داغلارين قوينوندا
هاشم ترلان
ساوالانين اتهيينده
آرزولاريمى دويونلديم كمنديمه.
تورانليقدا
موتال پاپاقلى قايالاردان
سس گلدى:
-آهاى! يوخوما حرام قاتان كيمدير؟
سكوت!
داغلار داشا دؤندو،
نه سس، نه هاراى،
كؤچرى قوشلارين سسيندن ساواى.
× × × ×
تاريخيمى دۆيۆنلديم قاناتلاريما،
اوچدوم،
اوچانلار كيمى.
تورپاق آلتيمدا،
بـولوتلار اوستومده.
آه
زيروسينده دومانلار سوزن سهند،
گؤزلرينين ياشيندا اۆزن سهند،
باشى سؤزلو، سوولو،
آياقى تورپاغا بوخوولو.
اللرى ديزينده
گؤزلرى تبريزينده.
×× ×× ××
توكنمز صبريمى سپديم گؤيلره.
گؤيلر گؤيردى
آرزوم گؤيرمدى.
ساريلديم قيلينجا،
سئوگيليمين دالينجا.
گۆنش ساغيمدا، آى سولومدا،
آه!
باشى شلمه لى ميشوو داغى،
گؤزلرينده غم،
ياناغيندا نم،
ساغ الى شبسترين،
سول الى مرندين
ساچلارينى اوخشاييردى.
سسسيز، سميرسيز.
×× ×× ××
شيمشك چاخدى، هاچالاندى،
كؤهلنيمه هاى دئديم،
بۆروندوم بـولوتلارين
گؤز ياشينا،
اؤتن گؤنلريمه واى دئديم.
دره ائنديم، داغ آشديم.
وطنيمين گؤز ببهيى
قاراداغا يول آچديم.
آه! بودور بز قالاسى
دوننيمين،
بو گۆنومون،
بابكيمين، اؤز قالاسى.
خيانت توزونا بۆرۆنوب قالا.
قولاغيمدا سسلهنير
قلينجلارين،
قالخانلارين،
شرارهسى.
تورانليقدا يالقيز بير آت
اورك ياخان شيههسيله
تورپاقلارى ائشير قات- قات.
گؤزلرينده حسرت دمى:
-هاردا قالدين قوچ بابكيم،
هارداسان؟
يهريمده يئرين بوشدور
هارداسان؟
آذرستان يئتيم قاليب ،
هارداسان؟
یک پاسخ
یاشاسین