سون سؤز
کریم قربانزاده
(۱)
حسرتی حسرته قالادیم
دردی درده جالادیم،
اوره‌ییم قابار
روحوم جادار- جادار
نه ائل دویدو
نه اوبا گؤردو،
سئوگیمی قاچاق مال کیمی گیزلتدیم
و خاطیره‌لر دوستاغی اولدو
آزادلیغیم…!
(۲)
من اؤلندن سونرا
منی دار دودوک مزاردا باسدیرمایین،
آچیق دوزنلره تاپشیرین!
سینم اوستوندن-
کولک‌لر اسسین
دلی شیمشک‌لر شاخسین ،
باشیم اوستوندن-
اولدوزلار آخسین
قاتار- قاتار دورنالار کؤچسون.
من اؤلندن سونرا
منی دار دودوک مزاردا باسدیرمایین،
من اوچوش حسرتینده اؤلنلرین بیری‌یم…
