“ایپک له‌لکلردن یانا!”
کیان خیاو
سئومه‌دیم بو شه‌هه‌ری
بیر اورامی بئله آدینا دئییلدی.
سئومه‌دیم، سئوه بیلمه‌دیم
یئتمیش قابان یوز مین قویونلا سئویشیردی قارانلیغیندا…
باخارسان بو شه‌هه‌رین دووارلاری دا
دمیر چپر
قارانقوش اتینه تاخیلیب دورار…
و سن سؤز وئریرسن هله
دیل تؤکورسن
ایلک یازین ایلک قارانقوشو گله‌جکسن دئییرسن
قانادیندا ساز
دیمدییینده سؤز
له‌لکلرینله قونا‌جاقسان اوستومه دئییرسن
مندن بیر دؤلون ده اولسون ایسته‌ییرسن…
سئومک باشارمادیغینی دئمیشدیم
دئمیشدیم، آند ایچمیشدیم ده
منی سئوسن
سئوه بیلسن
آدیمی ده‌ییشه‌رم.
ده‌ییشمه‌دیم کی، هارداسان؟
بیر دؤنه‌ده چاغیرارسانمی منی؟
آدیم سلوقان دئییل کی
قورخما
باغیر!
یوخسا یالان دئییرمیشسن؟
یوخسا ایلکینیندن ده
سنده اؤلومو دوشونمک بئله یوخموش؟…
هارداسسسس…
هاردایدین او گون ده
بیر ساوالان
بیر قیز- اوغلان قالاسی دئییب داریخدین؟
داریخدین دا داریخدیردین ساوالانی
اؤز- اؤزونه دؤشندی.
داریخدین دا داریخدیردین قیز- اوغلان قالاسینی
اؤز- اؤزوندن اوشندی.
اویسا نه بیر آل- ساری آلمامیز یئتیشدی سنده
نه بیر بارداق قیمیز دیدی
نه بیر ماهنی اوخوندو…
بوتون دلی داغلارییلا، اوچوق قالالارییلا
داریخدی منده بو شه‌هر.
سازا، سؤزه داریخدیم
و اوستومه قونا‌جاق بیر قارانقوشون ایپک له‌لکلرینه…
بونلا بئله سندن دیلکلریمله
دوشله‌دیییم او ایپک له‌لکلریمله
آیاغیم اوستونده دوردوم
اؤز- اؤزومه دؤشه‌نه‌رک
اؤز- اؤزومدن اوشه‌نه‌رک
بوتون یاشامی اؤلومو دوشوندوم سنسیز…
ایللر اولدو
یئتمیش قابان یوز مین قویونا سؤز وئردی، دیل تؤکدو
ایلک یازین ایلک قارانقوشو گله‌جکلر دئدیلر
دئدیلر، دؤل ایسته‌دیلر سونرا شه‌هردن. ..
و سن هاردایدین، هارداسان؟
هاردا‌دیر او وئردیکلرین منیم اوچون؟
هاردا‌دیر او تؤکدوکلرین، دئدیکلرین، ایسته‌دیکلرین؟…
گل آرتیق
گل
یالواریرام.
سازین
سؤزون
ایپک له‌لکلرین بئله اؤزونون اولسون!
یئتمیش قابان
یوز مین قویون یارقی‌سینا بوراخما منی!…
۱۳۹۲/ ۳/ ۱۹
2 پاسخ
کاشکی به قول اوزوز بیزه تو رک ادبیاتین درس وریر دیز نه او کیتابی کی به سوادلار یازمیشدی
کاش منده اوز دیلی مده یازیب واوخیا بی لر دیم عمریم کئچدی اما کی کاش لا ریم کاش قالدی
سلام آقا ی کیانی سیز منیم ۱۳۸۵ ده ادبیات معلیمیم اولوب سوز دوزدیکی بو سعادت منده یوخیدی کی سیزین محضریزده استفاده ائلیم امما او آز زماندادا من سیزددن اؤ ز ظرفیتیم قدر اورشدیم سیزدن چوخ تشکور ائلیره م بیر خاطره: گورنمسوز بیزلری حلا ل ائدین بیز لری……