سنی گؤرنده
آیاغیم آلتیندا
جیریق خاطره‌لر
گؤینه‌ییر
سن دئمک دوست دئییلسن
یوخسا کیم گؤروب
یاغیش تورپاغین روحونا
زهر چیله‌سین؟
سسین گلنده
اود سؤنور
ده‌ییرمان داشی
گردیشیندن دایانیر
سن دئمک
سئوگی‌نین
چؤره‌یین
قتلینه فرمان کیمی سن
یوخسا قوش‌لارین
آستامینوفن نه‌یینه گره‌کدیر؟
قوی دوروم بیر آز
گؤی اوزونده گؤزدن ایتن
لاچین‌لاری سئیر ائدیم
بیر آز داغ دؤشونده
غرورلو ـ غرورلو یاشادیغیم ساعات‌لاری
و هده‌سیز یوخولاریمی.
یوخسا هاوانی قورشونلاشدیران حضورون
اؤزون اولماسان‌دا
جییه‌ریمی خسته‌لندیره‌جک.
میرعلی دئییر:
گون او گون اولسون
قاپینی دؤیوب، دئمه‌سینلر
ایکی دیقه سنینله ایشیمیز وار.