توخونما گؤزلویومه
قوی باخسین:
بونجا بؤجه‌‌‌ک!
بونجا کافتار!
ساریما بوینوما
ماتاهی ایدز اولان قول‌‌‌لارینی
گؤزلویوم گؤرور
سئوگی‌‌‌سیز اؤپوش‌‌‌لرین
داشیدیغی قودوز دویغولاری،
فلسفه ماسکاسی ووران
ماکیاولین ایرین‌‌‌لی گؤروش‌‌‌له‌‌‌رین.
یامان گؤیلومه دوشوب
یاغیشدان سونرانین هاواسی،
ال چک یاخامدان
جالانما سیرتیق ـ سیرتیق
بشقابیما، چاییما،
قوی قاتیغیمی یئییم،
آلیزلاییم بیر آز
قونشوم اوچون.
چکیل یولومدان!
گره‌‌‌ییم دئییل
بوروووز ایستکاندا
ناققا یوخوسو گؤرمک؛
منه پای وئره‌‌‌نده
موغان چؤلوندن وئر،
اورمو گؤلوندن!
