شیرین دیل, کسگین شعر
دکتر علی اکبر ترابی(حاللاج اوغلو)

آنامدان یادگار آنجاق گؤزه‌ل شیرین دیلیم واردیر

دئییب فرهادسان اوغلوم! شیرین بو دیل- دوداق‌لاردیر

اودور یازماق میزین: سیندان، قلم: چککیش، دمیردن: سؤز

یانار کؤنلون: کوره، بو وزن شعرین تاپداماق‌لاردیر

سؤزون اعماق قلبیندن کؤز اودلار تک چیخیب پارلار

اونو سانما کیچیک بیر اود، یانار داغ‌دیر، اوجاق‌لاردیر

دمیرلر: بو یانار سؤزلر شکیل تاپدیقدا سوولانمیش

دؤیوشلرده قیلینج‌لاردیر، بیچین‌لرده اوراق‌لاردیر

اودور میصری قیلینج شعرین، اونون تک حق سؤزون کسگین

بو سؤزلر هر ظالیم بیلسین سیلاح‌لاردیر، یاراق‌لاردیر

ولی بونلار بیزیم ائلده – عدالت، حق سئون یئرده-

اوراق‌لاردیر، چاپاق‌لاردیر، کولوک‌لردیر، ناجاق‌لاردیر

ظولوم، ظالیم، عداوت اولمایان سیاره‌ده سؤزسوز-

نووه، بومبا، فوزه، خمپاره مصرفسیز چوماق‌لاردیر

سیلاحلی قال قارانلیقدا پاریلدیر گؤزلری قوردون

قودوز قوردلار- بو ظالیملر- آداملیقدان اوزاق‌لاردیر

نه‌دیر “حاللاج” سؤزو سازین؟ دئییر “چنلی بئله” بیر باخ

قارانلیقلار قووولدوقجا اوفوق آیدین شافاق‌لاردیر

امین اول شن صاباح، ظالیم، یاوا، موفته یئین یوخدور

قالان عشق و محبت‌دیر، قوچاق‌لیق‌دیر، قوچاق‌لاردیر.