داغلارین قوینوندا
هاشم ترلان

ساوالانین اته‏یینده
آرزولاریمى دویونلدیم کمندیمه.
تورانلیقدا
موتال پاپاقلى قایالاردان
سس گلدى:
-آهاى! یوخوما حرام قاتان کیمدیر؟
سکوت!
داغلار داشا دؤندو،
نه سس، نه هاراى،
کؤچرى قوشلارین سسیندن ساواى.

× × × ×

تاریخیمى دۆیۆنلدیم قاناتلاریما،
اوچدوم،
اوچانلار کیمى.
تورپاق آلتیمدا،
بـولوتلار اوستومده.
آه
زیرو‏سینده دومانلار سوز‏ن سهند،
گؤزلرینین یاشیندا اۆز‏ن سهند،
باشى سؤزلو، سوولو،
آیاقى تورپاغا بوخوولو.
اللرى دیزینده
گؤزلرى تبریزینده.

×× ×× ××

توکنمز صبریمى سپدیم گؤیلره.
گؤیلر گؤیردى
آرزوم گؤیرمدى.
ساریلدیم قیلینجا،
سئوگیلیمین دالینجا.
گۆنش ساغیمدا، آى سولومدا،
آه!
باشى شلمه لى میشوو داغى،
گؤزلرینده غم،
یاناغیندا نم،
ساغ الى شبسترین،
سول الى مرندین
ساچلارینى اوخشاییردى.
سسسیز، سمیرسیز.

×× ×× ××

شیمشک چاخدى، هاچالاندى،
کؤهلنیمه هاى دئدیم،
بۆروندوم بـولوتلارین
گؤز یاشینا،
اؤتن گؤنلریمه واى دئدیم.
دره ائندیم، داغ آشدیم.
وطنیمین گؤز ببه‏یى
قاراداغا یول آچدیم.
آه! بودور بز قالاسى
دوننیمین،
بو گۆنومون،
بابکیمین، اؤز قالاسى.
خیانت توزونا بۆرۆنوب قالا.
قولاغیمدا سسله‏نیر
قلینجلارین،
قالخانلارین،
شراره‏سى.
تورانلیقدا یالقیز بیر آت
اور‏ک یاخان شیهه‏سیله
تورپاقلارى ائشیر قات- قات.
گؤزلرینده حسرت دمى:
-هاردا قالدین قوچ بابکیم،
هارداسان؟
یهریمده یئرین بوشدور
هارداسان؟
آذرستان یئتیم قالیب ،
هارداسان؟