ایش ایدی آتام
گؤزونو آچدیغی گوندن ایشلشمیشدی
ایش‌دن باشقا یاپدیغینی گؤرمزدیک
ایش یئری اولسون
ائو اولسون
بازار، باغ، اکه‌ره‌یئر، فرق ائتمزدی؛
مئییت یوماغاجان گئدیردی چیخماز جانی
ایش‌دن ایشه سوروتله‌ییردی گؤوده‌سینی
دیشی داشی کسیردی
دوشو کیشی اؤته سینیر دیشی هاوادان آسلاقدی
یوخودان آییلان زامان گؤزلری آییشیردی
«اؤز» سؤزلویونده یوخ ایدی
الیفباسی‌نین ایکی حرفی وار ایدی [ای-ش]
آنجاق ایشدی ائوده توپلانیب ایلنجه قورسایدیق بئش ایلده بیر
دانس اوْرتامی اولاردی‌سا اؤرنه‌یین؛
هرکسدن ایی او اویناردی
چالیب اوخوما اولاردی‌سا؛
سسی‌یله عاقلیندا توتدوغو ماهنی‌یلا مست ائدردی چئوره‌‌ده‌کیلری
‘ناغیلی’، نه اونون کیمی سؤیله‌ین گؤردوم، نه ده اولای‌دان اولایا کؤرپو سالیب، یوروده بیله‌نینی
گولوشو ماسال ایدی
بیزده یاشام اومودو وار ایدی‌سا
اونون او آن پاریلدایان آغ‌آپپاق دیشلری‌نین قارا’سی قدر ایدی
تکجه‌نه بیر دست پالتارلا چیلپاق بئینیمی ایسیدیر اوْنجا ایل‌دیر
آنی‌سی
عؤمورونه بیر گئییم!
اَکمه‌ییمیزه گیرمه‌مک نامینه حظّ آلدیغی تک اوغراشی‌سی سیگار چکیشینی بیراخدی
هئپ یورغون یورغون مورگولردی میتککه‌یه سؤیکک بیر اَلی باشیندا بیر الی میلچک‌ووران‌دا
گؤزو گؤجَن آچیلاردی صاباحله‌یین، گون‌اوْرتا، آخشام
یئم اوزو، اون‌بیر یئییم‌جیل اوشاغینا اون دیغالیق آتالیغا ال وئرمزدی
آتاما ماتام
یئری گلنده یئردن قاباق گلیردی عایله‌میزین چیخارینا
عابیده تک گزینیردی
اوزونون ایفاده‌سی‌نین شیتلییه شوْللوغا ساپدیغی اولمادی، اولسایدی باری
آتام رومان اولاردی‌سا
سئروانتئس’ین دوْن‌کیشوت’ونون دئییرمانی یئرینه
ایندی اونون تانابای’لیغی چئوریلیردی اوْنجا فرانسیزجایا
تورپاغی هر باسدیغیندا آیاقلاری آیاقلانیردی دوشمک‌دن
او تر-تمیز آنتئه‌یدی
حیاتین گؤرنمز هرکول’ویلا اؤیله بیر ساواشدی کی
هاراسیندان توتاجاغینی بیلمه‌دی
تورپاق ‘ایچینه قاچدی’
تورپاغین ایچینده‌کیلر ده کی ایتین گؤتونه…
آچیقلاما
آییشماق: گیجیشمک
تانابای: چنگیز آیتماتوفون ‘الویداع گولو ساری’ رومانی‌نین باش قهرمانلاریندان
آنتئه: یونان میتولوژی‌سینه گؤره، دونیاداکی نپتونون اوغلو اولان بیر دیو. اونلو یونان قهرمانی هرکول، بو دیوله ساواشمیش و اونو دمیر قوللاری‌نین آراسیندا بوغموشدور. ساواش سیراسیندا هرکولون، دیوین تورپاغا، یعنی آناسینا هر توخونوشوندا گوج قازاندیغینی و دؤیوش اوچون یئنیلندییینی فرق ائتدییی سؤیله‌نیر. هرکول اونو یئردن قالدیرمیش و بو حوققا ایله اونو بوغمایی باشارمیش‌دیر.
