گؤزلرینه
کیان خیاو
بیر باخدیم گؤزلرینه
ایکی باخدیم، اوچ باخدیم.
بوتون عؤمرومو یاخدیم اؤز اللریمله؛
یالنیز هانکی بیر بیلیم‌له، بیلمه‌دیم.
گؤزلرین د‌رین، او قَدَر د‌رین‌ایدی
گؤیلرین یاخینلیغینا اوجالتدی منی.
و بوتون شعیرلریمین
قابارتما سؤزجوکلرينه دؤندو.
سونرا گئجه‌لریمه
ایکیسی بیر بویدا آچیلان پنجره‌لر‌ایدیلر
سونرا قلبیمین باشینا
ایکیسی بیر بویدا ساپلانان پیچاقلار.
اوجو قیزمیش، ایتی،چيلپاق پیچاقلار!
ایکیسی بیربویدا خانیم،پادیشاهیم
نه‌لر بويورسالار، فرمان اونلارین!
من سنین گؤزلرینی گؤردوکدن سونرا
ياشاما داییر یازاجاقلاریمی اونوتدوم
و دوردوم قارشی- قارشییا شاعیرلیيیمله.
گؤزلرینین قوخوسونو
هئچ بیر کسه آنلاتمالی دئییل، دئييلمي؟
سانکی ایکیسی بیر بویدا دولانان دونیا
و منده گیریب-چیخا بیلمک ديله‌يي
قاراسیندان آغینا
آغیندان قاراسینا.
آخ، بیله بیلسه‌یدیم بیر
گؤزلریمین آغلاماغی
سنین گولش گؤزلرینین
ديله‌دييي بيرنه‌سه می، یوخسا یوخ؟!
آه، بیر گون، من کیمم‌می، سورسا گؤزلرین،
سؤیله سنین دیدرگینین
سؤیله سنین سورگونون!
فروردین آیی 1385