چوخ تاسفله، تانینمیش آذربایجان شاعری رضا اسلام طلب اکبری(رضا ایتگین) چرشنبه گونونون سون آنلاری آذر آیی‌نین ۲۳ینده تبریز شهرینده دونیادان گؤز یومدو.

رضا ایتگین ۱۳۱۶ینجی گونش ایلینده یوخسول و زحمتکش بیر عائله‌ده تبریز شهرینین گامیش‌آوا محله‌سینده دونیایا گؤز آچدی. معیشت آغیرلیغی اونا مستمر تحصیل آلماق امکانی وئرمه‌دی و رضانین یئنی‌یئتمه‌لیک ایللری فرش دزگاهلاری‌نین دالیندا و توخوجولوقلا کئچدی. سونرالار گنج رضا اؤز معیشتینی تاکسی سوروجولوگی‌ایله تامین ائتمکه چالیشدی و ایللر بویو تبریز شهرینده تاکسی سوروجوسو صفتیله چالیشدی. انقلابدان سونرا او پئشه‌سینی دییشیب و باشماقچیلیقلا مشغول اولدو. بو پئشه‌ده رضا ایتگین سون ایللره‌دک چالیشدی و بیر آن‌دا اولسون منسوب اولدوغو زحمتکش صینفی‌نین آرزو – ایستک‌لرینی و پرابلئملرینی اونوتمادی.

رضا ایتگین هله گنج‌ایکن آذربایجان ادبیاتینا خصوصیله شعرینه ماراق گؤستردی. شعرلری مضمون اعتباریله انسان‌سئورلیک و بشری ایده‌آللاریلا دولغون و فورم آعتباریله آذربایجان شعرینین دوغما وزنی- هجا وزنینده و کلاسیک عروض وزنینده اولموشدور. انقلابین ایلک ایللرینده او تبریز ادبی انجومنلرینین فعال عضوی کیمی چیخیش ائدیردی. اثرلرینین بیر چوخو دؤرو مطبوعات خصوصیله استاد شیدانین تشبثوایله تبریز شهرینده نشر اولان “فروغ آزادی” روزنامه‌سی‌نین آذری صحیفه‌سینده یاییلیردی.

رضا ایتگین عؤمرو بویو چوخ صمیمی، انسان‌سئور، دوستلاری آراسیندا بؤیوک احتراما مالک، تبریز باشماقچی بازاریندا باشماقچیلار آراسیندا حؤرمتلی بیر شخصیت و آذربایجانین زحمتکش شاعری کیمی یازدی؛ یاراتدی و یاشادی. شبهه‌سیز اونون شرفلی خاطره‌سینی ادبی اجتماعیاتیمیز، تبریز زحمتکشلری و یاشادیغی محله ساکنلری هئچ واخت اونوتمایاجاقدیر.

بیز‌ده اؤز نؤوبه‌میزده، آذربایجانین سئویملی شاعری “رضا ایتگین”نین آغیر ایتگیسینی شاعریمیزین محترم عائله‌سینه، دوست تانیشلارینا، ادبی اجتماعیاتیمیزا و عمومیتله آذربایجان خالقینا باش ساغلیغی وئریریک و شرفلی خاطره‌سینی عزیزله‌ییریک.