چئویرن: مجتبی نهانی
ترجمه: مجتبی نهانی
مجتبی نهانی

(۱)
بیر اَل چیینیمه ده‌یدی/فریبا مرتضایی
سئویشمک ایسته‌ییردین-
باهاریله
گوللو کؤینه‌ییمله-
گؤروشونه گلدیم
چیچک دولو کؤینه‌ییمله
بیر اَل چیینیمه ده‌یدی
چیچک‌لر سولدولار

(۲)
آلما/حمید مصدق
سن منه گولدون
و بیلمیردین
نه قایغیلا قونشونون باغچاسیندان-
آلما اوغورلادیم
باغچیوان دالیمجا تئز قاچدی
آلمانی الینده گؤردو
حیرصلی منه باخدی
دیشلنمیش آلما الیندن یئره دوشدو
و سن گئتدین و هله‌ده،
ایللردیر قولاغیمدا یاواش-یاواش
آددیملارینین خیشیلتیسی-
دؤنه- دؤنه اینجیدیر منی
و من دالغینلیقلا دوشونورم
نییه،
بیزیم کیچیک ائویمیزین-
آلماسی یوخ‌ایدی

(۳)
مین قیزیل گول قونچاسی/ ایرج صف شکن
پرده‌نی چکیرسن
یالقیز بیر گوزگو گؤرورسن
و آیی یاناقلارینا اوتوردان-
حئیران اللری
سن اینانیبسان بونا
و دوداقلارینی
اکیرسن
گوزگونون یانینا
ایندی
بیر گولدان قالیر
و بیر دوداق-
مین قیزیل گولون قونچاسیلا

(۴)
گئجه‌نین ان درین یئری/ رضا چایچی
جیبلرینی دولدور-
دان یئری و گونشدن
گئجه نین اَن درین یئرینده
سنین اینتیظاریندا اولان-
بیریسینین گوروشونه گئدنده…

(۵)
ایشیقلیق/بیژن جلالی
ایشیقلیق اوچون یازیرام
هر یئر، هر زامان-
قارانلیق اولسایدی
هئچ یازمازدیم

(۶)
دویغو/ هوشنگ ابتهاج
یاتاغیم
بیر یالقیزلیغین بوش صدفی‌دیر
و سن میرواری کیمی
باشقالارا بویونباغی‌سان

(۷)
کیشی‌لر گؤرموشم/صبا کاظمیان
آرخاسینداکی بوتون کؤرپولری ییخان-
او کیمسه،
قاییداجاقدیر!
من،
ایرماق-ایرماق آغلایان-
کیشی‌لر گؤرموشم

(۸)
آغلا/ رویا شاه‌حسین‌زاده
سن آغلا
اؤزوم قابلاری یویارام.
سن آغلا،
اؤزوم چایی دمله‌رم.
سن آغلا،
اؤزوم…
او زامان
سنه و اؤزومه-
چای تؤکه‌رم.
اوز-اوزه اوتوراریق
و دونیانین بوتون فایداسیز آغلامالارینا-
گوله‌ریک.

(۹)
تاماشاچی‌سیز کندیربازلار/فرشته ساری
سن
پنجره‌نی آچیب
خیاوانین کول اولماسینی گؤرمکدن قورخورسان
من
پنجره‌نی باغلاییب
اوتاغین اووولموش کپنک‌لرله دولماسینی گؤرمکدن قورخورام
بیز
قورخو قیراقلاریندا-
تاماشاچی‌سیز کندیربازلاریق.

(۱۰)
سن‌له جاده ال بیر سیز/ کیوان مهرگان
سنی دوشوندویوم زامان
جاده گلیر
جاده ده یئریدیییم زامان
یانیمدا دئییلسن
سن و جاده-
منیم یالقیزلیغیمدا ال بیرسیز

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

فارس شعریندن ترجمه‌لر (۳)

مجتبی نهانی
www.ishiq.net

آذربایجان ادبیات و اینجه‌صنعت سایتی

فارس شعریندن ترجمه‌لر (۳)

مجتبی نهانی
www.ishiq.net

آذربایجان ادبیات و اینجه‌صنعت سایتی

فارس شعریندن ترجمه‌لر (۳)

مجتبی نهانی
www.ishiq.net

آذربایجان ادبیات و اینجه‌صنعت سایتی