ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

اوستاد «عاشیق حسین اسدی»(کیرشانلی) نین آنیم مراسیمی کئچیریلدی

خرداد آیی‌نین اونونجو گونو (۹۶/۳/۱۰) تهرانین نیاوران کولتور ائوینده، اوستاد ععاشیق حسین اسدی(کیرشانلی)نین آنیم مراسیمی آذربایجان عاشیق صنغتی وورغونلاری و شاعرلری‌نین اشتراکی ایله طنطنه‌لی کئچیریلدی. بو مراسیمده تدبیر اشتراکچیلارینین بیر سیراسی اوستاد عاشیقین یارادیجیلیغی و حیاتی باره‌ده دانیشیقلار آپاریب، صنعتکارین کئچیرتدیگی غؤمور یوللاریندان خاطیره‌لر دانیشدیلار. شاعر «افراسیاب نوراللهی»نین بو تدبیرده چیخیشینی ایشیق اوخوجولارینا تقدیم ائدیریک:
«بعضا انسانلارین حیاتیندان، کاراکتئریندن تک بیر بیلگییه صاحیب اولماق، اونلارین کیم اولدوقلارینی، یا گله جکده کیم اولاجاقلارینی بیلمک اوچون یئترلی اولور.
شاعیر ووقار نعمت عینی حالدا باجاریقلی ساز و تار ایفاچیسیدیردا. و هر ایکیسینیده اوستاد حسین اسدی یه بورجلودور. شاعیر ووقارین آتاسی فتحعلی عمی ‌اوستادلا لاپ جاوانلیقدان دوست اولوبلار. بیر گون فتحعلی عمییه قوناق اولموشدوق. گئجه صحبتیمیزین بیر قیسمی‌اوستاددان اولدو. فتحعلی عمی‌اوستاددان بیر خاطیره دانیشدی! اوستادی گؤرمه‌سمده، یاخیندان دوستلوغوم اولماسادا، تک او خاطیره، اونو تانیماق اوچون منیم بسیم اولدو!
دئییر؛ لاپ جاوان چاغلاریمیزدیر، تهراندا اولوروق؛ بیرگه، بیر منزیلده. حسینینده هوسلی واختلاریدی. بویوک بیر جیددیتله ساز اویره‌نیر، چالیر و دورمادان مشق ائلیر. دای گئجه گوندوزو یوخدور! آما نسه سازلار الینه قولونا یاتسادا، اوره‌یینه یاتمیر بیر تورلو! بونو قویور، اونو گؤتورور! اونو قویور، بونو گؤتورور! نه‌ایسه کی، او ایسته‌دییی سسی وئرمیر بو سازلارین هئچ بیری! و هئی “آخی نییه بو سازلارین هئچ بیری ععاشیق قشمین سازینین سسین وئرمیر” –دئیه، دئیینیر!
بیر گون آخشاملارین بیری منزیله گلمه‌دی! دئدیک؛ ایندی گؤره‌سن‌ هاردادیر؟! صاباحیسیدا اؤیله! اونون صاباحیسیدا ..! آرتیق نیگران اولماغا باشلاساقدا، آغلینا و شعورونا گووه‌نیمیز اوجوندان، ایچیمیزده راحات ایدی. یانیلماسام، بیر هفته، اون گون چکدی بو ایش! سونرا بیر آخشام گؤردوک کی، گلدی!
–هاردایمیش؟!
– عاشیق قشمین یانینا گئتمیش ایمیش!
– نه اوچون؟
– سازینین مشخصه لرینی اؤیرنمک اوچون!
دئییر؛ حسین گئدیب عاشیق قشم‌ین سازینین بوتون مشخصه‌لرینی دئتایلاریلا اؤیره نیب، یازیب گتیرمیشدی! باخ! چاناغینین نه بویدا اولدوغوندان توت تا سینه سینین نه گئنیشلیکده اولدوغونا قدر، تا بوغازینین نه اوزونلوقدا اولدوغونا قدر، تا پرده لرین یئرینه، سیم لرینین سایینا قدر، تا آغیر یونگوللویونه قدر‌ هامیسینی یازیب گتیرمیشدی حسین! تا سازبند اونون اوزویله اونادا ائله بیر ساز باغلاسین! تا بلکه او ایسته‌دییی سسی وئردی بو ساز!..
طبیعی کی، بو قشم اولماق و قشم کیمی‌ساز چالماق چاباسی آنلامیندا دئییلدیر! آما بو، حسین ین او، اقناع اولمایان بؤیوک روحونون و استعدادینین چاباسی آنلامیندادیر. طبیعی کی، او حسین، او جاوان حسین؛ او روحونون، ذوقونون عطشینی حله حله سازلار سوندوره بیلمه ین او حسین، بو گونکو دده حسین و اوستاد حسین اولاردی!..
سوندا بیر حالداکی، ساز مجلیسی دیر. ساز اوستادی مجلیسی دیر و سازدان صحبت گئدیر، یئری وار ساز حاقدا چوخ سئودییم ایکی بندلیک بیر شعر پایی دا اولسون.
ساز حاقدا چوخ شعرلر دئییلیب آما سهندین “سازمین سوزو” کیتابینین باشلانیشیندا دئدییی اوزون بیر شعردن بو ایکی بندین منده اوز یئری وار، اوخویونجا، سانکی اوزون دئمیش کیمی گلیر سنه؛
حله ده بیلمیرم بو سس، بو نغمه
هانسی دونیالاردان باش آلیب گلیر
نسیم یئللری تک دینده قلبه
بدنیم دینجلیز، روحوم یوکسلیر

اوزومده بیلمیرم هارادا، هاچان
روحوم بو عالمله آشنالیق قاتمیش
انجاق بیلیرم کی، اوزاق زاماندان
کونلومه دوغمادیر، قلبیمه تانیش..

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *