنلیک= مدرنیزم” و “مدرنیته” بیر بیریندن فرقلی قاوراملار کیمی کیتابدا چئشیدلی سورجده آچیقلانیرلار. کیتابین چئوره‌دییی قونولارین آغیرلیغینی نظره آلاراق حتتا پروفسیونال اوخوجلار اوچون چتین‌لیک تؤره‌دن بیر سیرا اصطلاحلارین ایشلنمه‌سینه شاهید اولاجاقسینیز. بونو نظره آلاراق هر بیر تئرمینین ایلکین قوللانماسی‌نین قارشیسیندا او تئرمینین آنلامی [ ] آراسیندا وئریلیبدیر. بو آنلاملار بعضن تورکجه، بعضن فارسجا وئریلیبدیر. بوندان مقصد یالنیز تئرمینین هر نئجه اولورسا اولسون آنلاشیلاسی اولماسی نظرده توتولوبدور.”
“مدرنیته و مدرنلیک” کیتابیندا گلن مقاله‌لرین عنوان و یازیچیلاری بونلاردیر:
• گله‌نک و مدرنلیک : حیلمی یاووز
• مدرنلیین باشلانغیجی : علی آکای
• مدرنیزم : گوردون مارشال
• “آیدینلانما نه‌دیر؟” سورغوسونا جواب : ایمانوئل کانت
• مدرنلشمه سورَجی‌نین ائورنسل اؤزللیکلری: دوکتور جمیل اوکتای
• مدرنلیین اؤزللیکلری و گلیشمه‌سی : ایلهان تکلی
• مئتروپول آلغیلاری و مدرنیزمین دوغوشو : رایموند ویلیامز
• اؤزگه‌لشمه، صنعت و فلسفه: نیلسون اوراللی
• مدرنیته‌نی یئنیدن آلغیلاماق: ایدئولوژی‌سیزلشمه : علی آکای
• مدرنلیک: دونن، بوگون و صاباح : مارشال بئرمان
• مدرن یانیلسامالار و اؤزگورلوک پارادوکسو: رمضان قایا
• ایره‌لیلَمه و ایکینجی مدرنلیک : احمد اینسل
• مدرنیته: سونا وارمامیش بیر سورَج : یورگئن هابئرماس
کیتابی آذربایجانین اعتبارلی کیتاب ماغازالاریندان ائله‌جه‌ده آشاغیداکی عنوانلاردا الده ائتمک مومکوندور.
پارس‌آباد (موغان) شهری:
۱- تراختور (پپاشاپور) کیتاب ساتیش ائوی ۷۲۳۲۳۲۰- ۰۴۵۲
۲- دانشجو کیتاب ساتیش ائوی
خییوو (مشکین شهر):
۱- دنیز کیتاب ساتیش ائوی
اورمو شهری:
۱- بوتا یاییم ائوی ۰۴۴۱ -۲۲۲۱۷۷۶
تهران:
۱- اندیشه نو (فرزانه) کیتاب ماغازاسی
