تاپدیغیم
مهدی خالد قراملکی
من
تاپ- تاپ دئین قلبیمین تاپماجاسینی تاپان زامان
اؤله‌جه‌یم!
و گؤزلریمین باتان گونشیندن سن دوغولاجاقسان،
کورپه بیر شاعیر،
و
ایتی باخیشلی بیر فیلسوف؛
دئمک کی،
ایگیرمی یئددی ایل آختاردیغیم تاپماجانین جوابی
سنسن!
و
سنینده اوره‌یین تاپ- تاپ دئیه‌جک،
سن ده آختاراجاقسان ،
و
تاپا بیلسن،
منی تاپاجاقسان؛
اپریمیش بیر دفترده جیزیلمیش بیر نئچه خط شعیر،
یادا
ساچلارینا دن دوشموش بیر آنانین گؤزلرینده
مورگولو بیر خاطیره شکلینده.
او گون
من ده سنی دوشونه‌جه‌یم
چوروموش سوموکلریمین بئینینده؛
و
توپراغیم سنی سسله‌یه‌جک:
گل و منی گور کی،
نئجه آرخاداش بیر شاعیرین شعرینده
اؤلدورولموشم؛
باش داشیمی اوغورلاماسالار
سن ده آدینی اونا یاز!
چونکی مندن سونرا
بورا سنینده قبرین اولاجاق!
