یئر باغیریر… گؤی باغیریر
حسن ایلدیریم
گؤيده اوچور
دمير قاناد بايقوشلار،
بايقوشلاري ايزله‌مکده
قورخو دولو
نیفرت دولو باخيشلار.
دمير قاناد بایقوشلارين
دیميديگيندن
جايناقيندان
راکت ياغير، بومبا ياغير،
قومپارالار فيشيلدايير،
يئر باغيرير
گوي باغيرير
باغير- باغير
بومبا یاغير
ياغير
ياغير.
بوغاناقدي آخار باخار
بوغاناقدا
کيرييیب‌دير گؤيرچينلر،
قارانقوشلار؛
دوشور يئره دسته- دسته
سالخيق قاناد بو باخيشلار؛
نه گليرسه گؤزلرينه قاچيشدادير،
دوداق‌لاردان
قيريق- قيريق گولوش اوچور
نغمه اوچور
هاراي اوچور
آخ واي اوچور؛
اورکلرین بوداغیندان قیریلیبان
آرزو اوچور
ايستک اوچور؛
ساپاغيندان
اوزولوبن
سئوينج ايله
کدر ايله
اوره‌ک اوچور؛
يوواسيندان قوشلار قاچير
قان بويالي بئشيگينده کؤرپه اوچور
اوشاق اوچور
ناغيل اوچور
بؤيوک اوچور
نلر اوچور، نلر اوچور؟
نه اوچورسا ملر اوچور.
اوچوشانلار
گؤي اوزونده توخونورلار بير بيرینه،
يیغيشیرلار
ياواش ياواش بولوت‌لارين بوز بئلينه؛
اوزلمکده يئر اوزوندن
بوغاناغين آياقلاري،
دوزولمکده دال بادالا
گؤي اوزونده بولوت‌لارين، تابوت‌لارين
تالا- تالا قايیق‌لاري.
قارا گئييب گوي مئشه‌لر، ياشيل داغلار
يئر يانيقلي، گؤی یانیقلی
بوردا نه وار آل قان آغلار؛
سيزلار، سيزلار اؤلولرين
بو قاطاري
هارا گئدير
هارا ساري؟
اؤلولرله دولاجاقدير گؤي اوزونون قبريستاني،
گئجه گوندوز
ديرلري ديده‌جکدير
يئر اوزونون چوپور جاني.
قارا قیرمیز تابوت‌لاري
آغير آغير يئل آپارير
اوره‌کلره سيغماز غمي،
بو ماتمي
آغلار گؤزلو ائل آپارير.