غربت ائلده غریبسه‌دیم
ائلیمی قایتارین منه!
دره‌لریم کؤز باغلاییب
سئلیمی قایتارین منه!
آختاریرام حزین- حزین
ایتیردیگیم گولون ایزین
دونیادا هر نه وار سیزین
گولومو قایتارین منه!
دیل دئییرم… منی آنمیر
سسله‌ییرم، او دایانمیر
نوه‌لریم منی قانمیر
دیلیمی قایتارین منه!
دیلیم گئتسه قالار نه‌ییم
نئجه بو درده بئل اییم
نسیمی‌دن اؤیرندیییم
تعلیمی قایتارین منه!
باخ اورمودان گؤی خزره
اوخشار سنی هر منظره
او آذردن بو آذره
ایلیمی قایتارین منه!
۱۳۷۸- تهران
