بو قیفیللی شه‌هرده
تاریخ اونوتقاندی
اون چووالی ییرتیق؛
اونودولوب بایرام آخشامینین
هیجانلی قوی ـ گؤتورلری.
ماوینین یاشادیغی پروازلار
رؤیانین کاساد بازاریندا
اوزاق خاطره‌لره سؤیکنیر.
سردار اولوب آیریلیق
چتین لیک، قایدالاری پوزان یئرده.
آغاج لار بوشونا یالواریر گؤی‌لره؛
بو خسته‌لییی
یالنیز
اوره‌ک دادان ال‌لرین قاپیسینا گؤتورمه‌لیسن؛
چیچک‌لرین ایفاسیندا سسلنن
یوسمالیق درگاهینا.
سسینده منزل ائدن یاز هاواسی
بلکه بیر گون
«آجی چایی» ندان «اورمو گؤلو»نه یول چکدی
اوزون و درین؛
هم دیلیمیز آچیلدی
هم سوفرامیز
هم ده یاشادیق
یاغیشدا سئوگی یاشاماغی
گیلووشا نارینین مکتبینده.
۱۴۰۵/۰۷/۱۴
