واخت اولار
نه من دانیشا بیلرم
دفتریمین اوغورلانمیش سطیرلریندن،
نه سن بیر ایش گؤره بیلرسن
دوه‌سی ییخیلان اولدوزون
قاخینج اولماسینا.
سلیمان دیلین ایتیرر
داوود کیتابین؛
بولود قاراقوش اولوب
فتح ائده‌ر گؤی اوزون؛
سؤزجوک‌لر اود توتوب یانار
بدنام سارای‌لارین
گولوشدن انتقام آلدیغی یئرده.
اوتورما
تورپاغین تورپاق اولماسینا؛
آنالیق یاساق دئییلن یئرده
دوغولان اوشاق کار اولار
آچیلان سحر کور.
نه بوغدا وظیفه‌سین دوز داشییار
نه گؤزه‌للیک قاتقی قاتار
بیر لچک بنؤوشه
سوسوز گون‌لریمیزه.
پنجره‌لر
سس‌سیز، سمیرسیز
ترک ائدیرلر ائولری
چیراغسیز ال‌لرین قیسیرلیغیندا،
تویوغوموزا داش آتان‌لارین سایی چوخالیر.
۱۴۰۴/۰۶/۰۴
